ESDRAS
Pakhat nah
3 ESDRAS CABU KAWNG
Vangsawn lamkah a mael uh tih Judea kah Jews rhoek koep a thoh vaengah Esdras loh cabu pali a tael. Anih kah cabu a pacuek neh a pabae Ezra neh Nehemiah he Protestant long khaw, Roman Catholic long khaw, Jews rhoek long khaw boeih a pom. Esdras cabu rhoi he tah Jew rhoek kah Hebrew Bible dongah khaw, Protestant Bible dongah khaw thum pawh. Jerome kah a kong Latin Vulgate Bible (AD 404) dongah tah Esdras 1 (Ezra), Esdras 2 (Nehemiah), Esdras 3 la a khueh.
Sawt Yoeinah
Josiah neh Jerusalem pocinah 1.1—5.8
Vangsawn lamkah maelnah2.1-30
Manghai boei kamkaihnah 3.1—4.63
Bawkim saknah neh nawnnah 5.1—7.15
Vangsawn lamkah maelnah8.1—9.55
1
Josiah loh Yoom A Caak
(2Mg 23.21-23; 2Kh 35.1-9)
1 Boeipa thangpomnah hamla Josiah loh Jerusalem ah Yoom a saii. Hla khat hnin hlai li vaengah tah khotue maeh te a ngawn uh.
2 Josiah loh khosoih rhoek te a coi tih hnin takuem Bawkim khuiah aitlaeng la thothueng ham, a himbai neh a thoeih cam.
3 Levi rhoek khaw, bawkim tueihyoeih rhoek khaw Boeipa bibi dongah amamih a cilpoe tih, David capa Solomon la a sak Boeipa Bawkim kah Paipi thingkawng cim te koh hamla ol a paek.
4 Josiah loh amih te hmuen khat lamloh hmuen khat la kawt uh voel boeh. Nangmih na Pathen Boeipa taengah tho aka thueng tih, a pilnam Israel kah bibi la na om uh. Imkhui neh koca loh na bibi te saii hamla sikim uh laeh.
5 Manghai David kah olpaek bangla a capa manghai Solomon long khaw a rhuepom la a saii. Israel pilnam ham Levi loh Boeipa bi a bi bangla na cako kah a hutnah te a thuem la bawkim ah a hmuen lo uh.
6 Yoom kah tuca neh mae te khaw ngawn uh lamtah na hui Israel ca ham hmueih te tawn uh. Te phoeiah Yoom te Boeipa loh Moses taengah uentonah a paek bangla saii uh,” a ti nah.
7 Josiah loh pilnam aka thum rhoek taengah tu thawng sawmthum, maae ca thawng thum a paek. He tah pilnam teangah, khosoih taengah, Levi rhoek taengah ol a khueh bangla manghai im lamkah ni kutdoe la a paek.
8 Te vaengah bawkim aka hutnah boei rhoek tah, Hikiah, Zekhariah neh Heiel tih. Amih he khosoih la om tih tu thawng hnih yarhuk neh khotue kah hmueih la vaito ca yathum a paek.
9 Rhalboei rhoek la Conaniah, Shemaiah neh a mana Nethel, Hashabiah Cohiel neh Joram long khaw Levi rhoek kah hmueih a nawn ham tu thawng nga neh vaitoca yarhih te a paek.
10 Te vaengah amah he tlam he om van. Khosoih neh Levi rhoek loh amah a rhoep la phuekhlak uh tih vaidamding te a khuen uh. Mincang a pha vaengah tah Moses olkhueng kah a uen bangla Boeipa taengah nawnnah te a paek uh.
11 Amah imkhui neh koca kah boelnah bangla pilnam hmaiah a buhham te a khuen uh.
12 Levi rhoek loh Yoom hmuen te a hai uh tih am dongah a thong uh phoeiah baeldung dongah a bo a tui la a khueh uh.
13 Te phoeiah tah maeh te pilnam boeih hamla a tael pa uh. Te tlam te boeih a saii uh phoeiah tah maeh te amamih ham he Aaron cadil khosoih rhoek ham te a loh uh.
