23
Okwekuuma abakugu omu byʼaMateeka nʼaBafalisaayo
(Mak 12:38-39; Luk 11:43,46; 20:45-46)
1 Oluzwanyuma lwʼebyo oYesu nʼatumula nʼekiziima kyʼabantu aamo nʼabeegibe,
2 ati, “Abakugu omu byʼaMateeka ga Musa nʼaBafalisaayo niibo abali nʼobwezye okuvuunula aMateeka ga Musa.
3 Kale byonabyona ebibabakobera mubikwate, era mubikole. Neye timusengereryanga ebikole byabwe, olwakubba ebibeegesya abantu, tiniibyo ibo abanyere ebibakola.
4 Era batiika abantu amateeka amakakaali agatakwatika, neye nga ibo abanyere mpaawo kibakola okubbeera abantu okugakwata.
5 Era byonabyona ebibakola, bagenderera bantu kubabona. Kagira beesiba oku mpumi ooba oku ngalo obusawo bwʼamadiba obugalami obukiraku obwʼabandi omubbaamu enyiriri gyʼeBiwandiike. Era eganduula gyabwe nga igyo giriku amajwenjwe amanviriri.
6 Era bataka ebifo ebyʼekitiisya oku mbaga, nʼebifo ebikiraku ekitiisya omu makumbaaniro.
7 Era bataka nʼokubasugirya nga babawa ekitiisya omu butale, nʼokubeeta bati, ‘Musomesya.’
8 “Neye inywe timwikiriryanga abantu okubeeta bati, ‘Musomesya,’ olwakubba oMusomesya waanywe ali moiza. Era inywe nywenanywena muli boluganda.
9 Era oku kyalo timubbangaku nʼomuntu ogumuwa ekitiisya nga mumweta ‘Itewaanywe,’ olwakubba oItewaanywe omu mwoyo ali moiza, era ali mwigulu.
10 Era tibabeetanga bati, ‘Beegesi,’ olwakubba omwegesi waanywe ali moiza, era niiye oKurisito ogubasukireku amafuta.
11 Kale akira ekitiisya mwinywe, yaabbanga muweererya wʼabainaye.
12 Ekyo kityo olwakubba omuntu yenayena eyegulumalya, balimwica. Neye buli iye oyo eyewombeeka, balimugulumalya.”
OYesu azumirira aBafalisaayo nʼabakugu omu byʼaMateeka
(Mak 12:40; Luk 11:39-42,44,52; 20:47)
13 Awo oYesu ni yeeyongera okukoba ati, “Wobe! Ala abakugu omu byʼaMateeka ga Musa nʼaBafalisaayo nga mwalaba! Bananfunsi inywe! Ekyo kityo olwakubba mukaisya abantu okwingira omu bwakabaka bwʼomwigulu olwʼenjegesya yaanywe eyʼobubbeyi. Inywe abananyere omwegesya timwingira, era ni mukaisya nʼabo abagezyaku okwingira. [
14 Wobe! Ala abakugu omu byʼaMateeka ga Musa nʼaBafalisaayo nga mwalaba! Bananfunsi inywe! Ekyo kityo olwakubba munyaga ebintu byonabyona omu manyumba ga banamwandu. Era musaba oKibbumba omu bibono ebingi olwʼokweraga. Nʼolwekyo balibawa ekibonerezo ekikiraku obunene].
15 “Wobe! Ala abakugu omu byʼaMateeka ga Musa nʼaBafalisaayo nga mwalaba! Bananfunsi inywe! Ekyo kityo olwakubba mutambula nabuli wantu okucuusaku omuntu kadi moiza okubba musengereri waanywe. Era owemumala okumucuusa era ni mumuleetera okugada ino omu geyeena okukubbisyamu emirundi mibiri.
16 “Wobe! Ala nga mwalaba inywe abali ooti beekubbemberi aboofu! Mwegesya muti, ‘Buli alayira ngʼakolesya eYeekaalu okukakasa ekirayiro, tabba nʼomusango owaatatuukirirya ekyasuubizire. Neye buli alayira ngʼakolesya ezaabbu omu Yeekaalu okukakasa ekirayiro, ateekwa okutuukirirya ekyasuubizire.’
17 Inywe abasirusiru, era abali ooti bantu aboofu! Ekikira obukulu niikyo ekiriina, zaabbu, ooba Yeekaalu esuuca ezaabbu okubba ntukulye?
18 Era mwegesya muti, ‘Buli alayira ngʼakolesya ekyoto okukakasa ekirayiro, tabba nʼomusango owaatatuukirirya ekyasuubizire. Neye buli alayira ngʼakolesya ekirabo ekiri oku kyoto okukakasa ekirayiro, ateekwa okutuukirirya ekyasuubizire.’
19 “Inywe abali ooti bantu aboofu, ekikira obukulu niikyo ekiriina, Kirabo, ooba kyoto ekisuuca ekirabo okubba ekitukulye?
20 Kale atyanu oyo alayira ngʼakolesya ekyoto okukakasa ekirayiro, era abba alayire ngʼakolesya nʼebirabo byonabyona ebikiriku.
21 Era iye oyo alayira ngʼakolesya eYeekaalu okukakasa ekirayiro, abba alayire nʼoKibbumba abbaamu.
22 Era iye oyo alayira ngʼakolesya eigulu okukakasa ekirayiro, era abba alayire ngʼakolesya ntebe ya Kibbumba, nʼoKibbumba agityamaku.
