14
Alcimus loh Judas A Thuithet
(1Makk 7. 1-21)
1 Kum thum a koe phoeiah tah Seleucus capa Demertirus loh, Tripolis tuikaeng te lan rhalkap, tuipuei rhalkap neh a paan te khaw,
2 khohmuen kah koerhang a loh tih Antiouchus neh a taengom Lysias a ngawn te khaw, Judas neh a hlang rhoek loh olthang a yaak coeng.
3 Te vaengah khosoih ham la om coeng dae paekboenah tue vaengah tah amah muep aka poeih uh Alcimus long tah, a daemnah longpuei neh hmueihtuk caem la a caennah he om voel pawh tila a ming.
4 Anih te mangah hai neh hum uh hamla kum ya sawmnga kum khat vaengah cet. Manghai ham te sui rhuisam neh rhophoe hlaeng khaw, te phoeiah a khosing bangla bawkim lamkah olive thing dawn a khuen pah. Te khohnin ah tah kammueh la duem om.
5 Tedae Demetrius loh ngoltunnah a khue tih Judah rhoek kah a lungbuei neh a ngaihnah kawng te a dawt vaengah tah, anih te a khue. Te dongah a ang te yan hamla a tue a dang coeng.
6 Te vaengah, “Judah rhoek he Hasidean lamkhaw a khue uh, amih kah mawtkung tah Judas Makkabi ni. Ani te rhalthoh ham neh boekoek ni a phul sak. Ram ah rhalmongnah he a ngaih moenih.
7 Kai tah a pa rhoek kah a khuui la ka om tih khosoihham khaw ka bi coeng dae vik n'khoe tih nang taengla ka pawk coeng.
8 Lamhma la kai tah manghai nang ham a rhoeikhangnah ni rhep ka poek tih, a pabae ah pacaboeina ham khaw ka poek bal. Ka thui bangla amih kah a anglat loh namtu yoethae boeih a puei sak te a yol mai moenih.
9 Manghai na mah long khaw he kah olka he a tip la na ming coeng. Ka khohmuen neh ka namtu kah patangnah te poeknah khueh mai lamtah hlang boeih taengah na sitlohnah te tueng sak.
10 Judah a hing khuiah tah uktaemnah dongah rhalmongnah om mahpawh,” a ti nah.
Judas Ngawn Ham Nicarnor A Tueih
11 Bawt a thui van nen tah Judas taengah rhal la aka om manghai paya long khaw Demetrius te hmai bangla a hlup uh coeng.
12 Te dongah Nicanor te a pahoi a tuek. Anih tah vuei rhalboei la a om dongah Judea kah khoboei la a khueh tih pahoi a tueih.
13 Te phoeiah Judas te ngawn ham neh, a lambong rhoek te boeih thaekyak ham khaw, Bawkim puei kah khosoihham la Alcimus te khueh ham khaw ol a paek.
14 Judas taeng lamloh Judea pum la aka yong Gentile rhoek khaw Nicanor neh tukkai hamla capit uh. Judah rhoek yoethae neh citcai pai coeng tih amih khobuhnah ham pawt ni tila a poek uh.
Nicanor neh Judas Rhoepnah
15 Nicarnor a painah neh Gentile rhoek a tingtunnah te Judah rhoek a yaak uh vaengah tah a lu dongah laipi a phul tih Boeipa taengah thangthui uh. Boeipa long tah a pilnam te kumhal aha a thoh tih amah kah rho la a tuuk coeng dongah amah te a phoe pah.
16 Mawtkung long amih te ol a paek tih tlek a tueih dongah Dassau vangca ah tah caemtloek neh tuentah uh.
17 Judas mana Simon te Nicanor neh hum uh. Tedae kolkalah mai ni, rhal loh amih te a yawknah la pahoi a khueh coeng.
18 Tedae Nicanor loh Judas neh a lambong kah a tlung khaw, a khohmuen ham caemtloeknah dongah a thinomnah khaw a yaak vaengah tah dumlai he thilongnah neh khokhan ham te a rhael.
19 Te dongah Posidonius, Theodotus neh Mattathias te a tueih tih paya omnah ham a bih.
20 Ol te a poek het phoeiah tah pilnam mawtkung taengah a yaak sak. Te vaengah lungbuei pakhat la a khueh te tueng tih paipi ok ham a kovai uh.
21 Te dongah mawkung rhoek loh amamih humtunnah khohnin te a khueh uh. Voeivang rhakap lamloh leng khaw a khuen uh tih a hmuen ah ngolkhoel khaw hinyah kap la a khueh uh.
22 Rhal ben lamloh thailat hnukpoh a om khoem atah a ti dongah Judas loh namtlak tom ah a hlang rhoek te sikim la a khueh.
23 Nicanor te Jerusalem ah om ngawn dae bang khaw a saii moenih. A taengla aka cet pilnam hlangping te khaw boeih a tueih.
