EZRA
(The Book of Ezra)
Ezra Cabu Kawng
A cuekca vaengah Ezra neh Nehemiah he pakhat la om. He rhoi dongah he Pathen pilnam rhoek Babylon vangsawn lamloh a mael vaengkah, bawkim koep a saknah, Jerusalem a thohnah, amamih Pathen olkhueng dogla a kunnah kawng a tael. Aboel parhuk hil he Ezea loh vangsawn lamkah pilnam a maelnah kawng, Jerusalem ah hmueihtuk a saknah kawng, Boeipa kongaih la hmueih a nawn lamhmanah kawng a tael. Persia manghai Cyrus loh Israel ca te Judia la a mael sak. Amih te Jerusalem bawkim sak ham khaw a thaphoh. Bawkim saknah kawng dongah khohnong a buh uh. A hnukkhueng ah Persian manghai Darius taengah saithainah a bih uh tih bibi a saii uh. Bawkim te puk a coeng uh tih a lenkoek umnah neh b.c 515 vaengah tah Pathen taengla a nawn uh. Persian manghai Artaxerxes loh Babylon ah aka om Ezra te khosoih la, Pathen ol aka cangpueikung la a tueih. Jerusalem kah Israel ca kah bawknah te koep a thoh tih pilnam taengah Moses kah olkhueng te koep a tae pah. Ezra loh bawknah mawtkung te a coelh tih Judah hlang rhoek te ciim sak ham ol a khueh. Judah hlang loh kholong nu yunah pawt ham ol a paek.
Outline
Pathen pilnam maelnah 1.1—6.22
Ezra maelnah neh pilnam thohnah 7.1—10.44
1
Cyrus kah Oltlueh
1 Persia manghai Cyrus kah kum khat vaengah tah Jeremiah ka dongkah BOEIPA ol te cup sak ham BOEIPA loh Persia manghai Cyrus kah mueihla te a haeng pah. Te dongah a ram pum ah ol a thak tih cadaek nen khaw,
2 “Persia manghai Cyrus loh he ni a thui. Diklai ram tom he vaan kah Pathen BOEIPA loh kai taengah m'paek coeng. Amah loh kai he Judah kah Jerusalem ah a im sa la m'hmoel coeng.
3 Nangmih khuikah long te khaw a pilnam cungkuem taeng lamloh a taengah a Pathen om saeh. Te dongah Judah kah Jerusalem la cet lamtah Israel Pathen BOEIPA im te sa saeh. Pathen amah he Jerusalem ah om.
4 A bakuep nah hmuen takuem lamkah aka sueng boeih loh Jerusalem kah Pathen im dongkah ham amah hmuen kah hlang rhoek te cak neh, sui neh, khuehtawn neh, rhamsa neh, kothoh neh yingyawn uh saeh,” a ti.
Vangsawn Lamloh Maelnah
5 Te vaengah Judah neh Benjamin napa boeilu rhoek khaw, khosoih neh Levi rhoek khaw, Jerusalem kah BOEIPA im sa la caeh ham Pathen loh a mueihla a haeng pah hlang boeih tah thoo uh.
6 A kaepvai boeih long khaw amih kut te cak hnopai neh, sui neh, khuehtawn neh, rhamsa neh, kawnthen neh a moem uh tih a cungkuem dongah a cung la a puhlu uh.
7 Te phoeiah Nebukhanezar loh Jerusalem lamkah a khuen tih a pathen im ah a khueh BOEIPA im hnopai te manghai Cyrus loh a khuen a khueh bawkim kah hnopai boeih te khaw,
8 Te te Persia Manghai Cyrus loh hnokhoem Mithredath kut ah a khuen sak tih Judah khoboei Sheshbazzar taengah a tae sak.
9 Te rhoek boeih te sui cailoeng sawmthum, cak cailoeng thawngkhat, tumcaca pakul pako,
10 sui bael sawmthum, cak rhaepnit bael ya li neh parha, a tloe hnopai thawngkhat,
11 sui neh cak hnopai boeih te thawng nga ya li lo. Vangsawn te Babylon lamloh Jerusalem la a caeh vaengah Sheshbazzar loh boeih a khuen.