23 “Wobe! Ala abakugu omu byʼaMateeka ga Musa nʼaBafalisaayo, nga mwalaba! Bananfunsi inywe! Ekyo kityo olwakubba muwa ekimo kyʼeikumi nʼoku birime ebisembayo obutyai ebimukolesya okuwoomesya ebyokulya. Neye muleka okutuukirirya ebintu ebikira obukulu omu mateeka ngʼobwenkanya, nʼekisa, nʼobwesigwa. Mwankubbaire nga muwa ekimo kyʼeikumi, neye nga timulagajalira ebintu ebindi bidi ebikira obukulu.
24 Inywe abali ooti beekubbemberi aboofu, mwegendereza ino okukola ebintu ebitali bikulu omu Mateeka, neye ni mulagajalira ebintu ebikulu kaisi nandi mukitegeera.
25 “Wobe! Ala abakugu omu byʼaMateeka ga Musa nʼaBafalisaayo, nga mwalaba! Bananfunsi inywe! Ekyo kityo olwakubba muli ooti bantu abafaayo kunaabyaku ebikopo nʼamatiba ku ngulu kwonkani, neye ngʼomu ntooma mugagi. Nti inywe mukola ebintu, abantu ni baseega bati muli batuukirirye, aate ngʼemyoyo gyanywe giizwire buluvu na inywe okwetakiryanga mwenkani ebisa.
26 Bafalisaayo inywe, aboofu omu myoyo, musooke mucuuke muzwe omu biseego byanywe ebibbibibbi kaisi ebimukola nʼebimukoba bibbe bisa.
27 “Wobe! Ala abakugu omu byʼaMateeka ga Musa nʼaBafalisaayo, nga mwalaba! Bananfunsi inywe! Ekyo kityo olwakubba muli ooti magombe agebasiigireku erangi enjeru. Era gaboneka nga gatukula oku ngulu, neye ngʼomu ntooma gaizwire magumba gʼabafu, nʼobuvundi.
28 Kale nʼomu ngeri enanyere eyo na inywe, muboneka ooti bantu abakola ebintu ebyobutuukirirye, neye ngʼomu myoyo gyanywe mwizwire bunanfunsi nʼebiseego ebibbibibbi.”
Ekibonerezo kya bananfunsi
(Luk 11:47-51)
29 Awo oYesu ni yeeyongera okulabula abakugu omu byʼaMateeka ga Musa nʼaBafalisaayo ati, “Wobe! Ala abakugu omu byʼaMateeka ga Musa nʼaBafalisaayo, nga mwalaba! Bananfunsi inywe! Ekyo kityo olwakubba mutandaza amagombe gʼabanaabbi abazeiza baanywe abebaitire, era ni mujolija nʼamagombe gʼabatuukirirye.
30 Era ni mukoba muti, ‘Singa twabbairewo omu biseera bya bazeiza baiswe, nga titwemigiire omu kwita abanaabbi.’
31 Kale omu ngeri eyo inywe abanyere ni muwa obukakafu muti muli baizukulu ba badi abaitire abanaabbi era muli ooti niibo.
32 Kale aale nywena mwabe omumaiso mumalirirye ekikole ekibbikibbi ekyo abazeiza baanywe ekibatandiikire.
33 “Inywe omuli ooti mpiri! Era omuli abakabbikabbi ooti mpiri enfulugundu! Mwalibunuka mutya okubasalira omusango gwʼokubasindika omu geyeena?
34 Kale dala nabatumira abanaabbi nʼabasaiza abalabuki era nʼabakugu omu byʼaMateeka ga Musa. Neye abamo kwibo mwalibaita, era nʼabandi ni mubakomerera oku misaalaba, nʼabandi ni mubafaamuulira omu makumbaaniro gaanywe era nʼabandi ni mubagudya mu buli kibuga.
35 Kagira omusango gwʼokwita abantu bonabona abatuukirirye oku kyalo gwalibba ku niinywe. Niiye owekyalibba, okuzwera oku mutuukirirye Abberi, okutuuka oku Zakaliya omwana wa Bbalakiya, ogubaitiire akati wʼekyoto nʼekifo ekyeru omu Yeekaalu.
36 Mbakobera amazima nti, omusango gwʼokwita abantu bonabona abatuukirirye gwalibba ku bantu bʼomulembe gunu.”
OYesu akunga olwa Yerusaalemi
(Luk 13:34-35)
37 Awo oYesu nʼakunga oku lwʼabantu bʼe Yerusaalemi ati, “Inywe abantu bʼe Yerusaalemi, inywe omwita abanaabbi, era ni mwita nʼabantu oKibbumba ababatumira nga mubakubba nʼamabbaale! Emirundi mimeka egintakire okusolooja abaanabo ooti nkoko owaamaamira obumiyobwe omu biyayabye, neye nga timwikirirya?
38 Aale atyanu mwaba okubona ngʼekibuga kyanywe kisigaliire awo ooti kinameje.
39 Ekyo kityo olwakubba mbakobera nti timwalimbonaku tete paka owemwalikoba muti, ‘Wʼenkabi oyo iye aiza omu liina lya Musengwa oKibbumba.’ ”