13
Lamtua Yesus tek meman deng Um in Kohe-kanas Tene ka in lea ka
(Matius 24:1-2; Lukas 21:5-6)
1 Hidi na kon, Yesus nol Un ima-ii las lakos nang soleng Um in Kohe-kanas Tene ka. Se oras oen in puit lakos sa, ima-ii las at mes tulu Um in Kohe-kanas sa, le tek noan, “Papa! Olan Paap ngat ti le! Um ni leko ana lo! Oen toed baut tene kias leko-leko!”
2 Mo Yesus situn noan, “Um ni meman leko ana lo! Mo nesang lo kam, oen tao lean nuli baut nias totoang.”
Tada-taad deng leol kiamat tia
(Matius 24:3-14; Lukas 21:7-19)
3 Hidi kon, Yesus nol atuil in muid Una ngas lakos se leten Saitun nua, le oen daad se maan in saol nol Um in Kohe-kanas Tene ka. Kon nam Un ima-ii las at aat maas, le oen siis nahdeh nol Una. Atuil at aat nas, Petrus, Yakobus, Yuhanis, nol Anderias.
4 Oen keket Un noan, “Papa! Olan tek ulang Paap in aa apin na le. Bling halas-sam dedeng na maa lisu la? Nol un tada-tada las elola la?”
5 Kon Yesus situs noan, “Sadi mi doh babanan le tom in nole-lilung deken.
6 Ta mam muik atuli mamo maas teh kalas, le tek noan, ‘Auk niam Kristus, Atuling man Ama Lamtua Allah tulu meman son deng lolo hmunan nua ka’. Hidim oen kon nole-lilung atuli mamo.
7 Eta mi net atuli hote-dait apa, tamlom mi ming dehet noan, muik in hote-dait apa ne ola-ola lam, lii deken. Ta in banansila ela ngas musti daid muna, mo leol kiamat ta maa lius lo bii.
8 Mam ngala mes hote-dait nol ngaal tenga las. Nusa mes kon hote-dait nol nusang tenga las. Muik lul-beko se ola-ola. Oras lubu ka kon muun isi! Nias totoang daid tada-taad banansila el bihata in tain iil le hua ka.
9 Tiata, mi musti doh babanan ne! Ta mam oen maa daek mi le pel nol mi lakom se maan in nehan dais agama ngas. Nol oen diku-puang mi se uma-um in kohe-kanas sas dalen. Hidim oen kon but mi le kil nol mi lakom se atuil in kil prenta ngas, undeng mi in muid Au kia. Mo mi pake dola na, le halin nahdeh oen deng Au.
10 Ta Ama Lamtua atulin nas musti laok tek Auk Dehet Dais Banan nia, bel totoang ngaal in ne apan-kloma ki ngias muna le, halas-sam leol kiamat ta maa.
11 Nangan noo! Eta oen but mi le kil nol mi lakom se maan in nehan dasi ngas sam, mi nangan le lii deken noan, ‘Hidim auk aa elola? Tamlom, auk siut elola?’ Ta eta un oras sa maa lius son nam, mi aa muid asa man Ama Lamtua Allah Koo Niu ka, in tek mia ka tukun.
12 Eta se um-elan mes dalen atuli mes parsai se Au lam, mam un kaak-palin nas esan nuting lalan le keo una. Nol eta ana mes parsai se Au lam, un ama ka esa man keo una. Ela kon, eta ina-ama deeh parsai se Au lam, mam oen anan nas esan man keo one.
13 Tiata mam atuli las kom mi lo isi, undeng mi in parsai se Au ka. Mo eta asii tahang nal deng nas totoang ngam, taon elol kon Ama Lamtua Allah bel boa-blingin una.”
Doh babanan, ta leol kiamat ta maa dani son!
(Matius 24:15-28; Lukas 21:20-24)
14 Yesus aa napiut noan, “Mam atuling in daat isi mes le maa. Un boel dil se maan in luli deng Ama Lamtua Allah Um in Kohe-kanas Tene ka lo, mo un lako dil se la, didiin tao hmomos maan na. Tiata Ama Lamtua Allah bali kudi nang soleng maan na. Eta mi ngat net ela son nam, doha-doha loo! (Asii man les nia lam, un kon musti doha-doha!) Ni daid tada noan, lelo-leol in susa ngas maas dadani son. Etan net ela son nam, atuil in ne propinsi Yudea ngas haung lalim lakom leten nuas tia.
15 Musti lail laba-laba, le halin tom in susa-daat tas deken. Eta muik in puti deng uma la son nam, boel pait laok kat sa-saa bakun tia.
