109
Eeri akubbembera abembi. EZabbuli ya Dawudi.
Okwezuluguma kwʼomuntu ali omu bugosi
1 Oo Kibbumba, iwe ogumpuuja,
tiwasirika-busiriki,
2 olwʼokubba abantu ababbibabbi era ababbeyi bankotoogerera;
bantumulaku ebibono ebyobubbeeyi.
3 Bansukumulaku ebibono byʼobucaawi;
bannumba anambula nsonga.
4 Nze okubataka, bansasulamu mpalano,
neye nze neewaayo mu kusaba.
5 Omu kubakola okusani bansasulamu bibbibibbi,
owembalaga okutaka, ibo bansasulamu bucaawi.
6 Omuteekeku omuntu omubbimubbi amulamule,
oleke omulabewe niiye abbe amulumirize.
7 Owebamuwozesya, bagumusingisye,
era okusabakwe bakubale ngʼekibbikibbi.
8 Oleke ekiseera kyʼobwomibwe kibbe kitono;
oleke omuntu ogondi atwale ekifookye ekyʼobwekubbemberi.
9 Oleke abaanabe babbe bafuubbi,
era omukaliwe abbe namwandu.
10 Oleke abaanabe babbe balaaduuki abasabirirya;
oleke bababbingenge omu bisito byabwe ebifafaagani.
11 Oleke amubanza amuwambeku ebyalinabyo byonabyona;
oleke abaizaizana bamunyageku ebintubye byonabyona ebiyakolereire.
12 Oleke adambeku amukwatira ekisa,
ooba afaayo oku baanabe abafuubbi.
13 Oleke eibyairerye life liweewo,
era babbe nga tibakaali babeebukirya omu mulembe ogwaliiraku.
14 Oleke oMusengwa ayebukiryenge ebibbibibbi byʼabazeizabe;
era oleke ekibbikibbi kya maaye tiyakisoniya.
15 Oleke oMusengwa ayebukiryenge ebibbibibbi byabwe bulijo,
era abonere nakimo ati babeerabira oku kyalo.
16 Ekyo kityo olwʼokubba tiyaseegereku okukola ebyʼekisa,
wazira yayiigaanirye abadoobi,
nʼabadamba nʼabanyolere omu myoyo okubaita.
17 Iye yatakanga kulaama,
kale oleke ebiraamibye bimukangire;
ngʼowenandi nʼasiimanga okutakirya abantu enkabi,
kale oleke gimwesambe.
18 Yeeteekereku okulaama ni kubba kwa bulijo ooti kizwalokye;
kwamwingiire ooti maizi agaanywa ni gaingira omu mubiri,
kwamwingiire ooti kalifuwa oguyeesiiga nʼaingira omu magumba.
19 Aale oleke ebiraami bimwevambiryeku ooti kizwalo ekyazwala,
bimwesibeku ooti musipi bulijo oguyeesiba.
20 Oleke ebyo bibbe niibyo empeera oMusengwa egyawa abalabe bange,
abo abantumulaku okubbikubbi.
21 Neye iwe, Kibbumba oMusengwa wange,
ombeere olwʼeriinalyo,
era onnunule olwʼobusa bwʼokutakakwo okutakoma.
22 Ekyo kityo olwʼokubba ndi mudoobi, era ndamba,
era ndi mukosefu omu mwoyo.
23 Natira okugotawo ooti kiiriirye kyeigulo ekigotawo mangu,
banfuumuula ngʼompunga owaafuumuula enzige.
24 Amazwi gange ganafuwire olwʼokutalya;
nnyondere era nsigaire magumba.
25 Nsuukire kizumi eeri abalabe bange;
owebambona, batengeetya mitwe olwʼokunduula.
26 Oo Musengwa, iwe oKibbumba wange ombeere,
onnunule olwʼokutakakwo okutakoma.
27 Oleke bamanye bati, obbaire niiwe,
bati iwe Musengwa niiwe okikolere.
28 Oleke ibo balaame, neye iwe ompe enkabi;
Oleke abanjiigaania baswale,
neye oganye nze omuweereryawo nsangaale.
29 Oleke abalabe bange baswale ino,
era oleke ensoni gibabbeeku ooti bazwaire bizwalo.
30 Neebalyanga ino oMusengwa nga mbutula;
namuwuujanga omu lukumbaana lwʼabantu olunene.
31 Ekyo kityo olwʼokubba alwanirira adamba,
okumununula eeri abo abamusalira ogwʼokufa.