1 Ephesa khaw awhkaw thlangboel khan ceityih a venawh qee lah: Ve ak awi taw ak tang benawh aihchi khqih ak pawm ingkaw sui maivangnaak khqih anglakawh ak cet thlang ak awi na awm hy. 2 Na ik-oeih sainaak, tha tlawh doena bi na binaak ingkaw, yh thainaak na taaknaakkhqi ce sim nyng. Thlakchekhqi am toek poek thai hyk ti, ceityih na ak sa qukhqi noek a dak tiksaw a hqawng ni amik kqawn hy tice hu hyk ti. 3 Kai ang ming awh kyinaak yh ngah ngah tiksaw nak tha am se hy. 4 Cehlai na lungnaak lamma ce na hoet a dawngawh vawh ka ni oelhnaak awm hy. 5 Ak sang nakawng nang tlaaknaak ce poek lah! Zut nawhtaw lamma awhkaw na saikhqi ce sai tlaih lah. Am nang zut awhtaw, na venawh law kawng nyng saw na maivang ce a awmnaak hun awhkawng thoeih law valh kawng nyng. 6 Cehlai ve a ik-oeih sai ngaihnaak ce ta hyk ti: Nikolaitan a ik-oeih saikhqi ce sawh na hyk ti, kai ingawm sawh na lawt nyng. 7 +Haa ak ta ingtaw, Myihla ing thlangboelkhqi venawh ak kqawn ce za seh. Noengnaak ak takhqi venawh, Khawsa a paradise ak khuiawh ak awm hqingnaak thikthaih ai thainaak ce pe kawng.

8 +Smyrna khaw awhkaw thlangboel khan ceityih a venawh qee lah: Ve ak awi taw lamma ingkaw hudyt na ak awm, thi hlai hy ak hqing tlaih ak awikhqi ni. 9 Khuikha nawh hahqah hyk ti tice sim nyng – cehlai boei hyk ti! Judah thlangkhqi amyihna thlang ak kqawn seetkhqi ce Juda thlangkhqi amni, sinakawk awhkaw setankhqi ni. 10 Khuikhanaak hly kawi awh ce koeh kqih ka nik kqawn law peek khqi ve, setan ing nangmih ak khui awhkaw thlang vang ce noek a dak aham thawng khuina nik thlak khqi kaw, hqa nyn khuiawh khuikha naak hu kawm uk ti. Thih dyna ypawm na awm lah, hqingnaak boei lumyk ce ni pe kawng. 11 +U awm haa ak ta ingtaw, thlangboelkhqi venawh Myihla ing ak kqawn peek awi ce za seh. Noengnaak ak ta thlang taw a hih voei thihnaak ing am tlawh sak qoe voel kaw.

12 Pergamum khaw awhkaw thlangboel khan ceityih a venawh qee lah: Ve ak awi taw hu hai na ak hqat zawzi ak takung ak awikhqi ni. 13 Setan ing ngawihdoelh a taaknaak – na awmnaak ce sim nyng. Cehlai kang ming awh a tak na awm poe hyk ti. Kai awh cangnaak ce am hlat taak hyk ti, kai a ypawm simpyikung na ak awm Antipas a awm awh awm, anih ce Setan a awmnaak na khawk bau khuiawh him uhy. 14 Cehlai, ka ni oelhnaak ik-oeih a khoehca awm hy: Balak ce Isarelkhqi a zoek sak coengawh myiqawl bawknaak buh a an ai sak nawh thawlh sak ham ingkaw nu ingkaw pa thawlhnaak sai aham ak cawngpyi Balam a cawngpyinaak ak ngai thlangkhqi nangmih a venawh awm hy. 15 Cemyih nani kolaitan a cawngpyinaak ak hquutkhqi awm nangmih ak khuiawh awm bai hy. 16 Cedawngawh zut lah! Cemyih am mantaw, na venawh law zy kawng nyng saw kam kha awhkaw zawzi ing cekkhqi ce tuk kawng. 17 +U awm haa ak ta ingtaw, thlangboelkhqi venawh Myihla ing ak kqawn peek awi ce za seh. Ak noeng thlangkhqi venawh, ang hyp mana ce pe kawng. Ak hukhqi doeng ing ni a sim, ming thai qeenaak lungbawk ce pe kawng nyng.

18 Thyatira khaw awhkaw thlangboel khan ceityih a venawh qee lah: Vetaw a mik mai amyihna kqawng nawh a khaw qawhum hloei amyihna ak vang, Khawsa a Capak awikhqi ni. 19 Na ik-oeih sainaak, nak cangnaak ingkaw lungnaak, na bibinaak ingkaw yhnaak, lamma awhkaw na sai anglakawh tuh khawzah khqoet sai hyk ti tice sim nyng. 20 Cehlai ve a dawngawh ka ni oelhnaak awm hy: amah ingkaw amah tawngha ak ti nu Jezebel te toek hyk ti. A cawngpyinaak ak caming ka tyihzawihkhqi nu pa thawlh sainaak ingkaw myiqawl bawknaak lucik buh a ankhqi ainaak benna sawi kang hawh hy. 21 Khawboe seet a sainaak a dawngawh zutnaak aham a tym ka peek hlai am ngaih hy. 22 Cedawngawh kyinaak ihkhun awh buuk kawng nyng saw, ak samphaih thlangkhqi awm anih a cehnaak lam awhkawng a mami zut awhtaw ce a nu ingqawi kyinaak huh sak kawng. 23 Kai ing ce a nu a cakhqi ce him pe kawng nyng. Cawh thlangboel boeih ing kai ce thlang a lingbyi kawlung ak suikung ni ti sim kawm uh, kai ing nami ik-oeih sainaak amyihna ni sam khqi boeih kawng. 24 Thyatira khaw awh ak awm thlak chang, ce a nu a cawngpyinaak amak tukhqi ingkaw Setan a awihdung amak cawngkhqi “Kai ing phyihqih amni phyih sak khqi kawng:” 25 Na taak cemah ka law hlan dy tu khak lah. 26 Noengnaak ak taakhqi ingkaw a boet dyna ak kawngaih ak saikhqi taw, qamkhqik khanawh sai thainaak ce pe kawng – 27 Anih ing cekkhqi ce thi sawnghqawl ing uk khqi kawmsaw, cekkhqi ce am amyihna khawng khqi kqek kqek kaw – kai ing ka pa a venna kaw saithainaak ka huh lawt amyihna. 28 Kai ingawm anih ce mymcang thaike ce pe kawng nyng. 29 U awm haa ak ta ingtaw, Myihla ing thlangboelkhqi venawh ak kqawn awi ce za seh.