10
Judith loh Holofernes a paan
1 Judith loh Israel Pathen taengah a pang te khaw a toeng tih a ol he khaw boeih coeng.
2 Doei a yalh nah kung lamloh thoo tih a taengom te a khue phoeiah Sabbath neh khotue hnin kah a om nah im la suntla.
3 A pum dongah tlam hni a pai te khaw a dul tih, nuhmai hni te khaw a pit. A pum te tui neh a silh hluksi a phu aka tlo neh amah hluk uh. A sam te a soh tih samkhuem te a khuem. A va Manasseh a hing vaengah a bai noek, poei himbai te a pum dongah a bai.
4 A kho dongkah khokhom khaw, khocin khaw, oihnun khaw, kutbuen khaw, hnathawn neh a lungvang boeih khaw a buen. Amah te a then koek lah phuekhlak uh tih anih aka hmuh tongpa boeih kah a mik te hlat a loh pah.
5 Te phoeiah a taengom te misur khap at, situi um at, cangrhoh cun at, thaibu rhae, buh ka te khaw a paek. Te phoeiah a umam te a cun tih a phueih hamla a paek.
6 Te phoeiah Bethulia khopuei vongka la cet rhoi. Te vaengah Uzziah neh a taengah khopuei kah a hamca Chabris neh Charmis a pai te khaw a hmuh.
7 A suisak thovael uh tih a himbai a lang te a hmuh uh vaengah hlang then a ngai bahoeng hmang uh.
8 Te dongah anih te a Pa rhoek kah Pathen loh kolonah tueng sak saeh lamtah na mangtaengnah te soep saeh, Israel pilnam khaw thangpom saeh lamtah Jerusalem khaw pomsang saeh,” a ti nah uh.
9 Te phoeiah Pathen taengah cungkueng tih amih te, “Olpae lamtah khopuei vongka te kai hamla ong saeh. Te daengah ni phawn ka cet vetih kai taengah na thui hno te a soep eh,” a ti nah. Te dongah a bih bangla cadong tongpa rhoek te vongka ong hamla ol a paek.
10 Te tla a saii uh phoeiah tah Judith khaw cetih a taengom loh a puei. Khopuei tongpa long khaw anih te hlang la suntla tih, kolvan a poeng phoei ah a mikhmuh lamloh a khum due a sawt uh.
Judith a Tuuk Uh
11 Huta rhoi te kolvan longah thaeng a caeh vaengah tah Assrian rhalmah loh khoep a mah.
12 Te dongah anih a tuk tih thongim la a khuen. Te phoeiah anih te, “Nang he uh bang pilnam lae, me lamkah lae na lo, melam na caeh eh?” a ti na uh.
Anih long khaw, “Kai tah Hebru nu ni, tedae kai tah amih taeng lamloh ka yong coeng, amih te nangmih taengah han tloeng vetih a yoop ham om coeng dongah.
13 Nangmih kah caempuei rhalboei Holofernes te hmuh hamla ka ngaih. Anih te olthang a tak te paek ka ngaih. Anih te caeh thai nah longpuei te tueng hamla ka ngaih. Hlang pakhat khaw a hlong mueh la, a tuuk mueh la, a hmalaem mueh la tlang te a loh bitni,” a ti nah.
14 Hlang rhoek loh a ol a yaak uh vaengah a maelhmai a hmaitang uh. Anih te amih mihmuh ah bahoeng sakthen la a om pah.
15 Te dongah amah te, “Ka boei taengla koe na yong tih na hingnah ngawn tah na khang coeng. A dap khuila kun laeh. Kaimih hlangvang long kang hui vetih amah taengla kan thak bitni.
16 A taengah na pai vaengah khaw na thinko ah rhihnah khueh boeh. Tedae na om bangla a taengah thui ngawn, nang te a then la n'toi bitni.
17 Anih neh a taengom aka puei ham te tongpa hlangmi yakhat a tuek uh amih rhoi te Holofernes taengla a khuen uh.
18 Rhaehmuen ah kohlopnah neh muep om uh. Anih a pai te dap pakhat lamloh dap pakhat la puen uh. Holofernes kah dap tol ah a pai vaengah khaw anih taengla cet uh huek a vael uh.
19 A sakthen neh a lungsak soah khaw, Israel soah anih loh lai a tloek khaw a ngai hmang uh. Pakhat loh a hui taengah, “Pilnam he u long nim a sit bal eh. Amih taengah he bang huta khaw a om mai. Amih khui kah tongpa he pakhat pataeng a hing la hlun pawt ham he olcueih moenih a? Amih te n'hlah koinih diklai pum khaw a paimaelh thai mai khaming,” a ti uh.
Judith te Holofernes taengla a Khuen
20 Te phoeiah Holofernes aka tawt neh a tueihyoeih boeih te ha nong tih anih te dap khuila a khuen uh.
21 Holofernes tah pohlip hmui kah a thingkong dongah yalh. Amah te daidi neh, sui neh, lunghing neh a tloe lugtlo phutlo neh yol uh.
22 A taengah Judith kawng a thui pah vaengah tah dap hmai la ha moe. Te vaengah a hmai ah ngun hmaithoi a pom.
23 Judith te Holofernes hmai la a caeh vaengah tah a tueihyoeih rhoek tah Judith kah maelhmai sakthen soah a ngaih hmang uh. Judith tah kup tih anih te hinyahnah a paek. Tedae a sal rhoek loh Judith te koep a thoh.