6
Taravatu badana momokani
1 Ma Mose ia gwau, “Inai Taravatu ibounai be Lohiabada emui Dirava ese lau dekenai ia henia. Inai Taravatu be umui dekenai lau hadibaia, unai do umui raka vareai bona abia tano lalonai, idia do umui badinaia totona.
2 Vadaeni Lohiabada emui Dirava do umui gari henia, iena Taravatu, umui dekenai lau henia gaudia, do umui badinaia, umui bona emui natudia bona emui tubudia, emui mauri dinadia ibounai lalonai. Unai bamona neganai, emui mauri dinadia be do idia momo.
3 Israela taudia e, inai Taravatu do umui kamonai henidia namonamo. Unai bamona neganai do umui namo, bona do umui goada bona momo herea, rata bona hani dekenai ia honu tanona lalonai. Lohiabada, emui sene taudia edia Dirava, ese inai bamona ia gwauhamata henia vadaeni.
4 “Israela taudia e, umui kamonai! Lohiabada be iseda Dirava, Lohiabada sibona mo.
5 Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu.
6 “Inai Taravatu, hari dina umui dekenai lau henia gaudia do umui laloaboio lasi.
7 Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.
8 Inai Taravatu be toa dekenai do umui halaoa, vadaeni emui imana dekenai do umui kwatua, bona emui baguna dekenai do umui kumia.
9 Emui iduara dogoatao audia edia latanai, bona iduara ena ataiai audia dekenai inai Taravatu do umui toredia, bona emui ikoukou dekenai danu do umui toredia.
Dirava kamonai lasi kara ena davana garina do umui gari
10 “Lohiabada, emui Dirava, ese umui emui sene taudia Aberahamo, Isako bona Iakobo dekenai ia gwauhamata. Ia gwau, ‘Tano ta mai ena hanua badadia bona namodia, umui haginidia lasi gaudia, be umui dekenai do lau henia.
11 Unai ruma be mai edia kohu namodia, umui haboua lasi gaudia, bona ranu guridia, umui geia lasi gaudia. Unai ruma danu be mai edia vain umadia bona olive umadia, umui hadoa lasi gaudia. Unai neganai do umui ania boga kunu.’
12 To unai neganai do umui naria namonamo, Lohiabada do umui laloaboio garina. Badina ia ese Aigupito taudia edia tano bona edia dagedage dekena amo umui ia hamauria.
13 “Lohiabada emui Dirava dekenai do umui gari, iena gaukara do umui karaia, bona iena ladana dekenai emui gwauhamata do umui karaia.
14 Idau dirava, umui kahirakahira idia noho besedia edia dirava dekenai do umui tomadiho henia lasi.
15 Badina be Lohiabada, emui Dirava, umui dekenai ia noho Diravana, ia ura lasi idau dirava umui laloa. Unai bamona umui karaia neganai, iena badu be lahi bamona umui do ia gabua ore, tanobada ena kopina dekena amo.
16 “Lohiabada emui Dirava do umui dibagania lasi, Masa ranu gabuna dekenai umui dibagania bamona.
17 Lohiabada, emui Dirava ese iena Taravatu bona iena oda umui dekenai ia henia gaudia do umui badinaia.
18 Kara maoromaoro bona kara namodia Lohiabada ena vairanai do umui karaia. Vadaeni do umui namo, bona unai tano namona do umui raka vareai. Unai tano be emui sene taudia dekenai Lohiabada ese ia gwauhamata do ia henidia.
19 Bona umui dekenai idia tuari taudia be umui ese emui vairana dekenai do umui lulua ore momokani, Lohiabada ena gwauhamata hegeregerena.
20 “Nega gabeai emui natudia ese umui do idia nanadaia, do idia gwau, ‘Inai Taravatu bona oda, Lohiabada iseda Dirava ese ita dekenai ia henia edia anina be dahaka?’
21 Unai neganai emui natudia dekenai do umui haere, umui gwau, ‘Ai be Aigupito ena king Farao ena hesiai taudia mai guia danu. To Lohiabada ese Farao ena imana dekena amo ai ia hamauria, mai siahu bada danu.
22 Unai neganai Lohiabada ese toa bona hoa karadia, badadia bona mai garidia, aiemai vairana dekenai ia karaia, Aigupito taudia dekenai, edia king Farao dekenai, bona iena ruma taudia dekenai.
23 Aigupito dekena amo Lohiabada ese ai ia hakaua, iseda sene taudia dekenai ia gwauhamata henidia tanona lalonai, ai ia hakaua vareai, bona ai dekenai ia henia.
24 Bona Lohiabada ese ai ia hamaoroa, inai Taravatu ibounai do ai badinaia, bona Lohiabada, iseda Dirava do ai gari henia. Bema unai bamona ai karaia neganai, Lohiabada ese aiemai bese do ia naria noho, bona do ia hanamoa noho hanaihanai, hari dina ai dekenai ia naria bamona.
25 Iseda kara maoromaoro korikori dalana bona noho namo dalana be inai: Lohiabada iseda Dirava ena Taravatu ibounai do ita badinaia namonamo, ia ese ita ia oda henia vadaeni hegeregerena.’ ”