SUNGLATNAH
(Exodus)
Sunglatnah Cabu Kawng
Sunglatnah he Greek lamah exodus a ti. A thui ngaihnah tah sal khui lamloh amah kho la a mael ke a thuingaihnah. He cabu dongah Boeipa loh a pilnam Israel ca rhoek Egypt lamloh a doek tih a mawt kawng te a thui.
Sunglatnah cabu dongah he Pathen bueng he Pathen tangla om tih suentae boeih kah boeilu kungmah a om te a thui. Pathen loh saii hamla a caai coeng atah u ca long khaw a paa sak thai moenih.
Sunglatnah cabu he hlopthum la a boel tih (1—-13) he tah Egypt khuikah a om vaengkah te a tueng sak. Manghai loh Israel ca rhoek te sal la a tueihno a tueiba. Amih kah bomnah ham a rhah ol te Pathen loh a yaak. Amih loeih sak ham te Moses a tuek. Israel ca Moses te Epgypt boeinu loh a ca la a cun.
Israel ca te loeih sak ham Moses loh a kuek dae Egypt manghai Pharaoh lo a aal. Te dongah Egypt kho ah lucik parha a pai sak. A hnukkhueng lamtah Israel ca rhoek te Egypt lamloh a caeh sak.
A pabae la (14—-18) dongah tah Israel ca rhoek Pathen kah Tlang Cim, Sinai tlang la a caeh vaengkah te a thui. Egypt manghai Pharaoh loh a thinko vilvak a tho tih a hlah tangtae Israel ca rhoek te koep a tuuk sak. Tedae Pathen loh Israel ca rhoek te a huul tih Egypt caem te boeih a thup. Te phoeiah Israel ca rhoek kah yincaehnah khosoek ah amih ham tui neh buh khaw kho a khan pah.
A tloihsoi kah (19—-40) he tah Sinai tlang kah aka thoeng te ni a thui. Te ah te Pathen loh Moses a voek. Te vaengah anih te Pathen loh bawknah, hmueihhlutnah, vuenhlaem khosaknah, khosoih hnicu, Dap hmuencim, hmueihtuk ham olkhueng a paek. Kai tah sal la na om nah Egypt kho lamloh aka coe puei YHWH Pathen ni a ti lalah mueirhol a saii uh tih kutsai pathen a bawk uh kawng khaw a tueng sak.
Sawt Yoeinah
Israel ca rhoek sal a binah1.1—1.22
Moses omnah neh a rhoengnah2.1—2.25
Pathen loh moses a tueihnah 3.1—6.30
Lucik pako a thoengnah7.1—10.29
Lucik hnukhueng neh sunglatnah 11.1—13.22
Carhaek Tuili (Reed Sea) a katnah 14.1—15.21
Moses loh Sinai la pilnam a khuen15.22—18.27
Olkhueng lungrha neh olrhi rhoek19.1—24.18
Hmuencim dap neh paipi thingkawng 25.1—27.21
Khosoih neh Sabath kawng 28.1—31.18
Pilnam loh mueirhol a bawk 32.1—32.35
Pathen kah olkhueh neh pilnam ham olkhueng 33.1—35.3
Hmuen cim kah nawnnah neh khosoih hnicu 35.4—36.7
Hmuen cim ham kutthai rhoek kah bibi36.8—38.31
Khosoih ham himbai a saii pah 39.1—39.31
Hmuen cim te a thoh coeng 39.32—40.38
1
Israel ca Sokah Phaepnah
1 He rhoek he Egypt la aka kun Israel ca rhoek kah a ming ni. Te vaengah Jakob neh a imkhui kah hlang neh,
2 Reuben, Simeon, Levi neh Judah,
3 Issakhar, Zebulun neh Benjamin,
4 Dan, Naphtali, Gad neh Asher te ha pawk.
5 Te vaengah Jakob hlit lamkah aka thoeng hinglu boeih he hinglu sawmrhih lo coeng tih Joseph khaw Egypt ah om coeng.
6 Te phoeiah Joseph neh a manuca boeih neh te kah cadilcahma tah boeih duek.
7 Tedae Israel ca rhoek tah pungtai uh tih luem uh, ping uh tih yet uh. Te dongah amih te khohmuen ah mawk mawk bae uh.
8 Te vaengah Egypt ah manghai a thai phoe tih te long te Joseph ming pawh.
9 Te dongah a pilnam te, “Pilnam he, Israel ca rhoek he mamih lakah muep pilnu coeng.
10 Anih te cueih pae pawn sih ping aih ve. Caemtloek ha thoeng tih anih neh koei uh koinih mamih m'hmuhuet ni. Te vaengah mamih m'vathoh thil vetih khohmuen lamloh cet hae ni,” a ti.
11 Te dongah amih te bitloh neh phaep sak ham saldong mangpa a khueh thil uh. Te vaengah Pharaoh kah rhuengim khopuei la Pithom neh Raameses te a thoh pah.
12 Anih a phaep uh vanbangla ping van tih pungtai van. Te dongah Israel ca rhoek kah mikhmuh ah a mueipuel uh.
13 Te dongah Egypt loh Israel ca rhoek te mangkhak la a thohtat sak.
14 Amih kah hingnah te amlai dong neh laiboeng dongah thohtatnah nen khaw, lohma kah thohtatnah cungkuem nen khaw, mat a phaep uh. Amih kah thohtatnah cungkuem dongah Israel ca te mangkhak la a thohtat sak uh.
15 Te phoeiah Egypt manghai loh Hebrew ca-om rhoi, a ming la pakhat ah Shiphrah neh a pabae ah a ming la Puah te a uen.
16 Te vaengah, “Hebrew nu te na om sak vaengah a omnah te so rhoi, tongpa atah ngawn rhoi lamtah huta atah hing saeh,” a ti nah.
17 Tedae ca-om rhoi loh Pathen te a rhih rhoi. Te dongah Egypt manghai loh amih rhoi taengkah a thui bangla saii rhoi pawt tih camoe te a hing sak rhoi.
18 Te dongah Egypt manghai loh ca-om rhoek te a khue tih amamih taengah, “Balae tih he kah hno he na saii uh tih camoe na hing sak uh,” a ti nah.
19 Te vaengah ca-om rhoek loh Pharaoh te, “Hebrew nu he Egypt nu bang moenih. Amih tah rhaang uh tih amih taengla ca-om a pawk hlan ah khaw om uh coeng,” a ti nah.
20 Te dongah Pathen loh ca-om rhoek te a voelphoeng sak tih pilnam a ping dongah muep rhoeng uh.
21 Ca-om rhoek loh Pathen te a rhih uh dongah amih ham im khaw a thoh pah.
22 Te dongah Pharaoh loh a pilnam boeih te a uen tih, “Tongpa la aka thaang boeih tah sokko la voei uh kuekluek lamtah huta tah boeih hing sak uh,” a ti nah.