18
Hahelagaia taudia bona Levi taudia dekenai harihari gaudia
1 Mose ma ia hereva, ia gwau, “Hahelagaia taudia, Levi taudia, bona Levi iduhu taudia ibounai ese Israela ena tano ta do idia biagua lasi. Edia gaukara davana be tamona, lahi dekenai idia gabua bouboudia, bona boubou idauidau, taunimanima ese Lohiabada dekenai idia mailaia gaudia.
2 Levi taudia ese tano do idia biagua lasi, iduhu haida ese idia biagua bamona. To edia davana be inai: Lohiabada be edia ahuna, ia ese ia gwauhamata vadaeni hegeregerena.
3 “Hahelagaia taudia edia davana, taunimanima edia boubou gaudia dekena amo, be boromakau o mamoe edia pagana, edia aukina, bona edia bogana ibounai.
4 Umui ese emui uiti ena anina ginigunana, emui uaina matamata, emui olive dehoro, bona emui mamoe ena huina matamata be hahelagaia taudia dekenai do umui henia.
5 Badina be Lohiabada, emui Dirava, ese idia ia abia hidi vadaeni, emui iduhu ibounai edia huanai dekena amo. Io, Levi iduhu taudia, bona edia natudia, tubudia ese Lohiabada ena hahelagaia gaukara do idia karaia ela bona hanaihanai.
6 “Bema Levi tauna ta ia ura bada helaga gaukara do ia karaia, vadaeni iena noho hanua Israela lalonai do ia rakatania, bona Lohiabada ese ia abia hidi tomadiho gabuna dekenai ia vareai diba.
7 Unuseni ia ese Lohiabada, iena Dirava, ena ladana dekenai helaga gaukara do ia karaia diba, Lohiabada ena vairanai, iena varavara Levi taudia ese unuseni idia karaia noho hegeregerena.
8 Bona ia ese idia danu edia aniani hegeregerena do ia ania. Ma bema iena hanua taudia ese moni o kohu idia siaia, ia ese do ia dogoatao diba, iena.
Dirava diba lasi taudia edia kara do umui karaia lasi
9 “Lohiabada, emui Dirava, umui dekenai do ia henia tano dekenai do umui raka vareai neganai, unuseni idia noho bese taudia edia kara bodaga do umui karaia lasi.
10 Umui ese emui natudia be lahi dekenai do umui gabua lasi. Meamea kara do umui karaia lasi, puripuri bona vada danu do umui karaia lasi.
11 Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi.
12 “Lohiabada, emui Dirava ese unai bamona kara bodaga idia karaia taudia ia badu henia noho. Bona unai tano hari idia noho bese taudia ese bodaga karadia unai bamona idia karaia noho dainai, Lohiabada ese umui emui vairana dekena amo ia luludia noho.
13 Do umui noho namonamo, kerere ta lasi, Lohiabada, emui Dirava ena vairanai.”
Dirava ia gwauhamata, peroveta taudia do ia siaia
14 Mose ia gwau, “Unai tano, do umui noholaia tanona dekenai noho bese taudia ese meamea taudia bona lauma dika abia taudia idia kamonai henidia noho. To Lohiabada emui Dirava ese umui ia taravatua vadaeni, ia gwau unai bamona do umui karaia lasi.
15 To Lohiabada, emui Dirava ese peroveta tauna, lau hegeregere, umui dekenai do ia siaia. Ia be umui emui bese tauna ta, bona umui ese do umui kamonai henia.
16 “Sinai Ororo dekenai umui hebou dinana dekenai, umui ese Lohiabada, emui Dirava umui noia, umui gwau, ‘Mani emu kara, Lohiabada aiemai Dirava, ena gadona do ai kamonai lou lasi, bona iena lahi do ai itaia lou lasi, do ai mase garina.’
17 “Vadaeni Lohiabada ese lau dekenai ia hereva, ia gwau, ‘Edia noinoi be maoromaoro,
18 lau ese edia bese huanai dekena amo peroveta tauna ta do lau abia hidi, oi hegeregere, bona lauegu hereva be iena uduna dekenai do lau gwauraia. Bona lauegu oda hereva ibounai be ia ese taunimanima dekenai do ia hamaoroa.
19 Inai peroveta tauna be lauegu ladana dekenai do ia hereva, bona daika ese unai hereva ia abia dae lasi, lau ese davana do lau henia.
20 To bema peroveta tauna ta ese lau gwauraia lasi herevana ta lauegu ladana dekenai ia gwauraia, unai peroveta tauna be do umui hamasea. Bona bema peroveta tauna ta be idau dirava edia ladana dekenai hereva ia gwauraia neganai, unai peroveta tauna danu do umui alaia.’
21 “Sedira do umui laloa daradara, umui gwau, ‘Edena bamona do ai diba peroveta tauna ta ese Lohiabada dekena amo ia mai lasi herevana ia gwauraia noho?’
22 Bema peroveta tauna ta ese hereva ta Lohiabada ena ladana dekenai ia gwauraia, to unai hereva be momokani lasi, bona iena anina ia vara lasi neganai, unai be Lohiabada ena hereva lasi. Unai bamona peroveta tauna be sibona ena siahu dekenai ia hereva, unai dainai do umui gari henia lasi.