EKITABO KYʼ
OKUBALA
Enyanjula
Ekitabo kinu ekyʼoKubala kitumula oku lugendo lwʼaBaisirairi okumala emyanka 40 nga batambula omwidungu nga bakaali okutuuka omu Kanani ikyo ekyalo ekisuubize. Ekitabo kinu bakyeta Kubala olwʼokubba kirimu ebitundu bibiri ebiraga obungi bwʼabʼamaje mu buli kika kya Isirairi (1–26). Okuzwa eira nʼeira abakugu omu byʼeBbaibbuli baikirirya bati ekitabo kyʼoKubala nʼebitabo bidi ebindi ebiri omu bitaanu omuli eNtandiika, nʼoKuzwa, nʼaBaleevi nʼaMateeka, onaabbi Musa niiye eyabiwandiikire. Ekyo ooti-so bakitumulaku omu kitabo kinu ekyʼoKubala olwʼokubba omu ntandiika kikoba kiti oKibbumba yatumwire nʼoMusa (1:1) Era kyezyeka kiti oMusa niiye eyawandiikire ekitundu ekikiraku obunene ekyʼekitabo kinu era kiti oluzwanyuma abawandiiki ni bagaitaku ebitundu ebindi. Ekyokuboneraku kiinu: Kigosi okuseega oti oMusa yabbaire ayezya okubba niiye eyawandiikire olunyiriri ooti (12:3), empisagye eginanyere awebagiwuujirya.
Omu lugendo lwabwe okubita omwidungu, aBaisirairi beemuluguunyire era ni bajeemera oKibbumba emirundi mingi. Ekyazwiremu kwabbaire kubabonereza. Ekyokuboneraku kwekyo kiinu kiti, aBaisirairi batiire era ni beemuluguunya bati abantu bʼe Kanani babbaire bʼamaani ino (14:1-4) Olwʼensonga eyo oKibbumba nʼakoba ati, abantu bʼomulembe ogwo bonabona babbaire bali nʼokufa ngʼaBaisirairi bakaali okwingira omu kyalo kidi ekisuubize. NʼoMusa yena onanyere yajeemeire oKibbumba era nandi ni bamwikirirya okwingira omu kyalo ekyo ekisuubize. Era newankubbaire ngʼabantu bajeemere, oKibbumba yeeyongeire okubakuuma. Abalabe bʼaBaisirairi bagulire omuboni omutaikirirya oBbalamu okulaama aBaisirairi, oKibbumba nʼamulungamya tete kubasabira nkabi (22–24).
Ebiri omu kitabo kinu omu bumpi:
1. Ensuula (1–10) mulimu amawono agakwata oku kubala aBaisirairi, nʼoku ntegeka yʼenkambi yaabwe, nʼemirimo gyʼabakabona, nʼebirabo ebyazwire mu buli kika owebabbaire bawonga ekyoto.
2. Ensuula (10–25) ni gitumula oku lugendo lwʼaBaisirairi okubita omwidungu.
3. Ensuula (26–36) gisonzola ebikwata oku kubala abantu okwokubiri nʼebyokulungamya ebindi ebyʼekyalo kyʼe Isirairi. Omwo mulimu amaliina gʼebifo aBaisirairi e gibateekere enkambi gyabwe owebabbeereire omu lugendo lwabwe okwaba omu kyalo ekisuubize, nʼengeri ebika bwabwe egibyabbaire nʼokugabanamu ekyalo ekyo nga bamalire okukituukamu.
1
Okubala aBaisirairi
1 Lumo aBaisirairi owebabbaire nga bazwire omu kyalo kyʼe Misiri, nga bali omwidungu lyʼe Sinaayi; oku lunaku olusooka omu mweri ogwokubiri, omu mwanka ogwokubiri okuzwa owebazwireyo, oMusengwa ngʼali omu Weemaye eyʼoKusisinkanirangamu nʼayeta oMusa nʼamukoba ati,
2 “Mubale ekibbula kyonakyona ekyʼaBaisirairi, okusinzirira oku miryango gyabwe nʼebisito byabwe. Muwandiike amaliina gʼabasaiza bonabona moiza ku moiza.