14 Khosoih rhoek he hlaem a pha hil hmueih kah a tha a phum tih mat tok uh.
15 Asaph koca Levi rhoek khuikah bawkim vongka aka tawt rhoek neh laasa rhoek tah manghai David kah uentonah bangla amah kah a hmuen ah om uh. Asaph, Zekhariah neh Eddinus amih he tah manghai yueng la om uh coeng.
16 Amih ham tah a tloe rhoek loh Yoom he a soepboe pah coeng dongah a paihmuen te nongtak ham ngoe pawh.
17 Manghai Josiahkah olpaek bangla Boeipa taengah nawn ham hmueih neh aka tukkai boeih te tah tekah khohnin ah a saii uh.
18 Yoom khotue khaw a bul uh tih hmueih te khaw hmueihtuk dongah a nawn uh.
19 Israel pilnam boeih tah Yoom tue vaengah thum uh tih vaidamding khotue te kha hnin rhih khuiah a yaeh uh.
20 Tonghma Samuel tue lamkah te Yoom he uepom la a saii uh moenih.
21 Lamhma kah Israel manghai rhoek khuiah khaw he tlam he Yoom aka saii pakhat khaw a om moenih.
22 He tah manghai Josiah loh a manghai nah kum hlai rhet vaengah Jerusalem aha s aii tih khosoih rhoek, Levi rhoek khaw, Judah neh Israel pilnam boeih long khaw a bul puei.
Josiah Manghai A Bawtnah
23 Bawknah dongah a dung la a om dongah, Josiah kah a saii boeih te Boeipa loh a uem pah.
24 Tedae yankah cabu long khaw a cil te a thui. Josiah a manghai vaengah Boeipa taengah aka tholh tih boekoek rhoek khaw om a tih. Amih te a tloe namtu neh ram lakah khaw tholh uh tih Boeipa tloelnah hno te a saii uh. Te dongah a laitloeknah te Israel pilnam soh khung a tlak pah.
25 He tlam he Josiah loh boeih a saii phoeiah tah, Egypt manghai loh Perath tuiva kah Carchemis ah tloek uh rhoi ham caem a khuen.
26 Anih te Josiah loh a paa sak ngawn dae Egypt manghai loh Josiah taengla ol a pat tih, “Judah manghai te caem la kan tloek mahpawh.
27 Boeipa Pathen nang tloek hamla n'tueih moenih. Ka caemtloeknah he tah Perath ah ni a om. Kai taengah Boeipa om, Boeipa loh kah n'cahawh coeng. Te dongah na lambong te bal puei laeh, Boeipa te oel boeh,” a ti nah.
28 Tedae Josiah loh a hnuk mael pawt tih, a leng te khaw balkhong sak pawh. Tonghma Jeremaih dong lamloh Boeipa kah a thui te hnatun ham a aal tih, tloek hamla ko a tam.
29 Megiddo kol ah caemtloek la cet van dae Egypt rhalboei rhoek loh amah te a tloek uh.
30 Manghai Josiah loh a sal rhoek te, “Caemtloek hmuen lamloh n'khuen uh laeh, rhaidaeng la ka hmalaem coeng,” a ti nah. Te dongah anih te caemtloek kah rhongpai lamloh vik a khueh uh.
31 Anih te leng a tloe a loh pa uh tih Jerusalem la a mael puei uh. Teah a duek dongah anih te boei kah phuel ah a up uh.
32 Judah pilnam boeih tah anih hamla nguekcoi uh.
Tonghma Jeremiah loh manghai Josiah te rhaengsaelung neh a rhaeng sae. Te te Israel khuiah khaw khosing la om coeng. A lu rhoek neh a yuu rhoek long khaw anih ham a nguekcoi uh vaengah hekah laa he a sak uh.
33 Hekah olka he Judah manghai rhoek kah khokhuen dongah a khueh. Josiah loh a saii boeih, a mingthen a dang khaw, olkhueng a yakimingnah khaw, lamhma kah a saii boeih khaw Israel neh Judah minghai rhoek kah khokhuen dongah a khoem.
Judah manghai Joahaz
34 Judah rhoek loh Josiah capa Joahaz te a tuek uh tih a manghai la a khueh uh vaengah Joahaz tah kum kul kum thum lo coeng.
