2
Abidadama goada ese hadibaia hereva koikoi do ia koua
1 Lau ura umui diba, lau hekwarahi bada herea umui dainai, bona Laodikea taudia dainai danu. Bona lau idia diba lasi taudia momo dainai danu lau gaukara momo vadaeni.
2 Inai bamona lau karaia, umui emui lalona do idia goada totona, bona lalokau dekenai do umui noho hebou totona. Lau ura danu laloa diari momokani bona aonega do umui davaria, vadaeni emui abidadama do ia goada. Bona inai dekena amo Dirava ena hunia hereva ena anina do umui diba. Keriso sibona be inai hunia hereva ena anina.
3 Keriso be ki bamona, ia ese Dirava ena aonega ibounai bona diba ibounai, hunia gaudia, ia kehoa noho.
4 Inai bamona lau hereva, haida ese hadibaia hereva kerere dekena amo umui do idia koia garina.
5 Badina be lauegu tauanina be umui dekenai ia noho lasi, to lauegu laumana be umui danu ia noho. Bona lau moale danu, badina emui gaukara be maoromaoro, bona Keriso umui abidadama henia mai goada, bona mai emui lalona tamona danu.
Keriso lalonai umui noho dainai mauri momokani umui davaria
6 Keriso Iesu umui abia dae emui Lohiabada dainai, umui be ia lalonai umui noho vadaeni.
7 Umui gini goada noho, Keriso dainai, au ese ia gini goada iena ramuna dainai bamona. Bona Keriso ena latanai emui mauri do umui haginia, ruma idia haginia nadi goadana ena latanai bamona. Ai ese umui ai hadibaia Sivarai Namona do umui abidadama henia goada, bona nega ibounai Dirava do umui tanikiu henia.
8 Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.
9 Badina be Dirava ena mauri bona kara ibounai be Keriso ena tauanina lalonai idia noho.
10 Keriso lalonai umui noho dainai, mauri momokani umui abia vadaeni. Keriso be gunalaia laumadia ibounai bona siahu taudia ibounai edia biaguna.
11 Keriso lalonai umui noho dainai, kopina utua kara umui abia vadaeni, to taunimanima edia imana dekena amo kopina utua gauna lasi. Ia be tauanina gauna lasi. Lasi. To Keriso ena kopina utua kara umui abia vadaeni. Unai dainai emui mauri gunana ena siahu dekena amo Keriso ese umui ia ruhaia vadaeni.
12 Umui emui bapatiso neganai, Keriso danu umui idia guria hebou. Bona unai bapatiso neganai, Keriso danu umui toreisi lou hebou. Inai bamona ia vara, badina be Dirava ena siahu umui abidadama henia dainai. Unai siahu ese Keriso ia hatorea isi lou mase dekena amo.
13 Guna umui ese kerere idauidau umui karaia, bona emui tauanina ena ura dikadia umui karaia. Umui be Iuda lasi taudia, ma Taravatu danu umui badinaia lasi. Unai bamona umui dika dainai, emui lauma idia mase. To Dirava ese umui ia hamauria lou Keriso danu. Momokani, Dirava ese unai iseda dika ibounai ia gwauatao.
14 Taravatu momo be ita ese ita utua dainai, iseda samania hereva be momo, vadaeni iseda kerere pepa be ia noho. To Dirava ese iseda kerere pepa be satauro dekenai ia ikoko karaia, vadaeni iseda kerere be idia ore.
15 Ma unai satauro ena latanai, Keriso ese siahu laumadia bona gunalaia laumadia edia siahu ia kokia momokani, bona taunimanima edia vairanai, anina lasi gaudia ia halaodia, ia hahemaraidia.
16 Unai dainai, tau ta ese taravatu do ia gwauraia lasi emui aniani totona, o emui inuinu totona, o aria dina badana totona, hua matamata dinana totona, o Sabati Dinana totona.
17 Unai gaudia guna be mai edia anina, to hari edia anina be bada lasi. Anina korikori gauna be Keriso sibona.
18 Bema tau ta ese mata hanai lalonai ia itaia gaudia ia herevalaia momo, bona ia ese mai manau koikoi danu aneru ia tomadiho henia, unai tau do umui naria, umui do ia koia garina. Unai bamona tauna do ia laloa ia be tau badana, bona umui emui lalona do ia ania gwauraia, iena kara bamona do umui karaia totona. Do ia gwau umui be kerere, to do umui kamonai henia lasi, badina tauanina ena laloa kavakava dainai, hekokoroku kava be unai tau ena lalonai ia vareai vadaeni.
19 Ia ese Keriso ia dogoatao noho lasi. Keriso be tauanina ena kwarana. Inai kwarana dekena amo tauanina ese goada ia abia noho, bona kwarana ese garugaru bona varovaro ia hatamonaia. Vadaeni Dirava ese ia ubua dainai, tauanina ia tubu namonamo noho.
Keriso danu ita mase hebou
20 Keriso danu umui mase hebou dainai, tanobada bona guba edia siahu laumadia edia siahu umui dekenai be Keriso ese ia kokia vadaeni. Unai dainai, badina dahaka inai tanobada taudia bamona umui do mauri noho? Badina dahaka inai bamona taravatu umui kamonai henia noho:
21 “Umui dogoatao lasi,” bona “Unai aniani umui ania lasi,” bona “Imana umui atoa lasi?”
22 Inai bamona idia taravatua gaudia be, ita gaukaralaia murinai, do idia ore haraga gaudia sibona. Taunimanima sibona ese inai bamona taravatu idia karaia bona hadibaia.
23 Inai bamona taravatu edia toana be aonega hereva dainai, umui idia koia diba, badina do umui laloa idia ese emui guriguri kara do idia hagoadaia. To inai taravatu idia karaia taudia ese aneru dekenai idia tomadiho henia, idia manau koikoi, bona idia sibona ese edia tauanina idia hisihisi henia. Inai karadia be anina lasi, badina be idia ese taunimanima edia tauanina edia ura dikadia idia koua diba lasi.