EKITABO KYA
SAMWIRI
EKISOOKA
Enyanjula
EKitabo kya Samwiri eKisooka nʼeKyokubiri omu kusookesya kyabbaire kitabo kimo ekinene nga bakimaite ngʼekya “Samwiri.” Ekitabo kinu basookere kukigabulamu owebagaluciirye eBiwandiike ebyʼeNdagaano eNkaire okubitoola omu Lwebbulaniya okubiirya omu Luyonaani. Era ebitabo binu ebya Samwiri bitumula ku bwomi bwa Samwiri onaabbi, nʼoKabaka oSawulo, nʼoKabaka oDawudi.
OSamwiri yabbaire niiye omwekubbemberi asembayo omu biseera ekyalo kyʼe Isirairi owekyacuukiire okuzwa omu bufugi bwʼabalamuzi okwaba omu bufugi bwʼabakabaka. OSamwiri era niiye eyasukire amafuta oku Sawulo nʼoku Dawudi bombi okubba abakabaka. OSawulo nʼoDawudi niibo abakabaka ba Isirairi abasookere.
Ebitabo binu ebya Samwiri biwa ensonzola eyʼebyafaayo ebyʼekyalo kyʼe Isirairi omu biseera ebyo.
Mpaawo amaite omuntu eyawandiikire ekitabo kinu ekya Samwiri eKisooka. Omuwandiiki nandi ni yeebbutula omu biwandiike, neye ateekwa okubba nga yabbairewo ekitono eino, omu biseera bya kabaka oDawudi ooba amo omu biseera ebibitaku awo era ateekwa okubba nga yabbaire atuukirira ebiwandiiko ebindi ebikwata oku bwomi bwa Sawulo nʼoSamwiri.
Engeri egibyecaanamu:
1. Ensuula esooka paka ku yokusatu gitumula oku bubyale bwa naabbi Samwiri nʼokumwetakwe.
2. Ensuula eyokuna paka ku yomusanvu gisonzola engeri aBafirisuuti egibatoire eSanduuku ya Kibbumba oku Baisirairi era n’engeri egiyaleeteire ekyalo ky’aBafirisuuti okujigirika, eSanduuku eyo oweyabbaire nabo.
3. Ensuula yomunaana paka ku yeikumi na itaanu gitumula ekyabbairewo, aBaisirairi owebasabire basune okabaka era oSamwiri n’asuka amafuta oku Sawulo okubba okabaka asooka era n’oluzwanyuma engeri oMusengwa egiyagaine oSawulo.
4. Omu nsuula yeikumi na mukaaga paka ku 31 tusoma oku ngeri oSamwiri egiyasukire amafuta oku Dawudi okubba okabaka owokubiri owa Isirairi n’oku ngeri oSawulo okuzwa olwo egiyagezeryeku okwita oDawudi.
1
Erukaana nʼabʼomu nyumbaye
1 Wabbairewo omusaiza omu kibuga oLamasaimu Zufimu, omu kyalo kyʼEfulaimu ekyʼensozisozi nga bamweta bati Erukaana. Omusaiza oyo yabbaire mutaane wa Yerokaamu, oYerokaamu omutaane wʼEriku, Eriku omutaane wa Toku, oToku omutaane wa Zufu oMwefulaimu.
2 Erukaana yabbaire nʼabakali babiri, oKaana nʼoPenina. OPenina yabbaire mubyaire, neye oKaana iye yabbaire abula omwana.
3 Nabuli mwanka, Erukaana yazwanga omu kibuga kyʼe waabwe, nʼayaba e Siiro okusinza nʼokuwaayo esadaaka eeri oMusengwa oWabwezye Bwonabwona. Abataane bʼEri bombi, oKofuni nʼoFenekansi, niibo ababbaire abakabona ba Musengwa e Siiro.
4 Nabuli olunaku owerwatuukanga olwʼErukaana okuweeraku esadaaka, yaawanga omukaliwe oPenina omugabo era nʼawa nabuli moiza oku baanabe abaala nʼabaisuka emigabo gyabwe.
5 Neye nʼawanga oKaana emigabo mibiri olwʼokubba yamutakanga ino, waire ngʼoMusengwa yabbaire amwimire olubyalo.
6 Omwalikwawe yakolanga ebyamusunguwalyanga era ni bimunakuwalyanga ino, olwʼokubba oMusengwa yabbaire amwimire olubyalo.
7 Kityo wekyabbanga nabuli mwanka. Owebaabanga omu nyumba ya Musengwa, oPenina nʼasunguwalyanga oKaana. OKaana kyamuzwerangaku okukunga amaliga, nʼakaya nʼokulya.
