9
Kholong Te a Toeng Uh
1 Ezra te hlah uh tih bawkim vongup lamloh Eliashib capa Jehohanan kah imkhui la cet.
2 Yin at pahoi rhaeh tih buh khaw, tui khaw tuep pawh. Hlangping kah boethaenah a len tangkik dongah nguekcoi.
3 Vangsawn lamkah aka mael boeih tah Jerusalem ah tingtun hamla olhoenah te Judea neh Jerusalem tomah a khueh.
4 Tamna lamkah aka mael rhoek te, khoboei boeilu rhoek kah oltloek bangla hnin nit hnin thum khuiah ni a tingtun voel pawt atah, a boiva te hmueih la boeih a tuuk pah tih, hlang te hlangping khui lamloh a vai uh.
5 Te vaengah Judah neh Benjamin koca kah hlang rhoek tah hnin thum khuiah Jerusalem la tingtun uh. Te vaengah a hla la hla ko dongkah hnin hlainit a pha coeng.
6 Hlangping boeih te bawkim hmai kah toltung ah ngol uh dae khonal loh a kae uh dongah thuen uh.
7 Te vaengah Ezra te pai hang tih amih te, “Olkhueng a aek uh tih kholong te na loh uh dongah nih Israel kah tholhnah he a pung.
8 Te dongah tholh phong uh lamtah a pa rhoek kah Pathen Boeipa te thangpomnah pae uh.
9 A kongaih te vai uh lamtah namamih te khohmuen pilnam taeng neh na kholong nu taeng lamloh hoep uh laeh,” a ti nah.
10 Te vaengah hlangping te boeih pang uh tih ol a len la, “Na thui bangla ka saii uh eh.
11 Te daenga hlangping he yet tih sikca la om. Tol tung ah pai ham tah ka noeng uh moehnih. He hno dongah ka tholhnah he muep yet tih hnin nit hnint at khaw ka bi ka saii uh thai moenih.
12 Te dongah hlangping te om mai saeh lamtah kai vang khui ah kholong nu aka lo rhoek mah a tuentah tue vaengah halo uh saeh.
13 He kah olka dongah Boeipa kah kosi lamloh n'loeih u hil amah hmuen ah mawt kung neh laitloekkung rhoek te om saeh,” a ti nah.
14 Asahel capa Jonathan neh Tikvah capa Jahzeah loh he kah dumlai hea thui rhoi tih, Meshullam, Levi neh Shabbethai loh amih taengah laitloekkung la a bi.
15 Vangsawn lamkah aka mael boeih taengah hekah oltloeknah ning la a saii uh.
16 Ezra loh pacut imkhui kah a hlang rhoek mawtkung te amah loh a ming neh rhep a tuek. Te dongah hla rha hla sae vaengah tah olka he cae hamla hma a pai uh.
17 Te dongah kholong nuh aka lo tongpa rhoek te a hla khat kah hla sae dongah tah bawt a thak uh.
Kholong Nu aka Lo Rhoek
(Ezra 10:18-44)
