7
Boroma dagedage 4 ena mata hanai
1 Belesasa ia king Babulonia dekenai lagani ginigunana lalonai Daniela ese nihi ta ia davaria, bona iena mahuta patana dekenai ia hekure noho neganai, mata hanai ia itaia. Vadaeni ia ese nihi ena sivarai ia torea, bona ena anina ia hedinaraia.
2 Daniela ia gwau, “Hanuaboi lalonai mata hanai dekena amo lau itaia, guba ena lai 4 idia toa goada herea, vadaeni davara ia hurehure bada.
3 “Boroma dagedage 4 davara dekena amo idia daekau mai, ta ta edia toana be idauidau.
4 Ginigunana ena toana be laiona bamona, bona ia be mai ena huina, ugava manu ena hanina bamona. Lau itaia noho neganai iena hanina idia kokia oho. Vadaeni laiona be sibona ia abia isi, aena ruaosi dekenai ia gini, taunimanima bamona. Iena lalona danu be taunimanima edia lalona bamona ia davaria.
5 “Ma boroma dagedage ta lau itaia. Unai boroma dagedage ena toana be bea bamona. Ia be ena murina kahana aena dekenai sibona ia gini. Iena uduna dekenai be rudu turiana toi iena isena dekenai ia dogoatao, bona gado ta ese bea dekenai ia hereva henia, ia gwau, ‘Toreisi, vamu momo oi ania.’
6 “Lau itaia noho neganai boroma dagedage ma ta lau itaia. Iena toana be lepadi bamona. Iena doruna dekenai be hanina 4 idia noho, manu hanina bamona. Lepadi ena kwarana be 4. Siahu bada ia abia, do ia lohia totona.
7 “Lau itaia noho neganai, boroma dagedage namba 4 lau itaia, gari gauna momokani bona goada dikadika danu. Iena isena dekenai be auri badadia bona gau momo ia ania ore. Ia ania gaudia ia koria dikadika. Ia ania lasi gaudia be momoru bamona ena aena dekenai ia moia diho. Iena toana be idau momokani, mauri gaudia haida 3 bamona lasi. Iena doana be ibounai 10.
8 “Lau itaia noho neganai, doa maragina ta be unai doa 10 edia huanai dekena amo ia tubu daekau. Inai doa maragina ese unai doa 10 dekena amo toi ia kokia oho. Unai doa maragina be mai ena matana, taunimanima ena matana bamona, bona mai ena uduna, bona inai uduna dekena amo hekokoroku herevadia ia gwauraia.
Mauri Noho Hanaihanai Tauna ena mata hanai
9 “Lau itaia noho neganai, gabu ta ta dekenai terona idia atoa. Mauri Noho Hanaihanai Tauna ia mai, terona ta dekenai ia helai. Iena dabua be kurokuro momokani sinou bamona, bona iena huina be kurokuro momokani, mamoe huina goevana bamona. Iena terona be mai uili, bona lahi be terona ena kahana ibounai ia hururu noho.
10 “Unai Tau ena terona dekena amo be lahi ia mai, sinavai ena ranu bamona ia heau lao. Taunimanima momo herea ese unai Tau ena hesiai gaukara idia karaia, bona milioni momo ese iena vairana dekenai idia gini. Kota badana ena nega ia ginidae, bona buka danu idia kehoa.
11 “Lau itaia noho neganai, inai doa maragina ese hekokoroku hereva momo ia gwauraia, lau kamonai noho. Lau itaia noho neganai, inai boroma dagedage namba 4 idia alaia mase, bona iena tauanina idia negea lahi dekenai, idia gabua ore.
12 “Unai boroma dagedage haida 3 edia siahu be idia kokia, to do idia mauri noho ela bona ma nega ta idia gwauraia hegeregerena.
