25
1 “Sedira Israela taudia rua idia heai, vadaeni kota dekenai idia lao, kerere lasi tauna idia ruhaia, bona kerere tauna be iena dika davana idia henia.
2 Bema kerere tauna ena davana be do idia dadabaia, kota biaguna ese do ia oda henia, vadaeni iena vairana dekenai kerere tauna do idia hahekurea diho, bona do idia kwadia nega haida, iena kerere ena metau hegeregere.
3 Do idia kwadia diba ela bona nega 40, to nega 40 do idia hanaia diba lasi, emui varavara tauna be umui emui vairana dekenai ia hemarai dika garina.
4 “Boromakau ese uiti ia moia neganai, iena uduna do umui guia lasi.”
Tadikaka ena vabu do umui durua
5 “Bema tadikaka taudia idia noho hebou, vadaeni ta ia mase natuna lasi, iena vabu be idau tauna ta do ia adavaia lasi. Lasi, to unai mase tauna ena tadikakana ese unai vabu do ia adavaia. Unai be, vabu ena nakimi ena kara korikori do ia karaia.
6 Vadaeni edia natuna vara guna ese mase tauna ena ladana do ia abia. Unai dekena amo iena ladana be Israela dekenai do ia boio lasi.
7 “To bema tau ta ia ura lasi iena tadikakana ena vabu do ia adavaia neganai, unai vabu be hanua ena tau badadia dekenai do ia lao, do ia gwau, ‘Lauegu adavana ena tadikakana ia ura lasi nakimi ena kara korikori do ia karaia. Ia ura lasi iena tadikakana ena ladana do ia atoa Israela dekenai.’
8 Unai neganai hanua tau badadia ese unai tau do idia boiria, do idia hereva henia. Vadaeni, bema unai tau ese iena hereva do ia ha-aukaia, bona bema ia gwau, ‘Lau ura lasi lauegu nakimi lau adavaia,’
9 unai neganai vabu be do ia raka kahirakahira, hanua tau badadia edia vairana dekenai iena nakimi ena tamaka do ia kokia, bona iena vairana do ia kanudia, do ia gwau, ‘Tadikakana ena bese do ia havaraia lasi tauna dekenai be unai bamona do idia karaia.’
10 Vadaeni unai tau ena ruma be Israela dekenai iena ladana do idia atoa, ‘Tamaka kokia tauna ena ruma.’
Mose ese taravatu ma haida ia gwauraia
11 “Sedira tau rua idia heatu, vadaeni idia ta ena adavana ese iena tau durua totona unai idau tauna ena abona do ia dogoatao.
12 Unai hahine dekenai do umui bogahisihisi lasi, iena imana do umui utua oho.
13 “Oiemu puse lalonai metau hahetoho gaudia rua, momokani gauna bona koikoi gauna ruaosi do oi udaia lasi.
14 Oiemu ruma dekenai danu paraoa o bali ena bada tohoa gaudia rua, momokani gauna bona koikoi gauna do idia noho lasi.
15 To oiemu metau hahetoho gauna be do ia maoromaoro, bona oiemu paraoa ena bada tohoa gauna danu be maoromaoro, vadaeni oiemu mauri dinadia do idia momo, Lohiabada, emu Dirava ese oi do ia henia tano dekenai.
16 Badina be unai bamona kara koikoi idia karaia taudia be Lohiabada oiemu Dirava ia badu henia noho.
Mose ese ia oda henidia Amaleka taudia do idia alaia
17 “Aigupito dekena amo umui raka mai neganai, Amaleka taudia ese umui dekenai idia karaia kara do umui laloatao.
18 Dala dekenai umui idia davaria, umui be manori bona manoka neganai, bona murina dekenai madi idia raka metairametaira Israela taudia ibounai idia alaia mase. Io, inai Amaleka taudia ese Dirava dekenai idia gari henia lasi.
19 Unai dainai, Lohiabada emui Dirava, umui ia henia do umui noho tano dekenai, dagedage taudia dekena amo laga-ani umui dekenai ia henia neganai, unai Amaleka taudia ibounai do umui alaia mase. Do umui aladia ore momokani, vadaeni tau ta ese idia do ia laloa lou lasi. Inai kara do umui karaia, laloaboio lasi!”