18 Te vaengah khosoih rhoek la kholong nu aka lo rhoek tah,
19 Jozadak koca Jeshua tiingan neh a huiko rhoek, Maaseiah, Eliezar, Jarib neh Jordan om.
20 Te dongah amamih bit uh tih a yuu te a vawl a tueih uh. Te phoeiah a tholh hmilhnah hamla tutal neh a nawn uh.
21 Immer cadil la Hannani neh Zebadiah, Masseih neh Shemaiah, Jehiel nah Azariah.
22 Pashhur cadil la Elioienai, Maaseiah, Ishmael, Nathanael, Gadeliah neh Salthas.
23 Levi koca la Jozabad, Shimei neh Kelaiah (anih he Kelita ni), Pethaniah neh Jdah neh Jonah.
24 Bawkim kah laasa rhoek la Eliashab neh Zakkur.
25 Thoka tawt ah Shallum neh Telem.
26 A tloe rhoek la, Parosh koca ah Ramiah, Malkhijah, Milelos, Eleazar, Asibiah neh Beneas.
27 Elam koca ah Matthaniah, Zekhariah, Jezriel, Abdi, Jeremoth neh Elijah.
28 Zattu koca ah Elioenai, Eliashab, Othoniah, Jeremoth, Zabad neh Zerdaiah.
29 Bebai koca ah Jehohanan, Hananiah, Zabbai neh Emathis.
30 Bani koca ah, Meshullam, Malluch, Adaiah, Jsahub, Sheal neh Jeremoth.
31 Addi koca ah Naathus, Moosiaas, Lakkunus, Naidus, Baskapasmys, Sesthel, Belnus neh Manesseas.
32 Annan koca ah, Lionas, Asiah, Melkhia, Sabbaiah, neh Simon Chosemaeus.
33 Hashum koca ah Mattenai, Mattattah, Zabad, Eliphelet, Manasseh neh Shimei.
34 Bani koca ah Jeremai, Maadai, Amaram, Joel, Mamdai, Bediah, Vaniah, Carabasiaon, eliashib, Machnadebai, eliasis, Binuui, Eliaslia, Shimei, Shelemiah neh Nathaniah. Ezora koca ah Shashai, Azare, Azael, Shemaiah, amariah neh Joseph.
35 Nebo koca ah Mattithiah, Zabad, Iddo, Joel neh Benaiah.
36 Hekah hlang boeih long he kholong nu a loh uh. Te dongah kholong nu te a hlak uh tih amih a ca rhoek neh rhen a tueih uh.
Pilnam Taengah Olkhueng A Tae
(Neh 7:73—8:12)
37 Khosoih rhoek khaw, Levi rhoek khaw, Israel pilnam hlang thawt boeih khaw Jerus salem neh vangca ah kho a sak uh. A tloe Israe ca rhoek boeih khaw a hla rhih hil amah kho ah boeih om uh.
38 Hla sae dongah tah rhaengpuei boeih te bawkim khothoeng voengka kah toltung ah huek suntla uh.
39 Khosoih boeih Ezra neh cataekung rhoek taengah khaw Israel Pathen Boeipa loh a paek Moses olkhueng te hang khuen a ti na uh.
40 Te dongah Ezra loh olkhueng te a khuen tih, a hlarhih dongkah hla sae vaengah tah hlangping long khaw, huta tongpa long khaw, khosoih boeih long khaw a yaak uh.
41 Bawkim vongka hmai kah toltung ah mincang lamloh khoyin bangli hil huta neh tongpa hmaiah khaw tha ue la a tae pah. Te vaengah olkhueng taengla hlangping hna boeih a kaeng uh.
42 Te vaengah khosoih neh olkhueng aka taekung rhoek te thing tlaang a khueh pa uh tih pai uh.
43 Amah taengah te Maatthaiah, Shema, Anaias, Azariah, Uriah, Hezekiah neh Baalsamus te a bantang ah pai.
44 A banvoei ah Pedaiah, Mashael, Malkhijah, Lothasuhs, Nabariah, neh Zekharih pai.
45 Te phoeiah olkhueng ca bu te hlangping mikhmuh ah a loh. Te te hlang boeih hmuh kah hinyanah hmueh ah a khueh.
46 Olkhueng te koe a phuel vaengah amih te tangawk la boeih pai uh. Te vaengah Ezra loh Khohni Pathen, Caempuei Pathen Tlungthang te a uem.
47 Te dongah hlangping loh khaw, “Amaen,” tila a hlat uh. A kut a phuel uh tih diklai la a bakop doeah Boeipa te a bawk uh.
48 Jeshua, Anniuth, Sherebiah, Jadinus, Akkub, Shabbethai, Hodiah, Maiannas, Kelita, Azariah, Jozabad, Hanan, Pelaiah, Levi rhoek loh Boeipa kah olkhueng te a thuituen tih, amah vaengah a tae te khaw a thuicaih pah.
49 Te vaengah Attharates khosoih boei Ezra neh cataekung rhoek taengah khaw, hlangping aka thuituen Levi rhoek neh hlang boeih taengah,
50 Tihin he Boeipa hamla cim,” (Olkhueng a yaak uh neh amih te boeih rhap uh coeng.)
51 “Na longpuei la mael uh lamtah, buh tha khaw ca uh, didip tui khaw o uh, aka khueh pawt taengah buhham khaw tael pah.
52 Tihnin he Boeipa kah khohnin cim ni, kothae sak aih uh boeh. Boeipa loh nangmih n'thangpom pawn ni,” a ti nah.
53 Levi rhoek long khaw pilnam boeih te, “Tihin he Boeipa kah khohnin cim ni, kothae sak uh aih boeh,” a ti nah.
54 Te daengah amah caelong la mael uh tih a caa a ok uh. Amamih khaw a kohoe uh tih aka khueh pawt ham buhham khaw a tael uh dongah omngaih nah muep a khueh.
55 Amih a thuituennah ol loh a thaphoh uh dongah thikat la mael uh.