12
Kanta sa Pagpasalamat
1 Pag-abot sang sina nga adlaw, magakanta kamo:
“Ginoo, ginadayaw ko ikaw.
Naakig ka sa akon,
pero karon nadula na ang imo kaakig,
kag ginalipay mo ako.
2 Ikaw, O Dios, amo ang akon manluluwas.
Magasalig ako sa imo kag indi magkahadlok.
Ikaw, Ginoo, amo ang nagahatag sa akon sang kusog,
kag ikaw ang akon ginakanta.
Ikaw ang nagluwas sa akon.”
3 Subong nga ang mabugnaw nga tubig nagahatag kalipay sa ginauhaw, magakalipay kamo kon luwason na kamo sang Ginoo.
4 Pag-abot sang sina nga adlaw, magakanta kamo:
“Dayawa ninyo ang Ginoo!
Simbaha ninyo siya!
Isugid sa mga katawhan ang iya mga binuhatan.
Ipanugid ninyo nga dalayawon siya.
5 Kantahi ninyo ang Ginoo
tungod kay makatilingala ang iya mga ginhimo.
Ipahibalo ninyo ini sa bilog nga kalibutan.
6 Maghinugyaw kamo kag magkanta sa kalipay,
kamo nga katawhan sang Jerusalem.
Kay gamhanan ang Balaan nga Dios sang Israel nga inyo kaupod.”