46
Eeri akubbembera abembi. EZabbuli yʼabʼeibyaire lya Koola.
OKibbumba ali na iswe
1 OKibbumba niiye ekiirukiro kyaiswe era niiye amaani gaiswe,
bulijo abbaawo okutubbeera omu bugosi.
2 Nʼolwekyo titwatyenge waire ekyalo kyatengeetanga,
nʼensozi ni gyemuma omu lwabi lwʼenyanza;
3 waire amaizi gʼenyanza gawooganga ni gafuuja,
waire ensozi gyatengeetanga olwʼokwedumbya kwʼamaizi ago.
4 Waliwo omwiga, ngʼemyala gyagwo gireeta eisangaalo omu kibuga kya Kibbumba,
ikyo ekifo ekitukulye, oNambulaku aMwagaagana e gyabba.
5 OKibbumba abba mu kibuga ekyo, kale tibalikijigirica,
oKibbumba Yakirwaniriranga ngʼobwire bwatira okuca.
6 OKibbumba atumula nʼeigono eryata amatwi ooti kubbwatuka kwʼeraadu,
amawanga ni geesisiwala, obwakabaka ni bugwa, ekyalo ni kinyolokoka.
7 OMusengwa oWabwezye Bwonabwona ali na iswe.
OKibbumba wa Yaakobbo niiye ekiirukiro kyaiswe.
8 Mwize mubone oMusengwa ebyakola,
mubone ebyewuunyisya ebyakola oku kyalo.
9 Akomya entalo omu kyalo kyonakyona.
Avunavunamu obulaso, nʼajigirica amasimo,
nʼayoca engabo nʼomusyo.
10 Nʼakoba ati, “Mwikaikane!
Mumanye muti ninze oKibbumba ogubagulumalyanga omu mawanga gonagona.
Gubagulumalyanga omu kyalo kyonakyona.”
11 OMusengwa oWabwezye Bwonabwona ali na iswe,
oKibbumba wa Yaakobbo niiye ekiirukiro kyaiswe.