4
Israel Taengkah Tuituknah
1 BOEIPA ol he Israel ca rhoek loh ya saeh.
BOEIPA kah tuituknah te diklai khosa taengah om coeng.
Oltak tal tih sitlohnah tal coeng.
Diklai ah Pathen mingnah khaw tal coeng.
2 Tap ham neh basa ham,
ngawn ham neh huen hamla,
samphaih ham a phae uh tih
thii te thii la a kap sak uh.
3 Te dongah khohmuen loh nguekcoi tih
a khuikah khosa boeih khaw tahah coeng.
Diklai mulhing neh vaan kah vaa khaw,
tuitunli kah nga khaw khum coeng.
4 Tedae hlang loh ho boel saeh lamtah
hlang loh tluung boel saeh.
Na pilnam khaw khosoih kah a ho bangla om coeng.
5 Khothaih ah na paloe vetih
na taengkah tonghma khaw khoyin ah paloe ni.
Te vaengah na manu te ka hmata sak ni.
6 Mingnah a tal lamloh ka pilnam hmata uh coeng.
Nang loh mingnah na hnawt dongah
nang te ka khosoih lamloh kan hnawt.
Na Pathen kah olkhueng na hnilh dongah
kai long khaw na ca rhoek te ka hnilh ni.
7 A pungtai uh bangla kai taengah a tholh dongah
amih thangpomnah te yahpohnah neh ka tho pah.
8 Ka pilnam kah boirhaem maeh a caak tih
amih kah thaesainah dongah a hinglu a phueih uh.
9 Te dongah pilnam bangla
khosoih khaw om boeiloeih coeng.
Anih te a longpuei ka cawh vetih
a khoboe bangla amah te ka thuung ni.
10 BOEIPA te hnawt hamla a dawn uh dongah
ca uh cakhaw uh hah uh mahpawh.
Cukhalh uh cakhaw pungtai uh mahpawh.
11 Pumyoihnah, misurrhuem neh
misur thai loh lungbuei ni a loh.
12 Ka pilnam loh a thingngo te a dawt tih
a conghol loh anih ham a thui pah.
Pumyoihnah mueihla dongah kho a hmang tih
a Pathen hnuk lamloh cukhalh uh.
13 Tlang soi ah a nawn uh tih som kah thingnu,
khabok neh rhokael hmui he
a hlip a then dongah a phum uh.
He dongah ni na tanu rhoek loh
cukhalh uh tih na langa rhoek khaw a samphaih uh.
14 Na tanu te cukhalh uh tih
na langa rhoek te a samphaih vaengah
ka cawh mahpawt nim?
Amih te pumyoi rhoek neh pam uh tih
hlanghalh rhoek taengah a nawn uh.
Tedae pilnam khaw
a yakming pawt dongah caehdoelh ni.
Israel neh Judah Rhalrhingnah
15 Israel nang na cukhalh akhaw
Judah te boe pawt lah mako.
Gilgal te paan boel lamtah Bethaven la cet boeh.
BOEIPA kah hingnah te toemngam uh boeh.
16 Israel kah thinthah, thinthah rhoe mah
vaito banghui pawn ni.
Amih te BOEIPA loh tuca bangla
a hoengpoeknah ah a luem sak coeng dae ta.
17 Muei aka sun Ephraim aw
anih te toeng laeh.
18 A yuhuem te a khok vaengah
a cukhalh hmuen la cukhalh uh tih
a photling kah yahpohnah te a lung la a lungnah uh.
19 Amah neh a phae te khohli loh
a yawn vetih a hmueih dongah yak ni.