15
Jesuh Neh Pilat
Khosoihham rhoek, patong rhoek, cadaek rhoek neh khoboei pum loh dawtletnah yueya tlek a saii uh. Jesuh te a khih uh phoeiah a khuen uh tih Pilat taengah a thak uh. Te vaengah Pilat loh Jesuh te, “Judah rhoek kah manghai la na om a? tila a dawt. Tedae Jesuh loh anih te a doo tih, “ Namah long ni na ti,” a ti nah.
Khosoihham rhoek long khaw Jesuh te tholh muep a paelnaeh uh. Te dongah Pilat loh Jesuh te koep a dawt tih, “Nang muep m'paelnaeh uh ke khat khaw na doo mahpawt nim? a ti nah.
Tedae Jesuh loh a doo voel pawt dongah Pilat te a ngaihmang.
Barabbas te A Loeih Sak
Te vaengkah khotue takuem ah thongtla pakhat te a hoep tih ana hlah pah. Te dongah rhalthoh rhoek neh a khoh Barabbas a ti te om. Anih loh olpungnah dongah ngawnnah a saii. Hlangping te khaw cet uh tih a saii noek la amamih ham koe a bih uh. Tedae Pilat loh amih te a doo tih, “Na ngaih uh nim, Judah manghai he nangmih ham kan hlah mako?” a ti nah.
10  Uethnetnah dongah khosoihham rhoek loh anih taengla a voeih uh te a ming. 11  Tedae khosoihham rhoek loh hlangping te a hueh tih Barabbas te amih ham lat a hlah sak. 12 Te dongah Pilat loh amih te a doo tih, “Te koinih Judah manghai la na khue uh te metla ka saii ham lae na ngaih uh?” koep a ti nah.
13 Te rhoek loh, “Anih te tai laeh,” tila koep pang uh. 14  Tedae Pilat loh amih taengah, “Mebang boethae nim a saii?” a ti nah.
Amih long khaw, “Anih te tai laeh,” tila bung pang uh. 15  Pilat loh hlangping kolo la saii a ngaih dongah amih ham Barabbas te a hlah pah. Tedae Jesuh te a tam tih tai ham a paek.
Rhalkap loh a Tamdaeng
16 Te phoeiah rhalkap rhoek loh Jesuh te khoboeiyung a om nah vongup khuila a khuen uh tih caem te a pum la a hueh uh. 17 Te phoeiah Jesuh te daidi neh a khuk uh tih hling rhuisam a vaeh uh te a khuem sakuh. 18 Te phoeiah, “Judah rhoek kah manghai na sading saeh,” tila Jesuh te kut koe a tuukuh. 19 Te phoeiah a lu te capu neh a boh uh tih a timthoeih uh. Khuklu te khaw cungkueng uh tih Jesuh te a bawk uh. 20  Jesuh te a tamdaeng uh phoeiah daidi te a pit pauh. Te phoeiah a himbai te a bai sak uh tih tai hamla a khuen uh.
Dingca Rhoi Laklo ah A Tai
21  + Te vaengah Kurena hlang Alexander neh Rufus kah a napa Simon lohma lamkah ha pawk tih pal khum rhoi dae Jesuh kah thinglam te koh sak ham khak a tanolh uh. 22 Te phoeiah Jesuh te Golgotha hmuen la a khuen uh. Tekah te lurhuh hmuen ni a thuingaih. 23 Te vaengah myrrh misurtui te Jesuh a paek uh dae doe pawh. 24  + Jesuh te a tai uh phoeiah a himbai te a phen pa uh tih amamih khat khat loh a khuen ham te hmulung a naan uh. 25  Khonoek pathum a lo vaengah Jesuh te a tai uh. 26 Te phoeiah a paelnaehnah ming te a daek tih,” Judah Manghai,” la a khueh pah. 27  + Anih neh dingca panit te khaw bantang ah pakhat banvoei ah pakhat a tai uh. 28  Aka van paitai loh anih te a soehsal uh tih a lu a hinghuen uh. 29  + Te vaengah, “Aw bawkim te aka phae tih hnin thum ah aka sa, 30  Namah te khang uh lamtah thinglam lamkah rhum lah,” a ti nauh.
31  Khosoihham rhoek neh cadaek rhoek van long khaw a tamdaeng uh tih khat khat taengah, “A tloe rhoek te a khang dae amah aka khang uh thai pawh. 32  Israel manghai Khrih thinglam lamkah rhum laeh, te daengah ni kan hmuh uh vetih kan tangnah u eh,” a ti nauh.
A taengkah a tai uh long khaw Jesuh te a thuithet.
Jesuh Khap Uh
33  Khonoek parhuk a pha neh diklai pum ah yinnah loh khonoek pako duela a thing. 34  +Khovang khonoek pako vaengah Jesuh tah, Eloi, Eloi lama sabakhthani?” tila a ol a len la pang. Te tah, “Ka Pathen, Ka Pathen, balae tih kai nan phap,” te ni a thuingaih. 35  Te vaengah a taengkah aka pai khuikah a ngen loh a yaak uh tih, “Elijah a khue ke,” a ti uh.
36  +Hlang pakhat aka yong loh caethum te yuthui neh a sul tih cungkui dongah a kaek. Te phoeiah Jesuh te a tul tih, “Hlah uh lamtah so uh lah sih, anih aka hla la Elijah ha pawk venim,” a ti. 37  Te phoeiah Jesuh loh ol a lenla a huel tih pat. 38  + Te vaengah bawkim kah hniyan te a soi lamloh a hmui due panit la pawn. 39  Anih hmai ah aka pai rhalboei long khaw a pat te a hmuh vaengah, “Hekah hlang tah Pathen Capa rhep ni,” a ti. 40  + Te vaengah a hla lamkah aka dan huta rhoek khaw om uh. Amih khuiah Magadala Mary, a noe James neh Joses manu Mary neh Salome khaw om. 41  Amih tah Galilee ah a om vaeng lamkah loh Jesuh te a vai uh tih a khut uh. Te phoeiah a tloe, amah neh Jerusalem la aka luei rhoek khaw muep omuh.
Jesuh te A Vuei
42 Te phoeiah hlaem a pha coeng tih rhuengphongnah om. Te dongah te tah huetnah la om. 43  Te vaengah Arimathea lamkah khoboei hlangcong Joseph te ha pawk. Anih tah amah long khaw Pathen kah ram te aka lamtawn la om. Pilat taengah ngaingaih la cet tih Jesuh kah rhok te a bih. 44 Jesuh a duek tarha te Pilat khaw a ngaihmang. Te dongah rhalboei te a khue tih, “Duek dingrhae pawn nim ca,” tila a dawt. 45  Rhalboei lamkah te a mingpha daengah rhok te Joseph a paek. 46 Te vaengah a himbai lai neh a hlak. Himbai te a yen phoeiah anih te hlan ah a khueh. Te tah lungpang dongah a thuk tangtae la om. Te phoeiah tah hlan rhai te lungto a paluet thil. 47  Magadala Mary neh Joses manu Mary long khaw a khueh nah te a hmuh.
+ 15:21 Rom 16.13. + 15:24 Tgt 22.19. + 15:27 Isa 53. 12. + 15:29 Tgt 22.8; 109.25; Mark 14.58; Jn 2.19. + 15:34 Tgt 22. 2. + 15:36 Tgt 69.22. + 15:38 Sung 26. 31-33. + 15:40 Luke 8.2,3.