8
Judith kah Moeiboe
1 Te khohnin kah olka boeih te Judith loh a yaak. Anih tah Israel ca khui kah Sarasadai capa Salamiel koca Nathanael capa Eliab koca, Hilkiah capa Ahitub koca, Raphain capa Gideon koca, Ananias capa Elkiah capa, Oziel capa Joseph capa, Ox capa Marai canu ni.
2 A va Manasseh he kah mah koca neh amah huiko khuikah kah la om dae cang ah vaengah a duek pah.
3 Manasseh long he amah lo aka at rhoek te a pai puei vaengah kholing loh mat a thong. Te dongah a khuen uh van dae Bethulia kah amah thingkong dongah duek. Te dongah anih te Dothan neh Bethulia laklo khohmuen kah aka napa rhoek taengah a up uh.
4 Judith tah kum thum hla li nuhmai la om coeng.
5 A im kah imphu ah amah hamla dap hloep a tuk tih. A pumpum ah tlamhni a bai tih nuhmai himbai te a yil.
6 Sabbath neh te hlan kah khohnin bueng phoeiah tah khohnin boeih a nuhmainah neh a yaeh. Hla saeh tom neh hlasae hnin ah khaw, Israel imkhui kah khotue neh omngaihnah khohnin ah khaw.
7 Anih tah a suisak khaw then tih a pum la lungnah kap. A va Manasseh long he sui khaw, cak khaw, sal tongpa neh huta khaw, rhamsa khaw, khohmuen khaw, a khueh pah dongah te imlo te a khoem a bael.
8 Tuemsomnah neh Pathen a hinyah dongah anih a thae la aka thui om pawh.
Judith neh A hamca rhoek
9 Pilnam loh mawtkung rhoek taengah a thui ol khaw, tui bangla a paci khaw, Uzziah loh amih taengah a thui te khaw, hnin nga phoeiah tah Assyria taengah khopuei paek hamla olhlonah neh ol a khueh uh te khaw Judith loh a yaak.
10 Te dongah amah kah hnokhoem nuca te Uzziah neh khopuei kah a hamca Chabris neh Charmis a khue sak.
11 Amih te a pha vaengah tah a taengah,
Bethuliah kah pilnam mawtkung rhoek kai ol he hnatun uh lah. Balae tih pilnam taengah oltak na thui uh pawh. Pathen neh nammih laklo ah khaw olhlonah na phoei uh tih na toemngam uh bal. Khohnin te yet te mamih bomkung neh Boeipa ha pawt pawt atah khopuei he tloeng ham ol na khueh bal.
12 Tihnin ah u rhoek nang nim Pathen aka noem aka cai. Hlanghing kah dumlai dongah Pathen yueng la na pai uh tarha mai.
13 Tlungthang Boeipa te noemcainah la na khueh uh dae pakhat khaw na ming uh hae mahpawh.
14 Hlang thinko kah a dung a ka khaw na ming uh pawt tih, hlang lungbuei kah bisai khaw na yakming uh moenih. Balae tih Pathen te khe hamla na lamtawn uh. Amah loh a cungkuem he a saii tih a lungbuei neh a hmat phoeiah a poeknah nen khaw a thuep ta. Pawh, ka nganpa rhoek Boeipa Pathen te thintoek sak boeh.
15 Hnin nga khuiah mamih bomnah ham khueh pawt mai cakhaw a ngaih tue vaengah amaih hoeptlang ham thadueng a khueh maco.
16 Boeipa Pathen kah a ngaihnah te khaban hamla cai uh boeh. Pathen tah hlanghing bangla a om moenih. Hoenah neh khuk ham hlang duek bangla amah te nen uh boeh.
17 Te dongah amah kah hlawtnah mah rhing uh sih lamtah mamih bomnah ham amah te khueh uh sih. A ko a lo atah mamih ol te a hnatun bitni.
