5
Anania bona Sapira
1 To tau ta ena ladana be Anania, iena adavana Sapira danu, idia edia tano ta idia hoia.
2 To Anania ese unai tano ena davana kahana ia dogoatao, iena adavana danu ia diba. Kahana sibona ia atoa diho aposetolo edia vairana dekenai.
3 To Petero ia gwau, “Anania e, badina dahaka Satani ese oiemu kudouna ia hahonua, bona oi koikoi Lauma Helaga dekenai, tano ena davana kahana oi dogoatao noho?
4 Oi hoia lasi neganai, inai tano be oiemu, a? Bona oi hoia neganai, ena davana be oiemu, a? Badina dahaka inai kara oi laloa oiemu kudouna dekenai? Oi ese taunimanima oi koia lasi, to Dirava oi koia.”
5 Anania be inai hereva ia kamonai neganai, ia moru diho, ia mase momokani. Bona inai sivarai idia kamonai taudia ibounai idia gari maragi lasi.
6 Bona uhau taudia idia toreisi, Anania ena tauanina idia kumia dabua dekenai, idia huaia lao, idia guria.
7 Hora toi bamona ia ore neganai, iena hahine ia raka vareai, to ia diba lasi dahaka ia vara.
8 Bona Petero ia nanadaia, ia gwau, “Oi hamaoroa lau dekenai, umui ruaosi ese tano umui hoia davana gauna be inai, a?”
9 Ia be ia haere, ia gwau, “Oibe, inai sibona.”
Bona Petero ia gwau henia, ia gwau, “Badina dahaka umui ruaosi laloa tamona dekenai Lohiabada ena Lauma umui koia? Itaia, oiemu adavana idia guria memero be idia raka mai inai, bona oi danu do idia huaia lao.”
10 Bona nega tamona Petero ena aena badinai ma ia moru diho, ia mase momokani. Bona uhau taudia idia raka vareai, idia itaia inai hahine ia mase vadaeni. Bona idia huaia lao, idia guria iena tau ena badinai.
11 Vadaeni unai neganai, ekalesia taudia ibounai, bona sivarai idia kamonai taudia ibounai ese gari bada idia abia.
Toa momo herea
12 Toa kara bona hoa kara momo aposetolo taudia idia karaia hanua taudia edia vairana dekenai, bona ibounai Dubu Helaga dekenai idia haboua noho, Solomona ena Dehe lalonai, mai edia lalona tamona danu.
13 To taunimanima haida idia dekenai idia haboua lasi, badina idia gari dainai. To hanua taudia ese ekalesia taudia edia kara idia hanamoa, mai moale danu.
14 Bona Lohiabada idia abidadama henia taudia momo herea, tatau bona hahine idia dekenai idia haboua lao.
15 Gorere taudia danu idia huaia lao, dala badinai idia atodia diho, geda bona patapata latanai, Petero ia raka hanaia neganai, iena laulau be dina ese edia latanai do ia atoa totona.
16 Ierusalema kahirakahira hanua taudia momo danu idia haboua. Idia ese gorere taudia bona mai lauma dika taudia idia abia lao, bona ibounai ese mauri idia davaria.
Aneru ese dibura ruma ia kehoa
17 Bona Hahelagaia Tauna Badana mai ena bamona taudia, Sadukea edia orea taudia be idia mama bada herea.
18 Vadaeni idia ese aposetolo taudia idia dogoatao, bona dibura ruma lalonai idia koua.
19 To hanuaboi neganai, Lohiabada ena aneru ta ese dibura ruma ena iduara ia kehoa, idia ia hakaua lao murimuri dekenai bona ia gwau,
20 “Vadaeni umui lao, Dubu Helaga lalonai umui gini, bona inai mauri matamata herevana ibounai hanua taudia dekenai do umui hadibaia.”
21 Inai hereva idia kamonai, vadaeni daba maragi neganai Dubu Helaga lalonai idia raka vareai, bona edia hadibaia gaukara idia hamatamaia.
To Hahelagaia Tauna Badana mai ena bamona taudia ese, kaunsolo taudia bona Israela ena tau badadia idia haboudia, bona hereva idia siaia dibura ruma dekenai, aposetolo taudia idia hakaua mai totona.
22 Opesa taudia idia lao, to dibura ruma lalonai aposetolo taudia idia davaria lasi. Idia giroa lou bona kaunsolo dekenai idia hamaoroa, idia gwau,
23 “Dibura ruma dekenai ai ginidae neganai iduara be koua namonamo, gima taudia danu iduara badinai idia gini, to iduara ai kehoa neganai, tau ta ai davaria lasi.”
