TITUS CAPAT
(Letter to Titus)
TITUS CAPAT KAWNG
Paul loh Titus he Asia Minor neh Greek ah a om vaengkah bibipuei la puetpuet a thui (2 Kor 2.13; 7.6,13; 8.6,16,23; 12.18; Galati 2.3). Paul loh Titu taengah Crete kah bibikung rhoek te tuek a ti nah.
Khrihca hlangboel kah mawtkung neh bibikung rhoek tah khoboethen neh awtkoi la om saeh (chapter 1.5-9). Boeipa kah hnukbang rhoek boeih tah cue uh saeh lamtah oeltaihnah rhael saeh (1.10—2.9).
Crete kah hlangcom hlangcae boeih te Paul loh ol a uen. Hingnah longpuei thai he tah Pathen loh Jesuh Khrih han tueih dongah ni. Pathen loh hlang hing a khang, a silh tih dungyan hingah, ngaiuepnah a paek. (3.4,5). Titus capat he AD 65 vaengah a tael.
Sawt Yoeinah
Titus ham kuttuknah neh thangthuinah (1.1-4)
Hlangboel Bibikung ham oluennah (1.5-16)
Hlangboel rhaengpuei ham oluennah (2.1—3.11)
Hnukkhueng kah oluennah (3.12-15)
1
Uemnah Ol
1 Pathen kah sal neh Jesuh Khrih kah caeltueih kai Paul loh, Pathen hlang coelh kah tangnah neh oltak mingnah, dungyan hingnah ngaiuepnah dongkah hingcimnah vanbangla kan yaak sak.
2 Te te oltak Pathen loh khosuen tue hlanah ni a kam coeng.
3 Tedae olhoe dongah amah kah olka tah amah tue vaengah phoe coeng. Tekah te mamih khangkung Pathen kah olpaek vanbangla kai taengah a hal coeng.
4 A cui la tangnah dongah ka ca tak Titu taengah, Pa Pathen neh mamih khangkung Jesuh Khrih kah lungvatnah neh ngaimongnah te soep saeh.
Krete ah Titu kah Bibi
5 Te ham ni Krete ah nang kang khueh. Te daengah ni Kai loh nang kan uen vanbangla kho takuem ah a hamca rhoek na tuek vetih a vawtthoek te na soepsoei thai eh.
6 Tedae khat khat ni cimbit la a om atah, yuu va pakhat bueng aka om, a ca rhoek uepom la aka om, cungpoehnah neh thinthah dongah lai om boel saeh.
7 Hiphoelkung he Pathen kah hnokhoem la a om dongah a cimbit la om ham a kuek. Cungpoeh boel saeh, thintoi boel saeh, yumi boel saeh, kuthlah boel saeh, tangkarhai boel saeh.
8 Tedae moeihoeih la, ko-op la, cuepmueih la, a dueng la, a cim la kuemsuem saeh.
9 Thuituennah vanbangla olka te uepom la tu saeh. Te daengah ni thaphoh vetih boekoek rhoek te aka cuem thuituennah nen khaw, toeltham ham khaw a om thai eh.
10 Thinthah rhoek, olhong rhoek neh vuelvaekkung rhoek loh, olpuei la yahvinrhetnah khuikah muep om ngawn.
11 Amih te kamkhuem sak ham a kuek coeng. Amih loh rhaidaeng a ti uh mueh la imkhui tom a palet uh tih amah hoeikhangnah ham te a thuituen uh.
12 Amih khuikah hlang pakhat, amih kah tonghma loh, “Krete, laithae rhoek, boethae maehkai, palyal bungkawng taitu uh mai,” a ti.
13 Hekah laipai tah thuem. Tekah paelnaehnah lamloh amih te rhap toeltham. Te daengah ni tangnah dongah a sa a ding uh eh.
14 Judah rhoek kah yancil neh oltak aka phaelh hlang rhoek kah olpaek te hnatung boeh.
15 A rhoepsaep he aka caih rhoek ham a caih la om. Tedae aka boi rhoek neh aka tangnahmueh rhoek ham tah caih pawh. Tedae amih kah lungbuei neh mingcimnah khaw boi uh coeng.
16 Pathen te ming ham a phong uh dae a khoboe neh a hnawt uh. Rhalawt la om uh tih lokhak uh. Bibi then boeih nen khaw lolhmaih uh.