EKITABO KYʼ
OKUZWA
E MISIRI
Enyanjula
Ekitabo kinu kyeyongera okulonsya ebyafaayo ebikwata oku bantu ba Kibbumba, aBayudaaya, okuzwera omu biseera ekitabo kyʼeNtandiika awekikoma. Entandiika yʼekitabo kinu etumula oku Bayudaaya bonabona ngʼowebabbaire bagalama omu kyalo kyʼe Misiri, neye oKibbumba ngʼawulira okusaba kwabwe owebasaba obubbeeri. Kale nʼalonda oMusa okubba mukubbemberi waabwe era nʼamwezesya okukubbembera aBaisirairi okuzwa omu kyalo kyʼe Misiri. Bazwireyo omu kiire ekibaitiiremu abaana abaisuka ababere bonabona, nʼebyayo ebisaiza byonabyona omu kyalo kyʼe Misiri, neye ni babitirya aBaisirairi (Kuz 1–12).
Neye waire ngʼaBaisirairi babbaire bateere nga tibakaali bagalama, basisinkanire ebigosi bingi owebabbaire bali omu lugendo, babita omwidungu balungama omu kyalo kyʼe Kanani oKibbumba ekiyasuubizire okubawa. Bajeemeranga oKibbumba, neye owebatuuka oku lusozi oSinaayi, oKibbumba nʼakwatisya oMusa amateeka abantu agebabbaire nʼokukuumanga kaisi bayezye okubba omu bwomi oKibbumba obwasiima (Kuz 13–20).
Okwongera oku mateeka eikumi, oKibbumba abawa ebiragiro ebikwata oku ngeri eyʼokumusinzamu nʼengeri eyʼokwombekamu ekifo abakabona e gibayezya okumuleetera ebyokuwaayo nʼesadaaka (Kuz 21–40).
Kinu niikyo ekitabo ekyokubiri oku bitaanu oMusa ebiyawandiikire. Era bateeberaza bati yakiwandiikire mu mwanka ogwa 1,400 kaisi babyalenge oYesu.
1
ABaisirairi babagadya omu Misiri
1 Ganu niigo amaliina gʼabaana ba Isirairi, ogubeeta oYaakobbo abeyaabire nabo omu kyalo kyʼe Misiri, aamo nʼabʼomu bisito byabwe:
2 OLubbeeni, nʼoSimyoni, nʼoLeevi, nʼoYuda;
3 nʼoIsakaali, nʼoZebbulooni, nʼoBbenyamini;
4 nʼoDaani, nʼoNafutaali, nʼoGaadi, nʼAseri.
5 Abantu bonabona abʼeibyaire lya Yaakobbo abaabire e Misiri babbaire 70, ngʼobaliireku oYusufu eyabbaire yaabire eira omu Misiri.
6 Ebiseera owebyabitirewo, oYusufu nʼabagandabe nʼabantu bonabona abandi abʼomu mugigi ogwo, ni bafa.
7 Neye abaizukulu baabwe ni babyalagana, ni babitirira ino obungi. Era ni baizula omu kyalo kyʼe Misiri nabuli wantu.
8 Awo nga wabitirewo emyanka mingi, ni waizawo omu bwezye okabaka ogondi omu kyalo kyʼe Misiri eyabbaire tamaite ebifa oku Yusufu.
9 Okabaka oyo nʼakoba abantube ati, “Aale mubone, aBaisirairi batubitiriireku ino obungi, era batukira amaani.
10 Atyanu tubasalire amalabuki, kaisi tibeeyongera obungi. Ekyo kityo olwʼokubba singa abalabe baiswe batanula olutalo okutulwanisya, aBaisirairi abo bayinza okubeeyimbyaku ni batulwanisya kaisi awo ni batwirukaku okuzwa omu Misiri.”
11 Nʼolwekyo aBamisiri ni basuuca aBaisirairi bagalama baabwe. Era ni babateekaku abanyampala okubagadya nʼokubakolesya emirimo emikalanguki. Era ni bombekera oFalaawo ekibuga Pitomu, nʼekindi Lameseesi, okukola ngʼesitoowa gyʼebintu.
12 Neye aBamisiri egibakomerye okugadya aBaisirairi, nʼaBaisirairi gibakomerye okweyongera obungi nʼokusalaana omu kyalo ekyo. Kale aBamisiri ni beeraliikirira olwʼaBaisirairi,
13 era ni bakolesya aBaisirairi emirimo na itima.
14 ABaisirairi ni babba omu bwomi obukalanguki, ngʼaBamisiri babakaka okukubba amatafaali nʼokutabula opuyo ogubakolesya omu kwombeka, omu bukalubo, nʼokukola omu misiri gyabwe. Omu mirimo egibakolanga gyonagyona, aBamisiri babakolesyanga na itima.
15 Awo okabaka wʼe Misiri nʼakoba oSifula nʼoPuwa, abakali abo ababyalisyanga abakali aBeebbulaniya, ati,
16 “Owemwabbanga mubyaliisya abakali aBeebbulaniya, ni mubona ngʼomwana mwisuka, mumwitenge. Neye nga mwala, mumulekenge nʼabba mwomi.”
17 Neye ababyalisya abo ni batya oKibbumba, nandi ni bakola ngʼokabaka wʼe Misiri oweyabalagiire, ni balekanga abaana abaisuka nga boomi.
18 Kale okabaka wʼe Misiri nʼayetesya ababyalisya abo, nʼababuulya ati, “Lwaki muli kukolanga kiikyo? Lwaki muli kulekanga abaana abaisuka nga boomi?”
19 Ababyalisya ni bamwiramu bati, “Abakali aBeebbulaniya tibali ooti bakali aBamisiri. Ekyo kityo olwʼokubba ibo tibakaluba omu kubyala, tubba tukaali okubatuukaku nga bamalire ira okubyala.”
20 Kale awo oKibbumba nʼawa ababyalisya abo enkabi, era aBaisirairi ni beeyongera obungi.
21 Era olwʼokubba ababyalisya abo bawaire oKibbumba ekitiisya, oKibbumba nʼabawa eibyaire.
22 Awo oFalaawo nʼalagira abantube bonabona ati, “Nabuli mwana omwisuka oMwebbulaniya oguyabyalanga, mumumumenge mu mwiga oKiyira, neye nabuli mwana omwala mumulekenge nʼabba mwomi.”