24 Dubu biagudia bona Dubu Helaga pulisi taudia edia lohia, bona dubu biagudia ese inai hereva idia kamonai neganai idia daradara bada, idia diba lasi inai kara ena anina be dahaka.
Aposetolo idia hedinarai kota dekenai
25 Bona tau ta idia dekenai ia lao, ia samani, ia gwau, “Dibura ruma dekenai umui koua taudia be Dubu Helaga lalonai idia gini, hanua taudia idia hadibaia noho.”
26 Vadaeni Dubu Helaga pulisi taudia edia lohia bona iena hesiai taudia danu idia lao, aposetolo taudia idia hakaua mai, to idia dagedage henidia lasi, hanua taudia ese nadi dekenai idia do idia hodoa garina.
27 Idia hakaudia vareai, kaunsolo taudia edia vairana dekenai idia gini, bona Hahelagaia Tauna Badana ese idia ia nanadaia.
28 Ia gwau, “Ai ese taravatu ai atoa, umui hadibaia lasi inai ladana dekenai. To hari emui hadibaia hereva dekenai Ierusalema ibounai umui hahonua vadaeni, bona inai tau ena mase badina umui atoa ai dekenai.”
29 To Petero bona aposetolo taudia danu idia haere, idia gwau, “Dirava ai kamonai henia be namo, taunimanima ai kamonai henia be dika.
30 Inai Iesu, umui ese satauro dekenai umui atoa, umui alaia mase, be iseda tamadia edia Dirava ese ia hatorea isi vadaeni.
31 Bona Dirava ese danu Iesu ia abia daekau iena imana idibana dekenai. Dirava ese inai Iesu iseda Gunalaia Tauna bona Hamauria Tauna ia halaoa vadaeni, Israela taudia ese edia lalona do idia giroa, bona edia kara dika do ia gwauatao totona.
32 Inai gaudia dekenai ai be gwauraia hedinarai taudia, Lauma Helaga ese danu inai gaudia ia gwauraia hedinarai. Inai Lauma be Dirava ese ia henia iena kamonai henia taudia dekenai.”
Gamaliela ia sisiba, Kaunsolo ese Aposetolo do ia hadikaia lasi
33 Kaunsolo taudia ese unai hereva idia kamonai neganai, idia badu maragi lasi, bona idia ura aposetolo idia alaia mase.
34 To Farisea tauna ta, ena ladana be Gamaliela, ia toreisi kaunsolo lalonai, ia be taravatu hadibaia tauna ta, taunimanima ibounai idia matauraia. Ia hereva goada, aposetolo taudia idia siaia lao murimuri dekenai nega sisina.
35 Idia siaia lao, vadaeni kaunsolo dekenai Gamaliela ia gwau, “Israela taudia e, umui naria namonamo dahaka umui karaia inai taudia dekenai.
36 Guna Teuda ia toreisi. Ia gwau, ‘Lau be mai ladana.’ Bona ia dekenai taunimanima 400 bamona idia hakapua, to ia danu idia alaia mase, bona iena orea taudia ibounai be idia heau boio, bona edia gaukara be ia ore vadaeni.
37 Teuda ena murinai Iuda, Galilea tauna, be taunimanima edia ladana torea nega dekenai ia toreisi, taunimanima momo ia dekenai ia veridia, to ia danu idia alaia mase, bona iena orea taudia ibounai be idia heau boio, bona edia gaukara be ia ore vadaeni.
38 Inai dainai lau hamaoroa umui, inai taudia umui dogoatao lasi, umui rakatanidia. Badina be bema inai hereva bona inai kara be taunimanima dekena amo ia mai, dohore anina ia vara lasi.
39 To, bema ia be Dirava dekena amo ia mai, umui be hegeregere lasi edia dala umui koua, Dirava danu umui tuari henia garina.”
Aposetolo idia moale, Keriso ena ladana dekenai hisihisi idia abia dainai
40 Kaunsolo ese Gamaliela ena hereva idia kamonai henia, vadaeni aposetolo idia boiria idia mai, bona ibounai idia dadabaia. Ma taravatu idia atoa, Iesu ena ladana dekenai idia hadibaia lou lasi, vadaeni idia ruhaia, idia siadia lao.
41 Unai neganai, aposetolo taudia ese kaunsolo idia rakatania mai moale bada danu. Edia moale badina be, Dirava ese idia ia abia hidi vadaeni Iesu ena ladana dainai hisihisi do idia abia.
42 Bona dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.