18 Mah thawnpuei khuiah khaw, tahae tue vaengah khaw, mebang imkhui neh pilnam long khaw, mah kho ah he kutsai pathen a bawk noek moenih. Khohnin aka khum tangtae kah bangla.
19 Balae tih a parhoek te cunghang neh kutbuem la ana voeih. Mamih kah thunkha kaisih yet hmai ah a patang uh.
20 Tedae amah phoeiah tah Pathen a tloe a om pawt khaw m'ming ta. Mah namtu neh mamih n'phap mahpawh tila n'ngai uep coeng ta.
21 Mamih he n'sol uh coeng koinih Judea khaw a sol vetih rhokso khaw a palet uh pawn ni. Te vaengah mamih m'veetnah neh mamih kah thii te a suk bitni.
22 Mah huiko aka ngawn rhoek khaw, khohmuen aka lo rhoek khaw, mah rho aka pong sak khaw, namtom lakli ah tah mamih lu ah ni a tlak eh. Te ah sal m'bi uh tih mamih aka tu kah mikhmuh atah boethae neh rhaidaeng la n'om pawn ni.
23 Sal m'bi he kolonah n'dang hae pawt vetih Boeipa Pathen kah mingthae ni n'saii khoeng eh.
24 Te dongah ka nganpa rhoek, mah huiko taengah awtkoi la om uh sih. Amih kah hingnah he mamih dongah ni a om. Rhokso khaw, bawkim neh hmueituk khaw mamih dongah ni a om.
25 A cungkuem ham he mamih kah Pathen Boeipa taengah uemomnah khueh uh sih. A pa rhoek taengah a saii bangla amah long ni mamih soah noemcainah a khueh.
26 Abraham taengah a saii te khaw poek uh. Isaak te metlam a noemcai nah? Jakob loh a manu kah a nganpa Laban kah tu aka dawn la a om vaengah Syria Mesopotamia balae aka thoeng?
27 Amih taengah a saii bangla mamih he hmai neh n'noem moenih ta. Amih thinko a khe vaenngkah bangla mamih soah phutlohnah a khueh aih moenih ta,” a ti nah.
28 Te dongah Uzziah loh anih te, “Thinko tak lamloh na thui coeng, na ol aka oelh thai u pakhat khaw a om moenih.
29 Tihnin bueng ah na cueihnah he a tueng moenih. Na khosaknah a tongcuek ah ni pilnam loh ya yamingnah he a hmat coeng. Na thinko paihmuen he khaw a dueng la om pai.
30 Pilnam he tuihal coeng tih kaimih ol ka khueh khaw amih loh n'cahoeh uh dongah ni. Olhlo neh ka khueh uh khaw ka phae uh thai moenih.
31 Nang tah Pathen aka rhih nu la na om pai, te dongah Boeipa loh rhotui han tueih saeh lamtah tuito he han koei saeh. Te vaengah tuihalh loh n'koek khaw m'ming voel mahpawh,” a ti nah.
32 Te phoeiah Judtih loh amih te, “Kai ol he hatun uh, mamih kah cadilcahma neh rhuirhong duela aka cet ham koi, hno saii hamla ka om coeng.
33 Tihnin hlaem ah khohmuen vongka ana pai uh lamtah kamah neh ka taengom te ka cet rhoi eh. Mamih thunkha kut dongah khopuei tloeng hamla ol na khueh nah khohnin khuiah he. Ka kut dongah Boeipa loh Israel he a loeih sak bitni.
34 Metla ka saii ham khaw noemcai u boel mai. Ka saii ham koni te ka coeng hlan a tah metla ka saii khaw nangmih taengah kan thui mah pawh,” a ti nah.
35 Te daengah Uzziah neh khoboei rhoek loh anih te, “Ngaimong la cet lamtah nang hmai Boeipa Pathen cet saeh. Mamih kah thunkha rhoek soah khaw phulohnah a khueh bitni,” a ti nah.