EKITABO KYA
SAMWIRI
EKYOKUBIRI
Enyanjula
Ebiri omu kitabo kinu omu bumpi:
1. Ensuula esooka paka ku yokutaanu gisonzola engeri oDawudi egiyasuukire okabaka wa Yuda era n’oluzwanyuma ng’okabaka wa Isirairi yonayona
2. Ensuula yomukaaga paka ku yeikumi gitumula oku ngeri oDawudi egiyafugiire ng’okabaka era n’awangula abalabebe bangi
3. Omu nsuula eyeikumi na moiza n’eyeikumi na ibiri tusoma oku ngeri oDawudi egiyakolere obwenzi era n’obutemo era n’engeri onaabbi Nasani egiyamukaawuukiiremu
4. Ensuula yeikumi na isatu paka ku yʼaabiri gitumula oku bwediimo bubiri obwakanisya oDawudi
5. Ensuula (21–24) gimaliirirya nga giriku n’ebintu egigitumula oku kufuga kwa Dawudi ng’okabaka.
1
ODawudi asuna amawuliro gʼokufa kwa Sawulo
1 Atyanu oSawulo oweyafiire, oDawudi nʼakanga e Zikulaga ngʼamalire okuwangula aBamereki era nʼabbaayo enaku ibiri.
2 Oku lunaku lwokusatu ni wabbaawo omusaiza eyatuukireyo e Zikulaga, ngʼazwa omu nkambi ya Sawulo, ngʼanyiirire ebizwalobye era nga yeesukire eitakali omu mutwe okulaga okunakuwala. Nʼayaba eeri oDawudi, nʼaika ni yeeyala ansi okwitakali okumuwa ekitiisya.
3 ODawudi nʼamubuulya ati, “Ozwa yaina?”
Iye nʼamwiramu ati, “Nsodokere mu nkambi bwa Baisirairi.”
4 Tete oDawudi nʼamubuulya ati, “Onkobere bibbaire bitya.” Nʼamwiramu ati, “Amaje gʼaBaisirairi gairukire omu lutalo era bangi kwibo babaitire. OSawulo nʼomutaane oYonasani bona bafiire.”
5 Awo oDawudi nʼabuulya omusaiza nago ati, “Otegeire otya ngʼoSawulo nʼomutaane oYonasani bafiire?”
6 Iye nʼamwiramu ati, “Nabbaire oku lusozi oGirubbowa ni mbona oSawulo ngʼayemereire yeekwaite okwisimolye. Era ni mbona abalabe abʼoku bigaali ebyʼamaje, nʼabʼoku mbalaasi nga bamwigereireku.
7 Awo oweyacuukire nʼambona, nʼanjeta, ni njetuka nti, waitu.”
8 Nʼambuulya ati, “Oli wʼeigwangaki?” Ni mmwiramu nti, “Ndi Mwamereki.”
9 Kaisi nʼankoba ati, “Nkusaba oize aanu onjite. Ndi omu bulumi wʼamaani newankubbaire nga nkaali mwomi.”
10 “Awo ni njaba e gyali ni mmwita, olwʼokubba nategereire nakimo nti oweyaagwa tiyasigale nga mwomi. Ni mmutoolaku engule oku mutwe nʼomukobyo gwa bbulonzi oku ngalo, era musengwa mbinu mbireetere egyoli.”
11 ODawudi nʼanyiira ebizwalobye olwʼenima, nʼabalwanibe bonabona ni bakola batyo.
12 Ni banakuwala, ni bakunga oSawulo nʼomutaane oYonasani, nʼamaje ga Musengwa nʼabaana aBaisirairi abebaitiire omu lutalo olwo. Nandi ni balya olunaku lwonalwona paka igulo.
13 ODawudi nʼabuulya omusaiza odi eyamuleeteire amawuliro ago ati, “Iwe ozwera yaina?”
Nʼamwiramu ati, “Ndi mwana wʼomusenze oMwamereki.”
14 Tete oDawudi nʼamubuulya ati, “Oyinza otya okutatya okujigirica obwomi bwʼoyo oMusengwa oguyasukireku amafuta?”
15 Awo oDawudi nʼayeta omoiza oku balwanibe, nʼamukoba ati, “Omwite!” Kale nʼakubba oMwamereki, nʼamwita.
16 Ekyo kyabbaire kityo olwʼokubba oDawudi yabbaire akobere oMwamereki ati, “Omusango gubbe ku niiwe onanyere. Niiwe onanyere ogwesingisirye owookobere oti, ‘Ninze njitire oyo oMusengwa oguyasukireku amafuta.’ ”
ODawudi akunga oSawulo nʼoYonasani
17 Awo oDawudi nʼayemba olwembo olwʼokukunga oSawulo nʼomutaane oYonasani,
18 era nʼalagira beegesye abantu abʼomu Buyudaaya olwembo olwo olukwata oku kalaso, olubawandiikire omu kitabo kya Yasali.
19 “Oo Isirairi, ababbaire bakuweesya ekitiisya babaitiire oku nsozigyo!
Nga kibbikibbi ino nti abʼamaani abo bafiire!
20 Timwakitumulaku omu kibuga oGaasi,
era timwakirangirira omu nguudo gyʼekibuga Asukeroni,
demba aBafirisuuti abʼomu bibuga ebyo ni basangaala,
demba aBafirisuuti abo abatali bakomole, ni bajaagaana.
21 “Inywe ensozi gyʼe Girubbowa,
nsaba nti oikendi tiyabagwangaku waire olume,
kadi okubbaaku emisiri egibakungulamu ebibawaayo ebyʼempeke.
Kityo olwʼokubba eeyo niiyo engabo gyʼabazira e gibagyonooneire,
engabo ya Sawulo, tibakaali bagisiigaku amafuta.
22 Akalaso ka Yonasani kabbaire kʼamaani,
nʼempiima ya Sawulo yakolere omulimo ogwayo ogwʼamaani.
Byonabyona byasukire omusaaye gwʼabalabe baabwe
era byasumutire emibiri gyʼabazira abʼamaani.”
23 “OSawulo nʼoYonasani
babbaire batake ino nga basangaalya abantu bangi omu bwomi bwabwe,
babbaire aamo nga boomi era ni bafeera aamo.
Babbaire bangu okukiraku okokomi,
babbaire bʼamaani okukiraku empologoma.”
24 “Abakali aBaisirairi
mukunge oSawulo!
Eyabazwalisyanga ebizwalo ebitukuliikiriri era ebyʼebbeeyi,
eyajolijanga ebizwalo byanywe nʼamajolobero agʼezaabbu.”
25 “Nga kibbikibbi ino nti abalwani abʼamaani nago bafiire
babaitiire omu lutalo!
OYonasani alangaire bamwitiire oku nsozi gyanywe.
26 Nnjizwire enima oku lulwo, Yonasani muganda wange!
Nga mbaire nkutaka ino!
Okutaka okuwantakiremu,
kwabbaire kwenjawulo ino okukiraku okwʼabakali.”
27 “Nga kibbikibbi ino nti abalwani abʼamaani nago bafiire!
Ebyokulwanisya byabwe atyanu babirekere aawo.”