34
Ensalo yʼekyalo oMusengwa ekiyawaire aBaisirairi
1 OMusengwa nʼakoba oMusa
2 alagire aBaisirairi ngʼabakoba ati, “Owemwatuuka omu kyalo kyʼe Kanani, ikyo ekyalo ekinabawa okubba omuwuluko gwanywe kyabba nʼensalo eti:”
3 “Ensalo yaanywe oku lubba lwʼe maserengeta yatwaliryakuuku eIdungu lyʼe Ziini, okusalagana nʼekitundu kyʼEdomu. Oku lubba lwʼe buzwaisana, ensalo yaanywe e maserengeta, yatandiikira oku Nyanza eya Cumbi e gyekoma.
4 Awo yasalamu amaserengeta gʼolusozi oSikopyoni Paasi, ni yeeyongerayo nʼetuuka oku Ziini, yasimba e maserengeta wʼekibuga oKadesi Bbaluneya. Awo yasimba omu kibuga oKazali Adali, ni yeeyongerayo paka Azumoni.
5 Eeyo omwAzumoni, yageda nʼerungama oku Mwiga gwʼe Misiri, nʼekoma oku Nyanza oMeditereniani.”
6 “Ensalo yaanywe eyʼoku lubba lwʼe bugwaisana, yaabba Nyanza oMeditereniani.”
7 “Eeyo oku lubba lwʼe mambuka yazwera oku Nyanza oMeditereniani nʼeyaba paka oku Lusozi oKoli,
8 era nʼezwera oku Lusozi oKoli, nʼeyaba paka Lebbo Kamasi, kaisi okuzwera aawo nʼeyaba e Zedadi.
9 Awo ensalo ni yeeyongera paka e Zifulooni, nʼekoma e Kazali Enani. Eyo niiyo eyaabba ensalo yaanywe oku lubba lwʼe mambuka.”
10 “Iyo ensalo yaanywe eyʼoku lubba lwʼe buzwaisana, yazwera e Kazali Enani nʼeyaba e Sefamu.
11 Ensalo eyo yaserengeta okuzwera e Sefamu nʼeikirira e Libbula, oku lubba lwʼe buzwaisana bwʼAyini, yeeyongerayo ngʼebita oku mbale mbale wʼe buzwaisana bwʼeNyanza yʼe Kiinereesi.
12 Awo ensalo eyo yeeyongera nʼesengereta ngʼesenja oMwiga oYoludaani, nʼekoma oku Nyanza eya Cumbi.”
“Ekyo niikyo ekyabba ekyalo kyanywe nʼensalo yaakyo eyʼoku mba gyonagyona.”
13 Awo oMusa nʼalagira aBaisirairi ngʼakoba ati, “Ekyo niikyo ekyalo ekimwagabana na kukubba kalulu. OMusengwa alagiire ati niikyo ekibali nʼokuwa ebika omwenda nʼekitundu.
14 Ekyo kityo olwʼokubba aBʼekika kya Lubbeeni nʼekya Gaadi, nʼekimo ekyokubiri ekyʼaBʼekika kya Manase, bamalire ira okusuna emiwuluko egyabwe.
15 Ebika ebyo ebibiri nʼekitundu, byamalire ira okusuna emiwuluko egyabwe oku lubbba lwʼe buzwaisana bwʼoMwiga oYoludaani, okumpi nʼekibuga oYeriko.”
ABeekubbemberi abali nʼokugabula aBaisirairi emiwuluko
16 Awo oMusengwa nʼakoba oMusa ati,
17 “Ganu niigo amaliina gʼabantu abali nʼokugabuliramu aBaisirairi emiwuluko: Eryezaali okabona, nʼoYoswa omutaane wa Nuuni.
18 Era balonda omwekubbemberi okuzwa mu buli kika okubabbeeraku, okugabulyagamu ekyalo ekyo.
19 Ganu niigo amaliina gʼabeekubbemberi abo:”
“OKalebbu omutaane wa Yefune
owʼomu kika kya Yuda;”
20 “nʼoSyemwiri omutaane wʼAmiikudi,
owʼomu kika kya Simyoni;”
21 “nʼEridaadi omutaane wa Kisuloni,
owʼomu kika kya Bbenyamini;”
22 “nʼoBbuuki omufugi, omutaane wa Yoguli,
owʼomu kika kya Daani;”
23 “nʼoKaniyeeri omufugi omutaane wʼEfodi,
owʼomu kika kya Manase omutaane wa Yusufu;”
24 “nʼoKemwiri omufugi, omutaane wa Sifutaani
owʼomu kika kyʼEfulaimu omutaane wa Yusufu;”
25 “nʼErizefaani omufugi, omutaane wa Palunaki,
owʼomu kika kya Zebbulooni;”
26 “nʼoPalutiyeeri omufugi, omutaane wʼAzaani
owʼomu kika kya Isakaali;”
27 “nʼAkikudi omufugi, omutaane wa Seromi,
owʼomu kika kyʼAseri;”
28 “nʼoPedekeri omufugi, omutaane wʼAmiikudi,
owʼomu kika kya Nafutaali.”
29 Abo niibo abantu oMusengwa abeyalagiire okugabulira aBaisirairi emiwuluko omu kyalo kyʼe Kanani.