24 Judas te khaw amah mikhmuh rhawp a khueh tih hlang taengah khaw tlangnaem tlangphai la om.
25 A yuu a ca kawng khaw a dawt dongah Judas loh a yulonah khaw, khosaknah rhamsak kawng khaw a thui pah.
Nicanor Hnukpoh Nah
26 Khat neh a lungnah uh rhoi te Alcimus loh a ming vaengah tah amih rhoi kah paipi te a khueh tih Demetrius taengla cet. Anih loh, “Nicanor he uknah dongah hnukpoh coeng tih ram neh pacaboeina taengah amah hnukthoi la om ham Judas a tuek,” a ti nah.
27 Te vaengah manghai te a cahoeh coeng tih hlang rhong kah laithae ol loh a sai sak. Nicanor taengah ca a pat tih paipi te ka ko a tling moenih, Makkabi te Antiok ah thongtla la tlek hang khuen,” a ti nah.
28 He ol te Nicanor taengla a pha vaengah tah a kothae tih a ngaihmang. Hlang taengah kotluepnah a khueh tangtae te a thae om mueh a phae ham tarha te.
29 Manghai te oel hamla a coeng pawt dongah te a yuengyet tih a tuethen te a dawn.
30 A taengah Nicarnor loh a ning khaw, a noek kah bangla a hum uh vaengah a mangkhak te khaw Makkabi loh a hmuh vaengah tah he bang khoboe he then ha voel pawt la he tila a ming. Te dongah hlang a yol mai mueh la a taengah a coi tih Nicarno taeng lamloh vik thuh uh.
31 Hlang loh a thai neh n'saii coeng tila a ming vaengah tah bawkim cim puei la cet. Khosoih rhoek loh hmueihhlutnah singyoe bangla a nawn te a hmuh taengah hlang te kut dongah han tloeng laeh a ti nah.
32 A ngaih hlang te mela a om khaw ka ming uh moenih tila olhlo neh a toemngam vaengah tah,
33 a bantang kut te hmueihtuk dongla a thueng tih olhlo neh, “Judas te thongtla nan tloeng pawt tah Pathen kah cangimphu khaw a daep vetih, hmueihtuk khaw diklai la ka phil ni, he ah he Dionysus kah bawkim te a rhimom la ka sak ni,” tila a toem a ngam.
34 He tla cal tih a caeh phoeiah tah khosoih rhoek a kut te vaan la a phuel tih mah namtu tungaepkung te hekah ol neh a khue uh.
35 “Cungkuem Boeipa aw, na ngoenah khaw om pawt dae, kamih taengah na bawkim hmuen a om ham he na ngaih ta.
36 Aka cim koek aw, a cim boeih kah Boepa aw, ka ciim uh paek pueng ah, na im he kumhal a poeih pawt ham hoeptlang lah,” a ti uh.
Khohmuen Ham Razis Duek
37 Te vaengah Jerusalem kah a hamca pakhat Razis Nicarnor taengah tholh a pael uh. He kah hlang he a pacaboeina a lung tah a poeknah khaw then, a boe khaw a then dongah Judah rhoek loh a napa la a khue uh.
38 Lamhma ah khaw nih he Gentile rhoek neh a pitpom uh moenih. Judah phung dongah khaw nah aih, Judah phung ham tah a pum neh a hingnah phum ham tlungmu tila a pael uh.
39 Nicanor long khaw Judah rhoek rhalcak la a khueh te tueng sak a ngaih coeng dongah anih te tuuk hamla rhalkap yanga hlai a tuuk.
40 Anih te a tuuk pa vaengah tah Judah rhoek salaem la om ni tila Nicanor loh a poek.
41 Imsang te a loh uh tom vaengah tah khokaep kah vongka te khaw a nen uh coeng. Thohkhaih te hoeh hamla hmai te khaw a loh sak. Koep a vael uh vaengah tah Razis te khaw amah cunghang dongah kaeh uh.
42 Rhal rhoek kut dongah cung tih hlangcong capa neh a tiing mueh la patang lakah tah, rhuepomnah neh duek te ni a ngaih ngai.
43 A thingthuel doela thun uh ngawn dae buelh thun uh thai pawh. Hlangping khaw thohka lamloh huk kung coeng. Te dongah rhalthennah la pangbueng soah yong tih, thinomnah neh amah te hlangping lakli la cungpung.
44 Tedae a hnuk la bang nong uh tih a hmuen te pung a hoeng dongah anih te hmuen hoeng kah a laklung tla.
45 Amih te hing pueng tih a thintoek khaw sai coeng. Koe a thoh hang vaengah tah a thii yawlyawl a coe pah. A hma hoeng la hlang ping te a muk phai tih lungpang kah a ngo dongah pai.
46 A thii khaw boeih a long vaengah tah a kotak te a poh coeng. A kut rhoi neh bok a poh tih hlang ping khuila a haeh. Te vaengah hingnah Boeipa te a khue tih a hingnah te amah taengla a paek. Hetah anih ka dueknah kawng ni.