פרק ג
1 בַּעֲבוּר זֹאת אֵפוֹא אֲנִי פוֹלוֹס הִנְנִי אֲסִיר יֵשׁוּעַ הַמָּשִׁיחַ לְמַעַנְכֶם הַגּוֹיִם׃
2 הֲלֹא שְׁמַעְתֶּם כִּי נִתְּנָה לִּי פְקֻדָּתִי בְּחֶסֶד אֵל בַּעֲבוּרְכֶם׃
3 וְכִי הוֹדִיעַ לִי הַסּוֹד בַּמַּחֲזֶה כַּאֲשֶׁר כָּתַבְתִּי לְפָנִים בְּלָשׁוֹן קְצָרָה לֵאמֹר׃
4 אִם תִּקְרְאוּ דְבָרַי תּוּכְלוּ לְהַכִּיר כְּי הַדַּעַת אִתִּי בְּסוֹד הַמָּשִׁיחַ׃
5 אֲשֶׁר לֹא נוֹדַע לִבְנֵי אָדָם בְּדֹרוֹת מִקֶּדֶם כַּאֲשֶׁר נִגְלָה כַיּוֹם לִשְׁלִיחָיו הַקְּדֹשִׁים וְלִנְבִיאָיו עַל־פִּי הָרוּחַ׃
6 כִּי יִקְחוּ הַגּוֹיִם חֵלֶק גַּם־הֵם בְּנַחֲלָתוֹ לִהְיוֹת כְּאֵבָרִים בִּגְוִיָּתוֹ וַחֲבֵרִים לִפְנֵי יֵשׁוּעַ הַמָּשִׁיחַ לְקַבֵּל הַבְטָחָתוֹ עַל־פִּי הַבְּשׂרָה׃
7 אֲשֶׁר הָיִיתִי לָהּ לִמְשָׁרֵת בְּמַתְּנַת חֶסֶד אֱלֹהִים אֲשֶׁר נָתַן לִי לְפִי פְּעֻלַּת גְּבוּרָתוֹ׃
8 אֲנִי הַצָּעִיר בַּצְּעִירִים בֵּין הַקְּדוֹשִׁים נָתוּן לִי הַחֶסֶד הַזֶּה לְבַשֵּׂר אֶל־הַגּוֹיִם חֹסֶן הַמָּשִׁיחַ כִּי־רַב הוּא לְאֵין חֵקֶר׃
9 וּלְהָאִיר עֵינֵי־כֹל לָדַעַת עֵרֶךְ הַסּוֹד אֲשֶׁר צָפוּן הָיָה מֵעוֹלָם בֵּאלֹהִים יוֹצֵר הַכֹּל עַל־יְדֵי יֵשׁוּעַ הַמָּשִׁיחַ׃
10 וּבָזֹאת יִוָּדַע עַל־פִּי הָעֵדָה לְרָאשֵׁי הַצָּבָא וּלְגִבֹּרֵי כֹחַ בַּמָּרוֹם נִפְלְאוֹת חָכְמַת אֱלֹהִים׃
11 כָּעֵצָה אֲשֶׁר יָעַץ מִקֶּדֶם בְּיֵשׁוּעַ הַמָּשִׁיחַ אֲדֹנֵינוּ׃
12 אֲשֶׁר בּוֹ נוֹסִיף אֹמֶץ לָגֶשֶׁת אֵלָיו בֶּאֱמוּנָתוֹ בְּלֵב נָכוֹן׃
13 עַל־כֵּן זֹאת אֲנִי מְבַקֵּשׁ אַל־נָא תִּתְעַטְּפוּ בְצָרוֹתַי אֲשֶׁר אֲפָפוּנִי לְמַעַנְכֶם כִּי זֹאת הִיא תִּפְאַרְתְּכֶם׃
14 עַל־כֵּן אֶכְרְעָה עַל בִּרְכָּי לִפְנֵי אָבִי אֲדוֹנֵינוּ יֵשׁוּעַ הַמָּשִׁיחַ׃
15 אֲשֶׁר נִקְרָא שְׁמוֹ עַל כָּל־צִבְאוֹתָיו בַּשָּׁמַיִם וּבָאָרֶץ׃
16 וְהוּא יִתֵּן לָכֶם כְּפִי־חֹסֶן כְּבוֹדוֹ לְהִתְאַזֵּר בִּגְבוּרָה עַל־פִּי רוּחוֹ בָּאָדָם הַפְּנִימִי׃
17 וְהַמָּשִׁיחַ יִשְׁכֹּן בְּקֶרֶב לִבְּכֶם בֶּאֱמוּנָה כִּי תַשְׁרִישׁוּ וְתִוָּסְדוּ בְּאַהֲבָה׃
18 אָז תּוּכְלוּ לְהַשְׂכִּיל עִם כָּל־הַקְּדוֹשִׁים מַה־הוּא הָרֹחַב וְהָאֹרֶךְ וְהַגֹּבַה וְהָעֹמֶק׃
19 וּלְהִתְבּוֹנֵן בְּאַהֲבַת הַמָּשִׁיחַ אֲשֶׁר מִדַּעַת נִשְׂגָּבָה עַד־אֲשֶׁר תִּמָּלְאוּ מִכָּל־מְלֹא הָאֱלֹהִים׃
20 וְהוּא אֲשֶׁר יָדָיו רַב לוֹ לְעוֹרֵר בַּכֹּחַ לִבֵּנוּ וְלַעֲשׂוֹת לָנוּ יֶתֶר עַל־כָּל־מִשְׁאֲלוֹתֵינוּ וּמַחְשְׁבוֹתֵינוּ׃
21 לוֹ הוּא הַכָּבוֹד בְּתוֹךְ הָעֵדָה וּבְיֵשׁוּעַ הַמָּשִׁיחַ מִדּוֹר לְדוֹר וּמֵהָעוֹלָם וְעַד־הָעוֹלָם אָמֵן׃