12
Abakabaka oMusa abeyawangwire
1 Banu niibo abakabaka aBaisirairi abebawangwire ni batwala ebyalo byabwe ebyʼe buzwaisana wa Yoludaani, okuzwera omu Kiinamo Alunoni okutuukira nakimo oku lusozi Kerumooni era nʼokutwaliryamu nʼe buzwaisana wonawona owʼenyanza eyʼAlabba:
2 OSikoni okabaka wʼaBamooli,
eyafugiranga omu Kesyubboni. Yafugire okuzwera Aloweri ekiri oku mugo gwʼekiinamo kyʼAlunoni, okuzwera omu mankati gʼekiinamo, okwabira nakimo paka ku mwiga oYabboki, ekisalagana nʼaBaamoni. Ekyo nga kitwaliryamu ekitundu ekyʼe Gireyaadi.
3 Yafuganga nʼe buzwaisana owʼAlabba okuzwera oku Nyanza oKiinereesi okutuuka oku nyanza eyʼAlabba nga niiyo eNyanza eya Cumbi, paka e Bbesi Yesimosi, ni yeeyongera paka ku mbale mbale kwʼamaserengeta emantyeremuko gʼolusozi oPisuga.
4 Bawangwire nʼokabaka Ogi owʼe Bbasani,
eyabbaire omoiza oku Baleefa abasembereyo, eyafugiranga omwAsitalosi nʼomwEdereeyi.
5 Era yatwaliryangamu olusozi oKerumooni, nʼekibuga oSaleka, nʼekyalo kyʼe Bbasani kyonakyona, okutuuka oku nsalo nʼabantu bʼe Gesuli nʼe Maaka, aamo nʼekimo kyokubiri kyʼekyalo kyʼe Gireyaadi, ngʼasalagana nʼoSikoni okabaka owʼe Kesyubboni.
6 OMusa omuweererya wa Musengwa, nʼaBaisirairi ni bawangula abakabaka abo. Era oMusa omuweererya wa Musengwa ebyalo byʼabakabaka abo nʼabiwa ebika binu: Ekya Lubbeeni, nʼekya Gaadi, nʼekimo kyokubiri ekyʼekika kya Manase, okubba byabwe.
Abakabaka oYoswa abeyawangwire
7 Banu niibo abakabaka oYoswa nʼaBaisirairi abebawangwire omu kitundu kyʼe bugwaisana owa Yoludaani, okuzwera e Bbaalu Gadi omu Kiinamo ekya Lebbanooni, okutuuka oku lusozi Kalaki, ni kiniinaniina okulungama e Seiri. OYoswa nʼawa aBaisirairi ekyalo ekyo ngʼomuwuluko, nabuli kika ngʼakiwa omuwuluko gyakyo.
8 Ekitundu ekyo kyatwaliiryemu ekyalo ekyʼensozisozi, nʼansi oku mbale mbale kwʼensozisozi gyʼe bugwaisana, nʼenyanza eyʼAlabba, nʼamantyeremuko gʼolusozi, nʼeidungu oNegevu. Ekyalo ekyo niimwo omwabbairemu aBakiiti, nʼaBamooli, nʼaBakanani, nʼaBaperizi, nʼaBakiivi nʼaBayebbusi.
9 ABaisirairi ni bawangula abakabaka bʼebibuga binu: OYeriko, nʼAyi ekiriranire e Bbeseri,
10 nʼoYerusaalemi, nʼoKebbulooni,
11 nʼoYalumusi, nʼoLakisi,
12 nʼEgulooni, nʼoGezeri,
13 nʼoDebbiri, nʼoGederi,
14 nʼoKoluma, nʼAladi,
15 nʼoLibbuna, nʼAdulaamu,
16 nʼoMakeda, nʼoBbeseri,
17 nʼoTapuwa, nʼoKeefa
18 nʼAfiki, nʼoLasyaloni,
19 nʼoMadoni, nʼoKazoli,
20 nʼoSimulooni Meroni, nʼAkusafu,
21 nʼoTaanaki, nʼoMegido,
22 nʼoKedesi, nʼoYokuneyamu omu Kalumeri,
23 nʼoDoli oku mbale mbale kwʼenyanza, nʼoGoyiimu omu Galiraaya,
24 nʼoTiruza. Babbaire bonabona aamo abakabaka 31.