3
Rhennah Pathen Ngaiuepnah
א Alef
1 Kai tah a thinpom caitueng dongkah phacipphabaem aka hmu hlang ni.
2 Kai te m'hmaithawn tih hmaisuep ah n'caeh sak vaengah vangnah om pawh.
3 Kai taengah a tloeng tangloeng tih khohnin yung ah a kut a hluem.
ב Bet
4 Ka vin neh ka saa a hmawn sak tih ka rhuh a paep sak.
5 Kai he rhahalung n'suem thil tih sue neh bongboepnah te m'ven thil.
6 Ka khosak he khosuen kah aka duek bangla khohmuep ah ka om.
7 Kai taengah khoep a biing tih ka rhohum loh n'nan he ka loeih pawh.
8 Ka khue tih ka pang vaengah pataeng ka thangthuinah te a toeng.
9 Lungrhaih neh ka longpuei a biing tih ka hawn a paihaeh sak.
ג Dalet
10 Kai taengah tah vom neh sathueng pataeng a huephael kah sathueng bangla amah rhongngol coeng.
11 Ka longpuei ah m'phaelh sak tih kai n'soek dongah kai aka pong la n'khueh.
12 A lii a phuk tih thaltang ham kutnoek la kai n'tai.
ד He
13 Anih kah liva ca loh ka kuel khuila pawlh.
14 Ka pilnam pum kah nueihbu neh khohnin yung ah amih kah rhotoeng la ka poeh.
15 Ankhaa te kai ng'kum sak tih pantong neh kai m'hmilhmal sak.
ה Vav
16 Ka no he lungcang neh a mawth tih hmaiphu khuiah kai m'vuei.
17 Ka hinglu he ngaimongnah lamloh a hlahpham tih a then khaw ka hnilh.
18 Te dongah kai kah hmailong neh BOEIPA lamkah ka ngaiuepnah khaw paltham coeng ka ti.
ה Zayin
19 Kai kah phaiphabaem neh ka airhoeng khaw, ka pantong neh ka anrhat khaw poek lah.
20 A poek a poek vaengah ka khuikah ka hinglu tah tlayae la tlayae coeng.
21 He he ka ngaiuep dongah ni ka lungbuei he ka mael puei.
ח Khet
22 BOEIPA kah sitlohnah tah bawt pawt tih a haidamnah khaw muei pawh.
23 Mincang ah na uepomnah thai khaw ping.
24 Ka hinglu loh, “BOEIPA tah ka khoyo ni,” a ti dongah amah te ka ngaiuep van.
ט Tet
25 BOEIPA tah amah aka lamtawn ham neh amah aka toem hinglu ham a then pah.
26 BOEIPA kah loeihnah dongah tah rhingoel ngolsut ham khaw then.
27 A camoe vaengah hnamkun a phueih te ni hlang ham khaw then.
י Yod
28 Amah soah a poeh bangla amah bueng khosa saeh lamtah kuemsuem saeh.
29 A ka te laipi khuiah vuei saeh lamtah ngaiuepnah a om khaming.
30 Amah aka ngawn ham a kam duen pah saeh lamtah kokhahnah neh kum saeh.
כ Kaf
31 Ka Boeipa loh kumhal duela a hlahpham ngawn moenih.
32 Pae sak bal mai cakhaw a sitlohnah dongkah sitlohnah a khawk vanbangla a haidam bitni.
33 Hlang ca te a lungbuei a phaep pah tih a pae sak bal moenih.
ל Lamed
34 Khohmuen kah thongtla boeih te a kho hmuiah a phop ham,
35 Khohni kah mikhmuh ah hlang kah tiktamnah hnawt ham,
36 A tuituknah neh hlang a khun sak ham khaw ka Boeipa loh a hmuh ngaih moenih.
מ Mem
37 Ka Boeipa loh a uen pawt te om ni tila unim aka thui thai.
38 A thae neh a then khaw Khohni ka lamloh thoeng pawt nim.
39 A tholhnah sokah a tholhnah yuvat ah balae tih tongpa hlang hing loh a kohuet mai eh.
נ Nun
40 Mamih kah longpuei he phuelhthaih tih n'khe phoeiah BOEIPA taengla mael uh sih.
41 Mamih kah thinko neh kut he vaan kah Pathen taengah phuel uh sih.
42 Kaimih kah boekoek neh nang kan koek uh te khodawk nan ngai uh moenih.
ס Samek
43 Thintoek neh na cun uh vaengah kaimih nan hloem tih lungma ti kolla nan ngawn.
44 Thangthuinah neh paan ham khaw namah te cingmai neh na cun uh.
45 Kaimih he pilnam lakli ah yun-aek neh kawnhnawt la nan khueh.
פ Pe
46 Ka thunkha boeih loh kaimih taengah a ka a ang uh.
47 Birhihnah neh rhom khaw kaimih taengah omdamnah neh pocinah la thoeng.
48 Ka pilnam nu kah a pocinah dongah ka mik he sokca tui la long.
ע Ayin
49 Ka mik loh a hawk vetih a bawtnah om pawt hil kak mahpawh.
50 A dan neh BOEIPA loh vaan lamkah a hmuh duela.
51 Ka khopuei tanu boeih kongah ka mik loh ka hinglu he a poelyoe.
צ Tsade
52 Lunglilungla maila kai he ka thunkha rhoek loh vaa bangla m'mae khaw m'mae uh mai.
53 Ka hingnah te tangrhom ah a det uh kai taengah lungto a omtoem thil.
54 Ka lu he tui loh a et vaengah tah n'tuiphih muema ka ti.
ק Qaf
55 BOEIPA na ming te tangrhom laedil lamloh kang khue.
56 Ka hilhoemnah ham ka pang te hna na buem pawt dongah ka ol na yaak coeng.
57 Namah kang khue khohnin ah na mop tih, “Rhih boeh,” na ti.
ר Resh
58 Ka hinglu kah tuituknah khaw ka Boeipa loh na rhoe tih ka hingnah na tlan.
59 BOEIPA aw ka lolhmaihnah na hmuh cakhaw ka laitloeknah dongah n'tang sak lah.
60 Kai soah amih kah tawnlohnah boeih neh amih kah kopoek boeih te na hmuh.
שׁ Sin/Shin
61 BOEIPA aw kai soah amih kah kokhahnah neh amih kah kopoek boeih te na yaak coeng.
62 Khohnin yung ah a phungding ol neh kamah taengah kai m'pai thiluh.
63 A hoepnah neh a painah ah, amih kah hnaelnah ni ka paelki.
ת Tav
64 BOEIPA aw, amih kut dongkah khoboe neh a tiing la amih te thuung lah.
65 Amih te lungbuei kotalh la khueh lamtah na tapvoepnah te amih soah thoeng sak.
66 BOEIPA aw thintoek te na hloem dongah ni amih te vaan hmui lamloh na mitmoeng sak.