20
Ang Mensahi Parte sa Egypt kag sa Ethiopia
Suno sa sugo ni Haring Sargon sang Assyria, ginsalakay sang kumander sang mga soldado sang Assyria ang Ashdod, kag gin-agaw ini. Antes ini natabo, nagsiling ang Ginoo kay Isaias nga anak ni Amoz, “Ubaha ang imo bayo nga sako pati ang imo sandalyas.” Gintuman ini ni Isaias, kag naglakat-lakat siya nga wala sing bayo kag nagatiniil.
Sang ulihi nagsiling ang Ginoo, “Ang akon alagad nga si Isaias naglakat-lakat nga wala sing bayo kag nagatiniil sa sulod sang tatlo ka tuig. Ini isa ka simbolo nga nagapaandam sa Egypt kag sa Ethiopia.* Kay pagabihagon sang hari sang Assyria ang mga taga-Egypt kag taga-Ethiopia, bata man ukon tigulang. Pagabihagon sila, nga wala sing bayo kag nagatiniil. Makita ang ila mga buli, kag mahuy-an gid ang Egypt. Ang mga nagasalig sa Ethiopia kag nagapabugal sa Egypt matublag kag mahuy-an. Sa tion nga matabo ini, magasiling ang mga Filistinhon, ‘Tan-awa ang natabo sa mga nasyon nga ginsaligan ta kag ginpangayuan sang bulig sa pagluwas sa aton sa hari sang Assyria. Ti, paano na kita maluwas?’ ”
* 20:3 Ethiopia: sa Hebreo, Cush 20:4 taga-Ethiopia: sa Hebreo, taga-Cush 20:6 Filistinhon: sa literal, nagaestar sa mga lugar nga malapit sa dagat