14
Paulo bona Banaba Ikonio dekenai
1 Ikonio dekenai Paulo bona Banaba be Iuda taudia edia dubu lalonai idia raka vareai, idia haroro. Bona edia hereva siahu dainai Iuda taudia bona Helene taudia momo herea ese abidadama taudia idia halaoa.
2 To Iuda taudia haida ese idia abidadama henia lasi, vadaeni idia ese idau bese taudia dekenai idia hereva, edia lalona idia ania, ela bona idia badu unai Keristani varavara dekenai.
3 To idia ruaosi be nega daudau unuseni idia noho. Idia hereva goada Lohiabada ena siahu dekenai. Bona Lohiabada ese iena hariharibada ena Sivarai Namona ia hamomokania hoa bona toa kara dekenai. Inai kara be ruaosi edia imana dekenai ia karaia.
4 To hanua taudia be makohia kahana kahana, haida be Iuda taudia danu laloa tamona, haida be aposetolo danu laloa tamona.
5 Vadaeni idau bese taudia bona Iuda taudia haida, mai edia lohia taudia danu idia toreisi, idia ura aposetolo taudia ruaosi idia hadikaia, idia ura nadi dekenai idia hodoa mase.
6 To ruaosi idia diba, vadaeni idia heau, Lukaonia tano idia lao, Lusitera bona Derebe hanua dekenai, bona gabu haida unai kahana dekenai.
7 Unuseni Sivarai Namona idia harorolaia.
Paulo bona Banaba Lusitera dekenai
8 Lusitera dekenai tau ta ia helai noho, iena aena be goada lasi. Ia be ena vara dinana ia mai bona hari ia raka diba lasi.
9 Inai tau ese Paulo ena hereva ia kamonai. Bona Paulo ese ia itaia noho, ma ia diba inai tau ena abidadama be hegeregere dainai, ia hanamoa diba.
10 Vadaeni, Paulo ia hereva goada, ia gwau, “Oi toreisi, oi gini maoromaoro oiemu aena dekenai.” Vadaeni ia roho daekau, ia raka.
11 Taunimanima momo ese Paulo ena kara idia itaia, bona Lukaonia gado dekenai idia boiboi, idia gwau, “Dirava be taunimanima ena toana dekenai idia diho mai ita dekenai.”
12 Bona Banaba ena ladana idia atoa Dio, bona Paulo ena ladana idia atoa Hereme, badina ia be hereva gwauraia tauna dainai.
13 Dio ena dubu be hanua ena vairanai, bona unai dubu ena hahelagaia tauna ese hanua ena ikoukou dekenai ia lao, boromakau tau bona herahera ia mailaia, ia bona taunimanima danu ese boubou idia karaia aposetolo ruaosi dekenai totona.
14 To aposetolo ruaosi, Paulo bona Banaba ese idia kamonai, bona edia dabua idia darea, taunimanima edia huanai idia heau lao, idia boiboi, idia gwau,
15 “Tatau e, badina dahaka umui karaia inai bamona? Ai danu taunimanima, umui bona ai be hegeregere. Ai be Sivarai Namona umui dekenai ai mailaia, umui be dohore inai anina lasi gaudia umui rakatania, bona do umui giroa mauri Dirava dekenai totona. Ia ese guba bona tanobada bona davara bona idia lalonai noho gaudia ibounai ia karaia.
16 Gunaguna neganai Dirava ese bese idauidau edia ura kara dalana ia koua lasi.
17 To ia ese taunimanima dekena amo ia hunia lasi. Lasi, ia ese iena noho ia hamomokania noho, iena kara nomodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.”
18 Inai bamona ruaosi idia hereva, hanua taudia idia koua gwauraia, to hanua taudia idia ura bada boubou idia karaia dainai, idia ruaosi ese unai dala idia koua mai hekwarahi bada danu.
Hanua taudia ese Paulo idia hodoa
19 To Iuda taudia haida be Antioka bona Ikonio dekena amo idia mai, bona idia ese taunimanima momo edia lalona idia ania. Vadaeni taunimanima momo ese Paulo idia hodoa nadi dekenai, hanua ena murimuri dekenai idia veria, idia laloa ia mase vadaeni.
20 To Iesu idia abidadama henia taudia be Paulo dekenai idia gini hagegea, vadaeni ia toreisi, hanua dekenai ia vareai lou. Kerukeru dabai ia bona Banaba danu be Derebe hanua dekenai idia lao.
Antioka dekenai idia giroa lou
21 Idia ruaosi be Derebe hanua dekenai Sivarai Namona idia harorolaia, bona hanua taudia momo be Iesu ena diba tahua taudia idia halaoa. Gabeai Lusitera bona Ikonio bona Antioka dekenai idia giroa lou.
22 Ruaosi ese Iesu ena diba tahua taudia edia kudouna idia hagoadaia. Idia hereva goada, idia gwau, “Abidadama umui dogoatao noho.” Bona idia gwau, “Hisihisi momo lalonai Dirava ena Basileia do ita raka vareai.”
23 Vadaeni ekalesia orea ta ta ibounai dekenai idia ruaosi ese kwarana taudia haida idia abia hidi. Vadaeni mai aniani taravatua bona mai guriguri danu Paulo bona Banaba ese unai Keristani taudia Lohiabada ena imana dekenai idia atoa, ia dekenai idia abidadama henia dainai.
24 Idia ruaosi be Pisidia tano idia raka hanaia, bona idia mai Pamupulia tano dekenai.
25 Perega hanua dekenai hereva idia harorolaia. Gabeai idia diho lao Atalia hanua dekenai.
26 Unai gabu dekena amo lagatoi ta idia guia, idia heau lao Antioka dekenai. Guna inai gabu dekenai ekalesia ese idia ruaosi Dirava ena hariharibada lalonai idia atodia, inai gaukara karaia totona. Hari inai gaukara idia haorea vadaeni.
27 Idia ginidae neganai ekalesia taudia idia haboua. Bona idia amo Dirava ese ia karaia gaudia ibounai ena sivarai idia gwauraia. Idia gwau, “Dirava ese abidadama ena iduara idau bese taudia dekenai ia kehoa vadaeni.”
28 Bona ruaosi ese nega sisina daudau Antioka dekenai idia noho, diba tahua taudia danu.