5
Holofernes kah Tingtunnah
1 Israel pilnam loh caemtloek hamla rhuengphong uh tih, tlang naeng khoep a buk uh te khaw, tlang som boeih a tung uh tih kol ah rhalmah a khueh uh te khaw Assyria caem kah rhalboei Holofernes taengah a thui pah.
2 Te dongah thintoek kalh la Moab mangpa rhoek neh Ammon rhalboei rhoe khaw, tuipuei kaeng kah khoboei boeih khaw tun a khue.
3 Te phoeiah amih te, “Nangmih Kannan rhoek kai taengah thui uh lah, hekah tlang ram ah mebang pilnam nim aka om? Mebang khopuei nim a om nah? A caem khaw metlam a len tih, a thadueng neh thaomnah metlam a khueh? Amih soah mebang manghai ni aka boei tih a caem khaw u long a mawt?
4 Khotlak kah khosa boeih loh balae tih amamih bueng a buel uh? Kai taengah lo ham neh hum uh ham khaw a aal u van rhailai.
Achior kah Ol
5 Te vaengah Ammon boeih kah mawtkung Achior loh anih te, “Ka boeipa aw, na sal ka dong lamkah ol he hnatun mai dae. Na kaepvai tlang ram kah kho aka sak pilnam kawng he oltak la namah taengah kan thui eh. Na sal ka lamloh a hong a om moenih.
6 He pilnam he Khaldean koca lamkah rhoek ni.
7 Amih tah Mesopotamia ah thikat la om dae a napa rhoek a om nah Mesopotamia kah sungrhai te bawk hamla huem uh pawh.
8 A napa rhoek kah longpuei a toeng parhi te vaan Pathen ni a bawk uh. Pathen a ming dongah amih te a napa rhoek amamih kah sungrhai mikhmuh lamkah a haek uh. Te dongah Mesopotamia la yong uh tih kum a sen kho a sak uh.
9 A Pathen loh amih te a om nah khohmuen caeh tak tih Kannan khohmuen paan hamla a thui pah. Kho a sak uh vaengah sui khaw, cak khaw, rhamsa khaw muep pung tih, muep rhoeng uh tih boei uh.
10 Khokha he Kannan khohmuen ah a tlung vaengah, Egypt la suntla uh. Te dongah caak a om khuiah tah kho a sak uh. Amih te hlangping la muep rhoeng tih a namtu tae lek pawh.
11 Te dongah Egypt manghai khaw amih taengah tlung coeng. Amih te a phaep tih thanuei la laiboeng a saii sak uh.
12 A Pathen te a khue uh dongah Egypt khohmuen te lucik thae neh a ngawn pah. Te dongah amih te Egypt loh a mikhmuh lamkah a haek.
13 Pathen loh amih mikhmuh ah Carhaek Tuili khaw a kak sak coeng.
14 Amih te Sinai neh Kadesh-barnea longpuei ah a mawt. Amih loh khosoek pilnam khaw boeih a haek uh.
15 Amori khohmuen kah imhmuen te a loh uh a tlungnah neh Heshbon kah khosa boeih khaw a thup uh. Jordan te kat uh tih tlang ram kah khuehtawn khaw a loh uh.
16 A mikhmuh lamloh Kannan khaw, Perizze khaw, Jebusi, Shechemi neh Gergesi boeih khaw, a haek tih kum a sen kho a sak uh.
17 A Pathen taengah a tholh uh pawt khuiah tah amih khaw rhoeng uh. Boethae aka thinah Pathen he amih taengah ni a om.
18 Tedae amih hamla a khueh pah longpuei lamloh a nong uh vaengah tah, amih te caem neh a heh tih khlong khohmuen ah tamna la a khuen. A Pathen kah bawkim he diklai la rhawp tih a khopuei tah a thunka loh a hul pah.
19 Tedae a Pathen taengla mael uh coeng a taekyaknah hmuen lamloh bal uh coeng. Te dongah a rhokso a om nah Jerusalem a loh uh. Imrhong la aka om tlang khomuen ah kho a sak uh.
20 Te dongah ka boeipa aw, pilnam he sawtkoi kaw om mai pueng khaming, a Pathen taengah a tholh atah a boethae khaw m'hmu khaming. Te daengah ni n'cet uh thai vetih a yawk uh eh.
21 Tedae namtu te boethae a om pawt atah, ka boeipa loh amih te rhael mai laeh. A Boeipa neh Pathen loh amih a rhun hae vetih, mamih tah diklai pum kah nueihbu la n'om hae ni,” a ti nah.
22 Achior kah ol a thui he a khah vaengah dap taengkah aka pai pilnam khaw kohuet uh. Holofernes boei rhoek neh tuikaeng kah khosa boeih khaw, Moab loh maehpoel la a sah ham khaw a pai thil loh,
23 “Israel ca te rhih hamla a om moenih, amih he a pilnam khaw caemtloek la aka saii thadueng neh thaomnah a om moenih.
24 Boei Holofernes aw lamhma la cet uh sih, nang kah caempuei caempa loh amih te a payawk bitni,” a ti uh.