135
Muwuuje oMusengwa
1 Muwuuje oMusengwa!
Muwuuje eriina lya Musengwa,
mumuwuuje, inywe abaweererya ba Musengwa,
2 inywe abaweererya omu nyumba ya Musengwa
omu luuga lwʼenyumba ya Kibbumba waiswe.
3 Muwuuje oMusengwa olwʼokubba iye oMusengwa musa.
Mwembe nga muwuuja eriinalye olwʼokubba ekyo kyʼeisangaalo.
4 Ekyo kityo olwʼokubba oMusengwa yalondere oYaakobbo okubba wuwe,
abantu ba Isirairi okubba babe kububwe.
5 Mmaite ngʼoMusengwa mukulu,
oMusengwa waiswe mukulu okukiraku abakibbumba abandi bonabona.
6 OMusengwa nabuli ekyataka akikola
omwigulu era nʼoku kyalo,
omu nyanza nʼomu njabi gyagyo.
7 Niiye asetula ebireri bya ikendi okuzwa ekyalo e gikikoma;
niiye aleetera oikendi okumesya,
nʼawulucaayo ompunga omu bifo omwamukuumira.
8 Niiye eyaitire ebibere byʼe Misiri,
ebibere ebyʼabantu nʼebyʼebisolo.
9 Niiye eyakusindikiremu obumanyiciryo wʼebyewunyo nʼebyamagero iwe Misiri,
okubonereza oFalaawo nʼabakungube bonabona.
10 Niiye eyajigiricirye amawanga amangi, era
nʼaita abakabaka abʼamaani banu:
11 OSikoni okabaka wʼaBamooli,
nʼOgi okabaka wʼe Bbasani,
nʼabakabaka bonabona abʼe Kanani.
12 Ekyalo kyabwe nʼakiwaayo ngʼobusika,
ibwo obusika bwʼabantube aBaisirairi.
13 Oo Musengwa, eriinalyo libbeerererawo emirembe gyonagyona.
Oo Musengwa, bakwebukiryanga emirembe nʼemirembe.
14 Ekyo kityo olwʼokubba oMusengwa yalangiriranga ngʼabantube owebabulaku omusango,
era yakwatiranga abaweereryabe ekisa.
15 Ebifaananyi ebyʼokusinza ebyʼabakibbumba abʼabanamawanga bya feeza na zaabbu,
abantu ebibeekolera na ngalo.
16 Biri nʼeminwa, neye tibitumula;
biri nʼamaiso, neye tibibona.
17 Biri nʼamatwi, neye tibiwulira,
era tibiyeera.
18 Abo ababikola basuuka ooti niibyo,
era bonabona ababyesiga babba ooti niibyo.
19 Inywe abʼenyumba ya Isirairi, muwuuje oMusengwa.
Inywe abʼenyumba yʼAlooni, muwuuje oMusengwa.
20 Inywe abʼenyumba ya Leevi, muwuuje oMusengwa.
Nywenanywena abatya oMusengwa, mumuwuuje.
21 Bawuuje oMusengwa omu Sayuuni, iye oyo abba omu Yerusaalemi.
Muwuuje oMusengwa!