16 Ela kon nol atuil in ne klapa la ngas, boel pait laok kat seman otot bakun na. Molam lail napiut tia!
17 In bosor dui ka, bihaat in behe ngas, nol ina-in man nusu tana-ana blutu mea ngas. Undeng oen lail nal hlapat lo.
18 Tiata banan dui ka, mi kohe-kanas le nodan halin leol in susa-daat nas, nahis tom oras oe-haat deken.
19 Ta leol nas sus isi! Kilan deng Ama Lamtua Allah in koet apan-kloma kia, maa lius halas nia, atuli ngat net in susa tuladang ela lo bii. Nol mam atuli kon ngat net in susa tuladang ela pait lo.
20 Eta Ama Lamtua tao dadaen lelo-leol in susa ngas lo kam, mam muik atuli mes lo kon man tahang nal le nuli. Mo undeng Ama Lamtua Allah namnau Un atulin man Un huil nal son nas, tiata Un tao lelo-leol in susa ngas dadaen tuun.
21 Eta leol nas maas lius son nam, mi ming atuli las aa noan, ‘Hoe, Kristus muik ne nia!’ Mo atuil tenga las tek noan, ‘Kristus muik ne nua!’ Mo mi boel hii oen deken!
22 Ta mam muik atuli in puit le teh kalas noan, ‘Auk niam Kristus!’ Atuil tenga las pait tek noan, ‘Auk niam, Ama Lamtua Allah mee-baha.’ Mam oen tao taad herang bili-ngala nini uikjale kas in kuasa ka, le nole-lilung atuli lia. Oen kon soba-naan le nole Ama Lamtua Allah atulin nas!
23 Mo mi musti doh babanan ne! Ta leol in susa ngas maa lius lo bii, mo Auk tek nuting mi meman son!”
Atuling Baktetebes sa in maa ka
(Matius 24:29-31; Lukas 21:25-28)
24 Hidi kon Yesus aa napiut le tek Un ima-ii las noan, “Eta lelo-leol in susa ngas hidis son nam,
‘Mam lelo la daid mitang,
bulan na kon langa lo ka.
25 Duun nas nahis deng apan-dapa kua,
nol kuasa in ne apan-dapa ku nguas daid dahut-dahut sii.’
26 Hidi na halas-sam, atuli las totoang ngat net Au, Atuling Baktetebes sia. Mam Auk maang deng apan-dapa kua. Nol totoang atuli li ngat net Auk in kuasa ka, nol Auk in loe-liliman na!
27 Hidim Auk tadu Ama Lamtua Allah ima-ii in ne sorga nguas, le laok tao nakbuan totoang atuil man Auk in huil nal son, deng papmes apan-kloma ki ngias. Deng leol-saken lako pes leol-denen; deng blai-ahen lako pes loet-ahen.”
Lelo-leol in susa ngas daid taad deng Lamtua Yesus in maa kia
(Matius 24:32-35; Lukas 21:29-33)
28 Yesus nahdeh napiut noan, “Auk kat kleta deng kai ina mesa. Eta un klehen na kunis son nam, na daid tada noan, oras ehe ka maa dadani son.
29 Ela kon, eta mi ngat net lelo-leol in susa ngas maas son nam, na banansila el asa man apin Auk in tek mi son na, na daid tada noan, Auk in maa ka dadani son.
30 Mi hii babanan ne! Mam deng totoang atuil in nuil hahalas nia ngas, muik deeh mates lo bii, mo lelo-leol in susa ngas maas lius son.
31 Apan-dapa ku nol apan-kloma ki ilang kon no, Auk in teka ni tahang napiut hidi nutus taan lo.”
Lamtua Yesus lelon in maa ka, buni nabale
(Matius 24:36-44)
32 Yesus aa taplaeng noan, “Muik atuli mes lo kon man taan lelon tam oras Auk in pait maa ka. Ama Lamtua Allah ima-ii in ne sorga nguas kon, tanan lo. Auk esang kon, tanan lo. Suma Auk Amang ngu sii, man tanan.
33 Tiata mi musti doha-doh babanan, undeng mi taan lo, le bling un oras sa maa lisu.
34 Nesang lo ka kam Auk lakong nang mia, mo mam Auk pait maang pait. Banansila el um lamtua mes nang soleng un uma la, le bok lako nusa katang. Un tadu un atulin in loka-loka ngas le mana-koet un uma la babanan. Nol un bating bel oen mesa-mesam nol oen osa. Un hid atuil in doh hnita ka ngas le doh babanan, didiin un pait maa.
35 Mi kon musti doh duman-lelo, undeng mi taan um lamtua ka in pait blinga ka lo. Taan le un pait lelo-maun tam, bingin-tai tam, lelo tam, oras lelo sake ko, mi tanan lo.
36 Tamlom mo un maa nahkiut tuun, ti un haup mi ninim nakeo-dadale lo ka.
37 Tiata, asa man Auk in tek mi nia, Auk tek atuil tenga las totoang ela kon, noan, ‘Mi musti doh babanan le sodo-sium Auk in pait maa kia!’ ”
[Lamtua Yesus in dehet nol Un ima-ii las se leten Saitun na ka, lako pes ela.]