5
Oen nahu nal ikan mamo nini pukat
(Matius 4:18-22; Markus 1:16-20)
1 Oe mesan na, Yesus tui atuli las se tubu Galilea suut ta. Atuli hut mamo maas le hii Ama Lamtua in Teka-teka ngas. Oen dil dising apa didiin bua pukiu Yesus.
2 Dadani se na, atuil tasi deeh tao niu oen pukat ta se tuu ka. Kon Yesus ngat net lui blo dua se na.
3 Lui nas mesan na, Simun nena. Kon Yesus lako sake se Simun lui la, hidim nodan le hutun belen lui na lako el ui lihu ku bubuit. Un daad se lui na dapa le tui atuil hut mamo kas.
4 Tui hidi kon, Un aa nol Simun noan, “Simun! Keko laok bubuit el lihu kua, le nahu ku pukat ta se na. Ta mam mi haup ikan mamo.”
5 Mo Simun siut noan, “Tuang kon no! Kaim daek hiti-late duman mes tetema son, mo haup ikan mes lo kon! Mo undeng Tuang tadu ela ta, kaim muid tuun! Auk niung soba-naan pukat tia.”
6 Hidi nam Oen niung pukat ta. Nikit oen le noan pel sakeng pukat ta lam, taan lo molota muik ikan mamo isi inu pukat na son, didiin pukat ta le sait.
7 Kon Simun haman un tapan deng lui didang ngas le maa hulung one. Hidim oen dauk tamang ikan nas lakos se lui dua nas, didiin lui dua nas le meles tetetas undeng ikan inu.
8-10 Simun tapan atuil tasi kas, nol Yakobus duas Yuhanis, ama Sabadeus anan nas, se na kon. Oen herang isi nol oen in nal ikan mamo isi ela ka. Nikit Simun Petrus net in daid son na kon, un hai buku ka se Yesus sila ka, le tek noan, “Auk tao kula-sala mamo isi son. Tiata banan dui ka Tuang dani-dani nol auk pait bakun tia.”
Mo Yesus situn noan, “Simun! Nangan muun isi nol dais na deken, ta Auk le pake mia. Taom mi nuting ikan. Mo nol nia, Auk tui mi le laok nuting atuli, halin muid se Au.”
11 Nol na kon, oen pel nol oen lui las le laok pesang se tuu ka. Hidim oen nang soleng totoang nas, le lakos muid Yesus.
Lamtua Yesus tao banan atuling mesa, man tom iil baih-bluku
(Matius 8:1-4; Markus 1:40-45)
12 Se ingu mesa, Yesus tutnaal atuli mes man apa ka totoang inu nol iil baih-bluku. Nikit un ngat net Yesus kon, un lako hai buku ka nol bubu sila ka lako huud se dale ka. Hidim un tekan noan, “Papa boa-ili! Tulung auk le! Ta auk tana le Paap tao ilang nal auk ili lia, halin nam atuli las nikis auk bakun tia. Sadi Paap tade.”
13 Kon Yesus doong ima ka le kapas una. Hidim aa noan, “Auk tade! Tiata ku banan tia!” Aa hidi ela kon, atuling na in iil baih-bluku ka ilang meman.
14 Kon Yesus hid un meman noan, “Nangan babanan! Ku banan son mo boel tek asii deken ne! Ku musti muid upung Musa in prenta ka muna. Tiata lako se tulu agama lu le un tinang ku apam ma, halin un taan noan ku ili la ilang baktetebes son tam lo bii ka. Hidim ku musti bel nasar le daid taad in nodan mamo, halin atuli las totoang tana noan ku banan baktetebes son.”
15 Yesus kaing ela kon no, dehet deng Un in kuasa ka holhising deng baha laok baha, lako pes se ola-ola. Tiata atuli las taan in baa maa tutungus le hii Un in tui ngas. Hidim Un tao banan atuli mamo deng oen ili koed-ngasing ngas.
16 Mo Yesus kom in hoen apa ka deng atuil hut mamo kas, le lako kohe-kanas se maan atuli in ase.
Lamtua Yesus tao banan atuling hlukut-kait mesa
(Matius 9:1-8; Markus 2:1-12)
17 Oe mesan na, Yesus tui atuil se uma mesa. Dedeng na muik atuil deng partei agama Farisi nol guru agama at ila lo, maas muid kon le hii Yesus. Oen maas deng ingu-iung in se propinsi Galilea, propinsi Yudea, nol kota Yerusalem. Ama Lamtua Allah bel Yesus kuasa le tao banan atuil ili las.
18-19 Dedeng na, atuli at ila lo dohang atuil lukut-hkait mes se maan in dohang dapa. Oen nuting lalan mumuun le nol atuling lukut-hkait na laok bel Yesus, halin nam Un tao banan. Mo atuli las tep isi son se um na, didiin oen dising le taam kon bolen lo. Tiata oen kil sakeng atuling hlukut-kait ta lako uma dapa. Hidim oen sukun tihi la, le lolo niung atuling lukut-hkait ta se maan in dohang nga dapa. Oen niung un se atuil hut mamo kas hlala titu se Yesus sila ka.