8 Awo Erukaana oibaaye nʼamubuulyanga ati, “Kaana, niki ekigiranga nʼokunga era lwaki tolya? Lwaki omwoyogwo munakuwali? Nze tinkugasa okukiraku abaana abaisuka eikumi?”
OKaana asaba omwana
9 Lumo owebamalire okulya nʼokunywa nga bali omu Siiro, oKaana nʼasetuka. Omu kiseera ekyo, okabona Eri yabbaire atyaime oku ntebe okumpi nʼomulyango gwʼeYeekaalu ya Musengwa.
10 OKaana yabbaire munakuwali omu mwoyo. Nʼakunga ino ngʼasaba oMusengwa, era nʼamagalica ino amaliga.
11 Ni yeeyama ati, “Oo Musengwa oWabwezye Bwonabwona, owewandolaku nze omuweereryawo nʼobona okugada okundimu, nʼonjebukirya era nandi ni weneerabira, nʼompa omwana omwisuka, nalimukuwa enaku gyonagyona egyʼobwomibwe, era enziirigye tibaligimwangaku.”
12 Awo oKaana oweyeeyongeire okusaba oMusengwa, Eri ni yeekalikica omunwa gwa Kaana.
13 OKaana yabbaire asabira mu mwoyo, omunwa nga niigwo ogutengeeta, era eigonolye nga tiribbutuka. Eri kiyazwireku nʼaseega ati oKaana ateemeire.
14 Awo Eri nʼamukoba ati, “Walituuca di okuteemeeranga? Olekeraawo okunywanga omwenge gwʼemizabbibbu.”
15 Awo oKaana nʼamwiramu ati, “Musengwa wange tikityo, ndi mukali anakuwaire omu mwoyo. Tinnywire mwenge gwʼemizabbibbu, waire ekiteemeerya ekindi kyonakyona. Mbaire nnyanjulira Musengwa naku endi oku mwoyo.
16 Tiwaseega oti nze omuweereryawo ndi mukali omwonoonoki; mbaire nga ndi kusaba olwʼobulumi nʼenima ebimbitiriireku.”
17 Awo Eri nʼairamu ati, “Oyabe mirembe, era nsaba oKibbumba wa Isirairi akuwe ekyo ekyomusabire.”
18 OKaana nʼakoba ati, “Nsaba nti oleke nze omuweereryawo nsune obukoda egyoli.” Awo nʼakanga nʼalya, nandi nʼairayo okunakuwala.
Okubyala nʼokuwaayo oSamwiri
19 Awo eizo amakeezikeezi, Erukaana nʼabʼomu nyumbaye ni balamuka, ni basinza oMusengwa ni bakanga e Laama. Erukaana ni yeegaita nʼomukaliwe oKaana, oMusengwa nʼairamu okusaba kwa Kaana.
20 Era ekiseera owekyatuukire, oKaana nʼabba kida nʼabyala omwana mwisuka, nʼamuwa eriina ati Samwiri, ngʼakoba ati, “Olwʼokubba namusabire Musengwa.”
21 Awo omusaiza oyo Erukaana nʼayaba tete nʼabʼenyumbaye okuwaayo esadaaka eya buli mwanka eeri oMusengwa, era nʼokutuukirirya ekiyeeyamire.
22 Neye oKaana iye nandi nʼayaba nabo, olwʼokubba yakobere oibaaye ati, “Nze nʼoSamwiri titwalyaba paka nga mmuzirisirye, kaisi mmutwale omumaiso ga Musengwa, era mmuleke abbenge eeyo e Siiro enaku gyonagyona egyʼobwomibwe.”
23 Erukaana oibaaye, nʼamukoba ati, “Okole ekyobona nga niikyo ekikiraku obusa, osigale aanu paka owewalimuzirisya; kyonkani ekinsaba oMusengwa, nti akubbeere okutuukirirya ekibonokyo.” Awo oKaana nʼasigala e ika. Nʼayonkesya omwana oyo paka oweyamuzirisirye.
24 Oweyamuzirisirye, nʼamutwala nga mutomuto atyo e Siiro omu nyumba ya Musengwa. Yamutwaire aamo nʼokitobba wa nte owʼemyanka emisatu, nʼekiro ooti aabiri egyʼengaano, nʼekisawo kyʼeidiba ekiizwire enviinyo.
25 Owebamalire okusadaaka onte oyo, ni batwala omwana egiri Eri,
26 era oKaana nʼamukoba ati, “Mazima ngʼobwoli omwomi musengwa wange, ninze omukali eyayemereire aanu omumaisogo, nga nsaba oMusengwa.
27 Oonu niiye omwana ogunasabire oMusengwa, era yawuliire okusaba kwange, nʼamumpa.
28 Kale zena atyanu mmuwaayo eeri oMusengwa era omu bwomibwe bwonabwona aweererye Musengwa.” Awo nʼasinzira eeyo oMusengwa.