5
Olwembo lwa Debola nʼoBbalaki olwʼobuwanguli
1 Oku lunaku olwo, oDebola nʼoBbalaki omutaane wʼAbbinowamu, ni bemba olwembo lunu oluti:
2 “Muwuuje oMusengwa,
olwʼokubba abeekubbemberi omwIsirairi bamaliriire okulwana,
era nʼabantu ni beewaayo nga beetakiire.
3 “Muwulire inywe abakabaka, mutege amatwi inywe abafugi!
Nze nayembera oMusengwa, nayemba;
nayemba okuwuuja oMusengwa iye oKibbumba wa Isirairi.
4 “Oo Musengwa, owewazwereire oku lusozi oSeiri,
owewakumbiire okuzwa omu kitundu kyʼEdomu,
ekyalo kyatengeetere nʼeigulu ni litoonyesya oikendi
dala, ebireri ni bisusuca amaizi.
5 Ensozi gyatengeetere omumaiso ga Musengwa iye oKibbumba afugira oku lusozi oSinaayi,
omumaiso ga Musengwa iye oKibbumba wa Isirairi.
6 “Oku mulembe gwa Samugali omutaane wʼAnasi,
oku mulembe gwa Yayeeri enguudo bagyewalire,
ngʼabatambuli babita mu businde.
7 Abeekubbemberi bʼomwIsirairi bawoirewo,
paka nze oDebola owenaizire,
era owenaizire ngʼomaaye wa Isirairi.
8 ABaisirairi basalirewo okusinza abakibbumba abandi,
olutalo ni lugwawo oku miryango gyʼekibuga.
Neye tiwabbairekuuwo engabo waire eisimo
omu balwani 40,000 omwIsirairi.
9 Omwoyo gwange guli ku bafugi ba Isirairi,
abo abeewaireyo nga beetakiire.
Muwuuje oMusengwa.
10 “Mukitumuleku inywe abatambulira oku mpunda enjeru,
inywe abatyama oku mikeeka emijolije era egyʼebbeeyi,
na inywe abatambulira omu luguudo.
11 Muwulisisye eigono lyʼabembi abali oku maluba.
Eeyo batumula ebikwate ebifa oku buwanguli bwa Musengwa obutuukirirye,
nʼebikole byʼobutuukirirye bwʼabantube abʼomu byalo bya Isirairi.
“Awo abantu ba Musengwa
ni bakumba nga baserengeta okwaba oku miryango gyʼekibuga.
12 Debola olamuke, olamuke.
Olamuke bba, olamuke, oteekeku olwembo!
Bbalaki osetuke.
Iwe omutaane wʼAbbinowamu, okubbemberyemu abasibe aboowambire!”
13 “Awo abalwani ba Isirairi abalamireku
ni bakumba nga baserengeta okwaba eeri abakungu baabwe;
abantu ba Musengwa
ni baserengeta nga baaba e gyali okulwanisya abalabe abʼamaani.
14 OmwEfulaimu ni wazwayo abasibuka omu kyalo ekyabbaire ekyʼaBamereki
ni basengererya abʼomu kika kya Bbenyamini.
Omu Makiri abafugi ni baserengeta okuzwayo,
abandi ni bazwa e Zebbulooni abo nga baduumiri.
15 Nʼabeekubbemberi ba Isakaali ni baiza nʼoDebola
nga bali kintu kimo nʼoBbalaki,
ni banguya okumusenjaaku omu kiinamo.
Omu kika kya Lubbeeni
ni wabbaawo okuseega kunene ino.
16 Niki ekyakusigalisirye omu bisibo byʼentaama
okuwulisisya emirere egibafuwira entaama?
Omu kika kya Lubbeeni
ni wabbaawo okuseega kunene ino.
17 Abʼe Gireyaadi basigaire kwitale wa Yoludaani.
Abʼomu kika kya Daani lwaki basigaliire omu maato?
Abʼomu kika kyʼAseri ni basigalira oku mbale kwʼenyanza,
ni babba oku mwalo.
18 Abʼomu kika kya Zebbulooni
nʼabʼomu kika kya Nafutaali ibo bagumire ni beewaayo okufeera omu lutalo.
19 “Abakabaka baizire, ni balwana;
abakabaka bʼe Kanani balwaniire
e Taanaki okumpi nʼomwalo gwʼe Megido,
neye nandi ni banyaga efeeza waire omunyago ogundi.
20 Enkota omwibbanga gyalwaine,
omu manzira gaagyo, gyalwanisirye oSisera.
21 Omwiga oKisoni gwabasaanyirewo,
omwiga ogwʼeira, omwiga oKisoni.
Mwoyo gwange, obbe mugumu; nze nkumba nga ntambula na maani.
22 Embalaasi gya Sisera ni gitutulya ensindo,
ni gigwaizuka, era nga gigwaizuka nʼensindo egyʼamaani.
23 OMalaika wa Musengwa nʼakoba ati, ‘Mulaame ekibuga oMerozi
mulaamire nakimo ino abakityamamu,
olwʼokubba tibawagiire oMusengwa
omu kulwanisya abʼamaani.’ ”
24 OYayeeri wʼenkabi okukiraku abakali bonabona,
oyo omuka Kebberi oMukeeni,
wʼenkabi ino okukiraku abakali bonabona ababba omu weema.
25 OSisera yasabire maizi, oYayeeri yamuwaire mata.
Yamuwereire amata obbongo mu bbakuli ewoomera bakungu.
26 Yatoire onkondo wʼeweema nʼengaloye,
era yatoire enyundo nʼengaloye endiiro.
Yakubbire oSisera, nʼamususungula omutwe,
yamukubbiriire onkondo angulu wʼolusaya.
27 Nʼaika aabigere bya Yayeeri,
nʼaganguka nʼagwa; nʼakalambalala aawo.
Aabigere bya Yayeeri nʼaika;
e giyaikire, aawo giyagwire nʼafa.
28 Omaaye wa Sisera yalolenkereirye omu dinisa,
yalolere omu dinisa nʼaceera ati,
“Lwaki ekigaalikye kirwire okwira?
Lwaki ensindo gyʼembalaasi egikuusa ekigaalikye ndwirewo okugiwulira?”
29 Abaweereryabe abakali abakira amalabuki ni bamwiramu;
iye dala ni yeeyongera kwetumulya yenkani ati:
30 “Tibali kusolooja nʼokugabana bintu ebibanyagire,
nabuli musaiza omwala moiza moiza ooba babiri babiri,
ebizwalo ebisa ebyebbeeyi eino okubba omunyago ogwa Sisera,
ebizwalo ebisa ebyebbeeyi eino ebijolije,
ebizwalo ebyʼomu mamiro ebibajolijirye eino ibyo nga byange,
ekikoba kiti, ebyo byonabyona munyago?
31 “Oo Musengwa, oleke abalabebo bonabona bajigirike.
Neye oleke abakutaka babbe ooti isana obweribba nga lizwayo omu maani gaalyo.”
Awo ekyalo ekyo ni kibba nʼemirembe emyanka 40.