3
Gau ibounai be mai edia nega
1 Inai tanobada dekenai idia vara gaudia ibounai be mai edia nega korikori, bona kara ibounai danu be mai edia nega:
2 Vara be mai ena nega,
mase danu be mai ena nega.
Hadohado danu be mai ena nega,
geia danu be mai ena nega.
3 Ala-ala danu be mai ena nega,
gorere bona bero hanamoa be mai edia nega.
Ruma kokia be mai ena nega,
ruma haginia be mai ena nega.
4 Taitai be mai ena nega,
bona kiri be mai ena nega.
Lalohisihisi be mai ena nega,
mavaru danu be mai ena nega.
5 Sihari kara be mai ena nega,
sihari lasi danu be mai ena nega.
Rosia kara be mai ena nega,
rosia lasi be mai ena nega danu.
6 Dirava ese gau ita davaria nega ia gwauraia noho.
Bona gau do ita haboioa nega danu be ia ese ia gwauraia noho.
Gau haboua negana danu ia gwauraia,
gau negea negana ia gwauraia danu.
7 Dabua darea negana, bona dabua turia negana danu idia noho.
Regerege lasi dekenai ita noho be mai ena nega,
bona do ita herevahereva danu be mai ena nega.
8 Ura henia ena nega be ia noho,
badu henia ena nega danu be ia noho.
Tuari be mai ena nega,
maino danu be mai ena nega.
9 Iseda gaukara ena hekwarahi dainai, dahaka namo ita davaria noho?
10 Dirava ese taunimanima dekenai gaukara metau herea ia henia, bona edia hekwarahi bada lau diba.
11 Dirava ese gau ibounai mai hairaina danu ia karaia. Edia hairai ena nega danu, be Dirava ese ia gwauraia. Ia ese gabeai do ia vara maurina do ita davaria ena ura, be ita dekenai ia henia vadaeni, to iseda lalona ia ese ia koua bamona, vadaeni ita ese Dirava ena kara ena anina ita davaria diba lasi.
12 Unai dainai lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia.
13 Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.
14 Lau diba Dirava ese ia karaia gaudia ibounai be do idia noho ela bona hanaihanai. Gau ta idia atoa kau diba lasi, bona gau ta idia kokia diba lasi. Dirava ese unai bamona ia karaia, taunimanima be iena vairana dekenai do idia gari totona.
15 Idia vara vadaeni gaudia, bona do idia vara diba gaudia ibounai be guna idia vara vadaeni. Dirava ese ia havaraia vadaeni karadia, be ma ia karaia lou, karaia lou, nega ibounai.
Taunimanima haida be namo idia davaria, haida be dika idia davaria, maka tamona dekenai idia davaria lasi
16 Ma inai danu inai tanobada dekenai lau itaia: Dagi bada taudia, edia gaukara korikori be, kara maoromaoro do idia karaia, to idia karaia lasi. Kara dika bada herea idia karaia. Edia kota hereva danu idia maoromaoro lasi.
17 Lau sibona dekenai lau laloa, inai bamona: “Dirava ese kara maoromaoro bona kara dika taudia do ia kota henia maka tamona dekenai. Ia ese ia sibona ia gwauraia negana dekenai, ibounai edia kara do ia kota henia.”
18 Inai bamona danu lau laloa: Dirava ese taunimanima ia tohoa noho, vadaeni inai dekena amo, idia diba idia be boroma hegeregerena.
19 Badina be taunimanima dekenai ia vara dalana, bona boroma dekenai ia vara dalana be tamona, idia ruaosi be dala tamona dekenai idia mase noho. Idia ibounai ese edia hahodi dalana be tamona. Taunimanima edia mauri dalana ese boroma edia mauri dalana ia hereaia lasi, badina be inai mauri daladia ruaosi be anina lasi.
20 Idia ibounai be gabu tamona dekenai idia lao noho, tano ena kahu. Idia ruaosi be kahu dekena amo idia mai, bona idia ruaosi be kahu dekenai do idia giroa lou.
21 Daika ia diba taunimanima edia lauma be do ia daekau, to boroma ena lauma be tano dekenai do ia diho?
22 Unai dainai lau diba vadaeni, taunimanima edia dala namona tamona be inai: Edia gaukara do idia moalelaia, dala ma ta be lasi. Badina be ita mase murinai dahaka do ia vara, be ta ese ita ia hadibaia diba lasi.