35 Anih loh Judah neh Jerusalem te a uk ngawn dae Egypt manghai loh anih te vik a khoe.
36 Te phoeiah cak talen yakhat, sui talen khat te mangmu la a thoh sak.
37 Egypt manghai loh Joahaz mana Joakim te Judea neh Jerusalem kah manghai la a khueh.
38 Te vaengah Joakim te boei la a pin dae a mana Zarakes loh a muk tih Egypt khui lamkah vawl a caeh puei.
Judah manghai Joakim
39 Joakim he kum kul kum nga a lo ca vaengah Judae neh Jeruslaem a manghai tih Boeipa kah mikhmuh ah a thae ni a saii.
40 Te vaengah anih Babylon manghai Nabuchodonosor loh anih te a paan tih rhohum rhui neh a khih phoeiah Babylon la a khuen.
41 Nabuchodonosor loh Boeipa kah hnopai te a loh tih a phueih phoeiah amah Babylon bawkim ah a khueh.
42 Tedae anih kah olthang khaw, a cim pawt neh a rhong khaw manghai rhoek kah khokhuencil dongah a kun sak.
Judah manghai Jehoiakhin
43 Joakim yueng la a capa koep manghai tih, anih te manghai la a khueh uh vaengah kum hlairhet ni a lo ca pueng.
44 Anih te Jerusalem ah hla thum neh hnin rha manghai dae Boeipa mikhmuh ah boethae ni a saii.
45 Kum khat phoeiah tah nah Nabuchodonosor loh hlang tueih tih anih neh Boeipa kah honpai cim te Babylon la a loh sak.
46 Te phoeiah Sedekias te Judae neh Jerusalem kah manghai la a khueh. Te vaengah anih te kum kul kum khat lo ca pueng tih kum hlai khat tah manghai van.
Judah manghai Zedekiah Jerusalem A Rhawpnah
47 Anih he khaw Boeipa mikhmuh ah a thae ni a saii. Jeremy dong lamloh Boeipa ol aka thoeng te khaw a ngaithuen moenih.
48 Boeipa ming neh Nabuchodonosor loh anih te a toemngam thil lamlong tah amah neh amah ta-aep nah coeng tih boe a koek coeng. A rhawn neh a thin a thah sak tih Israel Pathen Boeipa kah olkhueng te boeih a aek.
49 Pilnam kah khoboei rhoek neh khosoih rhoek loh boethae muep a saii uh.
50 A napa rhoek kah Pathen loh amih te hnuk mael khue ham a puencawn a tueih. Boeipa long tah amah omnah hmuen dongah thinphoei lungvatnah a khueh.
51 Boeipa loh amih a voek hnin ah khaw puencawn rhoek te a lawn uh tih tonghma te khaw a ho uh.
52 A pilnam te a thae rhoekoe caih coeng dongah amih neh a tingtawk la amih taengah Khalden manghai rhoek te a tueih pah.
53 Te long te cadong rhoek a bawkim cim kaepvai ah tumca neh a rhaih pah. Ca dong hula khaw tloe pawh, patong camoe khaw tloe pawh, Khalden rhoek kah kut dongah boeih a voeih.
54 Boeipa kah hopai cim boeih tah a yol a len khaw, Boeipa thingkawng dongkah hnopai khaw, manghai kah khohrhang khaw Babylon ka bat a khueh.
55 Boeipa im te khaw a hlup uh tih Jerusalem vongtung khaw a tulh uh phoeiah, a imsang khaw hmai neh a hoeh pa uh.
56 Thangpomnah hnopai boeih te a boeih hil a hmai mueh la a khueh uh. Pilnam tah tumca neh ngawn mueh la Babylon la a khuen.
57 Persian kah uknah tue a pha hil a ca rhoek khaw a taengah sal la om uh tih Jeremiah ka dong lamloh aka thoeng Boeipa ol te soep.
58 Khohmuen loh a Sabbath a uem hlan hil, kum sawmrhih khuiah tah Sabbath a tuem ham khaw a tue boeih tal uh.