20 Ngat net ela kon Yesus tana noan, oen parsai le Un tao banan nal oen tapan sa. Kon Un aa nol atuling lukut-hkait ta noan, “Ana! Auk kose soleng ku in kula-sala ngas son.”
21 Ming Yesus tek ela kon, atuil Farisi las nol guru-guru agama las keket apa noan, “Hoe! Suma Ama Lamtua Allah sii, man muik hak le kose soleng atuli li in kula-sala ngas. Lam Un nia mo asii le, didiin un tao apa ka banansila el Ama Lamtua Allah lia! Ni in bilu-aa talalun son!”
22 Mo Yesus taan oen dalen nas. Kon Un aa noan, “Tasao le mi nangan noan Auk in teka na bilu-aa kia?
23-24 Auk niam Atuling Baktetebes sa. Nol Auk muik hak le bel boa-blingin atuli li deng oen in kula-sala ngas. Eta Auk suma tek atuling hlukut-kait ni noan, ‘Auk bel ampong ku deng ku in kula-sala ngas son,’ lam mi net Auk in muik kuasa ne apan-kloma ki ki lo. Mo eta Auk tekan noan, ‘Hangu tia! Kat ku maan in dohang nga le pait tia,’ le eta un hangu nol na kon, halas-sam mi net Auk in kuasa ka. Undeng na le, Auk tade tao banan atuling hlukut-kait nia, halin nam mi tana noan Auk muik hak, le bel ampong atuli li deng oen in kula-sala ngas.”
Hidi nam Un bali le aa nol atuling hlukut-kait ta noan, “Haung dil tia! Nikit maan in dohang ku ka, le pait lako tia!”
25 Nahkiut tuun nam, atuling na hangu dil se atuil hut mamo kas silan, le nikit maan in dohang una ka. Hidim un pait lako nol in naka Ama Lamtua Allah.
26 Ngat net ela kon, atuli las totoang herang isi. Hidim oen nikit sakeng Ama Lamtua Allah ngala ka lapa-lapa noan, “Ama Lamtua nam ana lo koo, muun isi! Leol neot ni kit net dais man in muun isi dadi, nini kit matan beas esan!”
Lamtua Yesus haman Lewi le muid Una
(Matius 9:9-13; Markus 2:13-17)
27 Nesang lo kon, Yesus puti deng um na, kon Un ngat net atuil in sium bea ngas at mes daad se um in sium bea ka. Atuling na ngala Lewi. Kon Yesus nusi un noan, “Maa le muid Au!”
28 Ming ela kon, Lewi hangu meman le muid Yesus, nol lako nang soleng totoang in se na ngas.
29 Hidi nam, Lewi tao fesat tene mesa, le haep Yesus maa se un uma la. Un kon haep un tapan in sium bea ngas, nol haep atuil didang kon le maa muid fesat na.
30 Mo muik atuli deeh deng partei agama Farisi, nol guru agama las hmumemen le ahan Yesus ima-ii las noan, “Tasao le mi daad kaa nol atuil in tom lo ngas, banansila el atuil in sium bea nol atuil banan lo kas sia? Atuil banan ni niam boel buan nol atuil in ela ngas deken.”
31 Mo Yesus tekas elia, “Atuil in ili ngas meman parlu dokter. Mo atuil in banan son nas sam parlu lo.
32 Auk maang taung atuil in nataka apa ka tom son nas lo. Molam Auk maang taung atuil in tom lo ngas.”
Guru agama las kaen nol Lamtua Yesus deng in telang
(Matius 9:14-17; Markus 2:18-22)
33 Hidim atuil deng partei agama Farisi nol guru agama nas hmumemen le ahan Yesus kon noan, “Elia Papa! Yuhanis in Sarain Atuli ka ima-ii las telang, nol oen kon kohe-kanas tutungus. Atuil Farisi las ima-ii las kon ela. Mo taon elol le Paap ima-ii las taan in kaa-ninu tutungus sia? Oen taan in telang ngia tam lo ka?”
34 Mo Yesus situs nini kleta elia, “Meman mi tanan son le eta muik fesat in sapa kam, haep pas telang lo, molam oen totoang kaa didiin silis. Eta sapa-bikloben na bii nabael se la kam, taon elola ko oen totoang kaa leo-leo.
35 Mo mam oe mes le atuil didang daek lai-niin biklobeng in sapa ka le un tapan nas nangan nam susa, halas-sam oen telang.”
36 Hidi kon Yesus bel kleta mes pait elia, “Atuli li niam kat kitu balu tep mesa, le tapan laok se kaod blaan man in sait son na lo. Ta lo kam eta baes kaod na lam, kitu balu in tapan na naskumu, nol kaod blaan na kon sait taplaeng.
37-38 Ela kon, atuli sail tua balu laok se sapat pohen lo. Ta lo kam sapat ta hoen, kon tua ka baa soleng hidi. Tiata eta tua balu kam musti doan laok se sapat balu dalen. [Nini ela lam Yesus tui oen noan, Un in tui balu kas kutang nol atuil Farisi las in tui blaan nas deken.]
39 Atuil in niun net anggor uin blaan son na, kom in niun anggor uin balu lo, ta un tana noan, ‘Anggor uin in pesang blaan son na, man banan dui!’ ”