3 Iwe nʼAlooni mwabala abasaiza bonabona omwIsirairi kibinja ku kibinja, abʼemyanka aabiri nʼokukirawo era abeezya okwaba omu lutalo.
4 Mu buli kika mwazwamu omusaiza moiza eyababbeera, era nga niiye akulira abʼomulyango gwabwe.”
5 “Era ganu niigo amaliina gʼabasaiza abababbeeraku:”
“Omu kika kya Lubbeeni, Erizuuli omutaane wa Sedewuli;
6 “nʼomu kika kya Simyoni, Syerumiyeeri omutaane wa Zulisyadayi;
7 “nʼomu kika kya Yuda, Nakusoni omutaane wʼAminadabbu;
8 “nʼomu kika kya Isakaali, Nasaneeri omutaane wa Zuwali;
9 “nʼomu kika kya Zebbulooni, Eryabbu omutaane wa Keroni;
10 “nʼomu baana ba Yusufu,
“ekikoba kiti, omu kika kyʼEfulaimu, Erisaama omutaane wʼAmikudi.
“Omu kika kya Manase, Gamalyeri omutaane wa Pedakuzuli;
11 “nʼomu kika kya Bbenyamini, Abbidaani omutaane wa Gidyoni;
12 “nʼomu kika kya Daani, Akiyezeri omutaane wʼAmisyadayi;
13 “nʼomu kika kyʼAseri, Pagiyeeri omutaane wʼOkulani;
14 “nʼomu kika kya Gaadi, Eriyasaafu omutaane wa Deweri;
15 “nʼomu kika kya Nafutaali, Akira omutaane wʼEnani.”
16 Aabo niibo abasaiza abebalonderemu okuzwa omu kibbula kyonakyona ekyʼaBaisirairi, ibo ababbaire abafugi omu bika byʼabazeiza baabwe, era abeekubbemberi bʼenkumi nʼenkumi abʼomu bika bya Isirairi.
17 Awo oMusa nʼAlooni ni beeta abantu abo abebabbutwire amaliina,
18 era oku lunaku olusooka omu mweri ogwokubiri ni bakumbaania ekibbula kyonakyona aamo, ni babawandiika moiza ku moiza, abantu abʼemyanka aabiri nʼokukirawo nga basinzirira oku miryango gyabwe nʼebisito byabwe,
19 ngʼoMusengwa oweyalagiire oMusa. Kale oMusa atyo nʼabala abantu nga bali omwidungu lyʼe Sinaayi.
20 Abʼomu kika kya Lubbeeni, omubere wa Isirairi mwabbairemu baanu:
Abasaiza bonabona abʼemyanka 20 nʼokukirawo ababbaire beezya okwaba omu lutalo, ni babawandiika amaliina gaabwe, ni bababala moiza ku moiza, okusinzirira oku miryango gyabwe nʼebisito byabwe.
21 Abʼomu kika kya Lubbeeni, babbaire 46,500.
22 Abʼomu kika kya Simyoni mwabbairemu baanu:
Abasaiza bonabona abʼemyanka 20 nʼokukirawo bonabona ababbaire beezya okwaba omu lutalo, ni babawandiika amaliina gaabwe, ni bababala moiza ku moiza, okusinzirira oku miryango gyabwe nʼebisito byabwe.
23 Abo abebabalire, omu kika kya Simyoni, babbaire 59,300.
24 Abʼomu kika kya Gaadi mwabbairemu baanu:
Abasaiza bonabona abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
25 Abo abebabalire omu kika ekyo ekya Gaadi, babbaire 45,650.
26 Abʼomu kika kya Yuda mwabbairemu baanu:
Abasaiza bonabona abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe ni bababala moiza ku moiza okusinzirira oku miryango gyabwe nʼebisito byabwe.
