9
Keristani taudia ibounai ta ta dekenai durua idia henia
1 Umui diba vadaeni ai ese moni ai haboua noho, Dirava ena taudia Iudea dekenai durua totona. Unai dainai inai gau totona hereva momo do lau torea lasi.
2 Lau diba emui kara, umui ura bada idia do umui durua, bona lau ese Makedonia taudia edia vairanai umui lau heagilaia. Lau gwau, “Akaia varavara taudia be guna lagani ia mai bona harihari edia durua henia totona idia hegaegae vadaeni.” Emui goada sivaraina idia kamonai, vadaeni Makedonia taudia momo ese idia ura durua henia danu.
3 To inai Keristani varavara taudia umui dekenai lau siaia noho, umui emui kara lau heagilaia be hereva kava garina. Inai anina be, lau ura umui emui durua moni do umui abia hegaegae, idia lau hamaoroa bamona.
4 To bema Makedonia taudia haida ese lau do idia bamoa, bona bema ai davaria umui be hegaegae lasi neganai, aiemai hemarai do ia bada herea, ani? Umui danu do umui hemarai, umui ai heagilaia kava dainai.
5 Unai dainai lau laloa iseda varavara taudia lau noia be namo, umui dekenai do idia ginidae guna. Vadaeni umui emui gwauhamata harihari gauna do idia haboua hegaegae. Bona lau ginidae neganai moni do ia noho hegaegae, bona inai kara dekena amo do umui hedinaraia, lalokau dainai umui henia, bona lauegu oda dainai lasi.
6 Inai hereva mani do umui laloa namonamo: Uhe momo lasi ia hadoa tauna be anina momo lasi do ia geia, to uhe momo do ia hadoa tauna be anina momo do ia geia.
7 Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.
8 Dirava be mai ena siahu emui kohu do ia habadaia, vadaeni emui ura gaudia, ma gau haida, ia dekena amo do umui abia. Unai dainai nega ibounai gau momo umui abia dainai, durua kara namodia do umui karaia diba.
9 Buka Helaga lalonai ia torea hegeregerena, ia gwau:
“Ogogami taudia dekenai ia henia badabada tauna,
be iena bogahisihisi kara do ia noho hanaihanai.”
10 Dirava ese taunimanima dekenai uhe ia henia, do idia hadoa totona, bona aniani ia henia, do idia ania totona. Ia ese uhe umui dekenai do ia henia, bona do ia hatubua bada. Bona ia ese emui bogahisihisi kara namodia dekena amo huahua momo do ia havaraia.
11 Oibe, Dirava ese nega ibounai emui kohu do ia habadaia, vadaeni bogahisihisi kara momo do umui karaia diba. Unai dekena amo taunimanima momo ese Dirava do idia hanamoa, umui emui harihari gaudia dainai, ai ese idia dekenai ai abia lao gaudia be unai.
12 Badina be emui harihari gaudia ese Dirava ena taudia idia durua bada, idia dekenai hegeregere lasi gaudia ibounai idia davaria vadaeni. To inai sibona lasi, emui harihari gaudia ese Dirava hanamoa henia kara ia habadaia noho danu.
13 Inai umui ese umui karaia durua gaukara ese emui abidadama kara ia hedinaraia. Iseda Keristani varavara taudia ibounai do idia diba umui ese Dirava ena hereva umui badinaia, bona Keriso ena Sivarai Namona umui gwauraia hedinarai. Bona emui harihari gaudia idia dekenai bona haida dekenai danu idia itaia neganai, Dirava do idia hanamoa bada.
14 Idia ese umui do idia lalokau henia, bona Dirava do idia noia, ia ese umui do ia hanamoa. Badina korikori be, Dirava ena hariharibada be umui dekenai ia noho momokani dainai.
15 Namona be Dirava ita hanamoa bada, iena hariharibada namo herea momokani dainai. Inai hariharibada ia bada herea dainai, iena anina be, tau ta ia gwauraia namonamo diba lasi.