13 “Unai hanuaboi lalonai mata hanai dekenai lau itaia, Tau ta ia noho, iena toana be taunimanima edia toana bamona. Ori lalonai ia raka mai kahirakahira, bona ia lao unai Mauri Noho Hanaihanai Tauna dekenai, iena vairana dekenai ia gini, bona Badana ese ia abia dae.
14 Badana ese siahu bona mataurai bona dagi bada be unui Tau dekenai ia henia, bese ibounai bona iduhu ibounai bona gado ibounai taudia ese iena hesiai gaukara do idia karaia. Iena siahu be do ia noho hanaihanai, bona iena basileia be do ia doko diba lasi.
Nihi edia anina ia hedinaraia
15 “Unai mata hanai, lau itaia gauna dekenai lau hoa bona lau laloa hekwarahi dikadika.
16 Lau lao unuseni ia gini noho tauna ta dekenai, vadaeni lau noia unai gau ibounai edia anina lau dekenai do ia hadibaia.
“Vadaeni unai gau ibounai edia anina ia hadibaia, ia gwau,
17 ‘Unai boroma badadia 4 be basileia 4 edia toana, inai tanobada dekenai do idia toreisi.
18 To Ataiai Momokani Dirava ena helaga taudia ese basileia do idia abia, king siahuna danu do idia abia, bona inai siahu do ia noho idia dekenai ela bona hanaihanai.’ ”
19 “Vadaeni lau Daniela ma gau haida lau ura diba, inai boroma namba 4 herevana, ia be haida bamona lasi, to gari dikadika gauna, iena isena be auri, bona iena kahau be auri labora. Ia ese gau ia ania dikadika, bona gau ibounai ia moia diho gauna.
20 “Ma lau ura diba danu unai doa 10 iena kwarana dekenai idia noho gaudia herevana, bona unai doa ta danu, gabeai ia toreisi gauna, bona iena doana toi ia kokia oho gaudia. Ia be mai matana bona mai uduna, ia ese hekokoroku hereva ia gwauraia danu. Inai gabeai ia toreisi doana lau itaia, be gari bada gauna, bona ia be doana haida bamona lasi.
21 Lau itaia noho neganai, unai doana ese Dirava ena helaga taudia ia tuari henidia bona ia kwalimu danu.
22 “Mauri Noho Hanaihanai Tauna ia mai, bona ia ese kota ia karaia, iena kota hereva ese Ataiai Momokani Dirava ena helaga taudia ia durudia. Nega ia ginidae vadaeni, Dirava ena helaga taudia ese basileia do idia abia.
23 “Unai tau ese nihi ena anina ia gwauraia be inai: ‘Boroma dagedage namba 4 ia toreisi bona ia idau momokani, iena kara be basileia haida edia kara bamona lasi. Ia ese inai tanobada ibounai do ia ania ore, bona do ia moia diho momokani.
24 “ ‘Unai doa 10 be king 10, unai basileia dekena amo do idia toreisi. King ma ta danu do ia toreisi, bona ia ese king toi do ia hamorudia.
25 Ia ese hekokoroku hereva do ia gwauraia, Ataiai Momokani Dirava ena helaga taudia do ia dagedage bada henidia. Nega bona taravatu do ia haidaua toho, bona Dirava ena taudia do idia noho iena siahu henunai, lagani ta bona lagani rua bona lagani kahana ta lalonai.
26 “ ‘To unai neganai guba ena kota Biaguna Badana ese iena kota do ia hamatamaia, bona unai king ena siahu do ia kokia momokani.
27 “ ‘Inai tanobada ena bese ibounai edia siahu be do ia henia Ataiai Momokani Dirava ena helaga taudia dekenai. Edia siahu be do ia ore diba lasi, bona basileia ibounai ese Dirava ena hesiai gaukara do idia karaia, bona do idia kamonai henia.’
28 “Hereva ena dokona be inai. Lau, Daniela, gari bada ese lau ia abia dainai, lauegu vairana ena toana ia idau, to egu lalona dekenai inai hereva lau dogoatao noho.”