27 Abo abebabalire, omu kika ekyo ekya Yuda, babbaire 74,600.
28 Abʼomu kika kya Isakaali mwabbairemu baanu:
Abasaiza bonabona abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
29 Abo abebabalire, omu kika ekyo ekya Isakaali, babbaire 54,400.
30 Abʼomu kika kya Zebbulooni mwabbairemu baanu:
Abasaiza bonabona abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
31 Abo abebabalire, omu kika ekyo ekya Zebbulooni, babbaire 57,400.
32 Okuzwa omu mulyango gwa Yusufu:
Abʼomu kika kyʼEfulaimu mwabbairemu baanu:
Abasaiza bonabona abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
33 Abo abebabalire, omu kika ekyo ekyʼEfulaimu, babbaire 40,500.
34 Abʼomu kika kya Manase mwabbairemu baanu:
Abasaiza bonabona ababbaire abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
35 Abo abebabalire, omu kika ekyo ekya Manase, babbaire 32,200.
36 Abʼomu kika kya Bbenyamini mwabbairemu baanu:
Abasaiza bonabona ababbaire abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
37 Abo abebabalire, omu kika ekyo ekya Bbenyamini, babbaire 35,400.
38 Abʼomu kika kya Daani mwabbairemu baanu:
Abasaiza bonabona ababbaire abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
39 Abo abebabalire, omu kika ekyo ekya Daani, babbaire 62,700.
40 Abʼomu kika kyʼAseri mwabbairemu baanu:
Abasaiza bonabona ababbaire abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
41 Abo abebabalire, omu kika ekyo ekyʼAseri, babbaire 41,500.
42 Abʼomu kika kya Nafutaali mwabbairemu baanu:
Abasaiza bonabona ababbaire abʼemyanka 20 nʼokukirawo, abeezya okwaba omu lutalo, ni babawandiika amaliina gaabwe, ni bababala moiza ku moiza okusinzirira oku miryango gyabwe nʼebisito byabwe.
43 Abo abebabalire omu kika ekyo ekya Nafutaali, babbaire 53,400.
44 Abo niibo abasaiza oMusa nʼAlooni nʼabafugi eikumi na babiri aba Isirairi abebabalire, nabuli moiza ngʼakiikirira omulyango gwabwe.
45 ABaisirairi bonabona abʼemyanka 20 nʼokukirawo, abeezya okwaba omu lutalo ni bababala okusinzirira oku miryango gyabwe.
46 Abo bonabona abebabalire babbaire 603,550.
47 Neye ibo aBaleevi, tibababaliire aamo nʼabʼebika ebindi,
48 olwʼokubba oMusengwa yabbaire akobere oMusa ati,
49 “Abʼekika kya Leevi tiwababala, era obungi bwabwe tiwabugaita oku bwʼaBaisirairi abanaabwe.
50 Wazira aBaleevi obawe mulimo gwʼokulabiriranga Weema ya Musengwa, era nʼokulabiriranga bintu byonabyona ebyamu. Bagisetulanga nʼebintu byayo byonabyona, era niibo abagirabiriranga, era bagyeruguuliriryanga.
51 Nabuli owemwabbanga musengula eWeema eyo, aBaleevi niibo abagisengulanga era niibo abagikomekanga. Atali Muleevi eyagiigererangaku, bamwitanga bwiti.
52 ABaisirairi abandi, bakomekanga eweema egyabwe, nabuli moiza omu nkambiye, ebbendera yaabwe e gyeri.
53 Neye aBaleevi bakomekanga eweema egyabwe okweruguulirirya eWeema eya Musengwa, kaisi obulwa bwange nandi butuuka oku kibbula kyonakyona ekyʼaBaisirairi. Era aBaleevi niibo abaabbanga nʼobuvunaanyizibwa okulabiriranga eWeema eya Musengwa.”
54 Batyo aBaisirairi ni bakola byonabyona ngʼoMusengwa oweyalagiire oMusa.