6
Akabbikabbi akʼokwemerera omuntu
1 Mwana wange, owooyemereranga omuntu ogwotamaite,
nʼobba muyimawe eeri omwinawo,
2 obba weesibire olwʼebibono ebyotumwire,
ngʼebibono ebyo bikuleeteire okwesiba.
3 Awo mwana wange, okolanga kiinu okweramya,
olwʼokubba obba ogwire omu bwezye bwʼomwinawo.
Oyabanga egyali ni weewombeeka,
ni wamwegairira akulingemu.
4 Kale toganyanga nʼogona endoolo,
waire kuwongera.
5 Weeramyanga ooti kimaadu airuka okuzwa omu ngalo gyʼomuyiigi,
era ooti nyonyi awunuka omutego gwʼomutegi.
Okwewala obugayaali
6 Iwe omugayaali, oyegere oku nkababe,
weetegereze enkola yaagyo era olabuke.
7 Tigibba nʼagikubbembera,
waire okalabaalaba, ooba omufugi,
8 neye gyebisira ebyokulya okweisana,
gyesoloojerya ebyokulya omu makungula.
9 Iwe omugayaali, waligona kutuuca di?
Waliramuka di okuzwa omu ndoolo?
10 Okugonaku katono, nʼowungulyaku akatono,
nʼoleraku engalo owuumuleku akatono,
11 obudoobi bwalikulumba ooti mutemo
nʼobwetaavu ooti mukondo aali nʼekyokulwanisya.
12 Omuntu atagasa, era omubbimubbi
ayaba ngʼasasya bubbeyi.
13 Akiika amaiso,
nʼaseesya ebigere,
nʼagerya nʼengalogye.
14 Omu nseegaye encaamu, ategeka kukola bibbibibbi,
bulijo asiga byʼobucaawi.
15 Nʼolwekyo akabbikabbi kalimugwerenkerera.
Omu kaseera-buseera balimunialula amantalama.
16 Waliwo ebintu mukaaga oMusengwa ebyacaawa,
musanvu abyomuliko egyali:
17 Embonia eyʼamalala,
entumula eyʼobubbeyi,
engalo egisuka omusaaye gwʼabanambulaku omusango;
18 omwoyo oguseega okukola obubbibubbi
ebigere ebyanguwa okukola obucaamu;
19 omujulizi owʼobubbeyi atumulyaga ebyʼobubbeyi,
nʼomuntu asiga ebyʼobucaawi omu bainaye.
Okwewala obulendi
20 Mwana wange, ogonderenge ebiragiro bya iteewo,
era tiwalekanga omaawo ebyakwegesya.
21 Obikuumirenge omu mwoyogwo bulijo,
tiwabirekanga, byeragenge ooti kizwalo kyʼomu mamiro ekyozwaire.
22 Byakulungamyanga ngʼotambula.
Byakukuumanga ngʼogonere,
byakulaabbiranga ngʼolamukire.
23 Ekyo kityo olwʼokubba ebiragiro ebyo, itaala,
okwegesya okwo, kitangaala,
era bigolola abantu,
niibyo enzira eyaba omu bwomi.
24 Ebyo byakukuumanga eeri omukali omulendi,
nʼeeri akalimi akasikiriza akʼomukali wʼamaiso amangu mangu.
25 Tiwegombanga obusiipoonobwe omu mwoyogwo,
waire okuganya amaisoge okukusikiriza.
26 Ekyo kityo olwʼokubba omukali omalaaya akunooniaku mpiiya egigula kyokulya;
era omukali omulendi, anoonia kujigirica bwomibwo.
27 Omuntu ayezya okukwatira omusyo omu kifubbakye,
ekizwalokye ekyazwaire nandi kiya?
28 Ooba omuntu ayezya okwema oku makala gʼomusyo,
ebigerebye nandi bibabuka?
29 Kityo wekibba eeri omuntu eyeegaita nʼomuka mwinaye;
nabuli akikola, tiyaliwunuka okumubonereza.
30 Abantu tibanyooma omwibbi owaabba aibbire
kweramya nzala,
31 ate ngʼowebamukwata, ateekwa okusasulamu emirundi musanvu,
waire nga kimutwalaku nabuli kyali nakyo omu kisitokye.
32 Iye oyo ayenda nʼomukali wʼabananyere, abba adamba okutegeera;
nabuli akikola, ajikirica obwomibwe.
33 Balimunyooma era ni bamukubba,
era okuswalakwe tikwalimuzwaku,
34 olwʼokubba eibuba lireetera omusaiza omufumbo okwirya obulwa olwʼomukaliwe
nandi nʼabba nʼekisa nga yeesasuza.
35 Tiyaliikiriryaku omugaito gwonagwona,
yaligaana okumuliyira nʼowekwalibba kwʼemirundi nʼemirundi.