23
Parabole: Tadikaka rua
1 Lohiabada ese lau dekenai ia hereva, ia gwau,
2 “Tanobada tauna e, hahine rua idia noho, idia be hahine tamona ena natuna.
3 Idia be kekeni bona rami hebou neganai, tau haida ese kemedia idia rosia, bona edia ratadia idia gigia. Vadaeni idia ese ariara karadia idia karaia Aigupito dekenai.
4 Hahine vara guna ena ladana be Ohola, bona iena tadina ena ladana be Oholiba. Lau ese idia lau adavaia, vadaeni idia ese natudia tau bona hahine idia havaraia. Edia ladadia edia anina be inai: Ohola be Samaria, bona Oholiba be Ierusalema.
5 “Ohola be egu adavana neganai, ia ese ariara karadia ia karaia. Ia ese ia ura henia taudia, Asuria taudia, be ia ese ia ura dikadika do ia sihari henidia.
6 Idia be tuari taudia, dabua kakakaka idia karaia, lohia taudia bona tuari biagudia, idia ibounai be eregabe taudia namo herea, hosi dekenai idia guia taudia.
7 Vadaeni Ohola ese idia danu lebulebu karadia ia karaia, idia ibounai be Asuria ena tau namodia momokani. Bona Ohola ese ia ura henia dikadika taudia ibounai edia kaivakuku dekenai ia sibona ia hamiroa.
8 “Iena ariara karadia, Aigupito dekenai ia noho dinadia lalonai ia karaia karadia be Ohola ese ia hadokoa lasi, badina be iena kekeni bona rami hebou dinadia lalonai tau haida be ia danu idia mahuta hebou, iena rata idia gigia, bona ia danu lebulebu karadia idia karaia.
9 Unai dainai, ia ura henia taudia, inai Asuria taudia, ia ese ia matabodaga henidia taudia, edia imadia dekenai Ohola lau atoa.
10 Idia ese Ohola ena dabua ibounai idia kokia, iena natuna tau bona hahine idia dogoatao, bona unai murinai idia ese tuari kaia dekenai Ohola idia alaia mase. Hahine taudia ese ia idia kikilaia neganai idia gwau Oholo ia abia davana be maoro.
11 “Ohola ena tadina Oholiba ese inai kara ia itaia, to iena dika ese iena kakana ena dika ia hanaia. Iena matabodaga bona iena ariara karadia be bada. Unai kara dekenai iena kakana be dika, to ia be dika herea.
12 Vadaeni Oholiba danu ese Asuria taudia ia matabodaga henia, lohia taudia, bona tuari biagudia, mai edia tuari dabua namo herea, hosi dekenai idia guia taudia, ibounai be eregabe taudia namo herea.
13 Vadaeni lau itaia, inai hahine Oholiba be ia miro danu, ia ese iena kakana Ohola ena kara hegeregerena ia karaia, idia ruaosi dala tamona idia raka vadaeni.
14 “To Oholiba ese iena ariara karadia ma ia habadaia, ia ese tau edia laulau haba ta dekenai ia itaia, Babulonia taudia edia laulaudia, peni kakakaka dekena amo idia torea vadaeni gaudia,
15 mai edia gaba gaudia edia koekoedia dekenai bona kwara kumia dabuadia edia kwaradia dekenai, ibounai edia toana be lohia taudia, Babulonia dekenai idia noho taudia edia laulaudia.
16 Ia ese idia ia itaia neganai, Ohilaba ese idia ia ura henia dikadika, bona hereva gwauraia taudia idia dekenai ia siaidia lao, Babulonia dekenai.
17 Vadaeni Babulonia taudia be ia dekenai idia mai, ia idia sihari henia, ia lao bona edia lebulebu karadia dekena amo ia idia hamiroa. Idia hamiroa murinai, Oholiba ese idia ia negea, mai badu danu.
18 “To ia ese iena ariara karadia be ia hunia lasi, bona iena kopina kavakava be mai hekokoroku danu taunimanima edia vairanai ia hedinaraia neganai, lau ese ia lau negea mai egu badu danu, iena kakana lau negea hegeregerena.
19 To ia ese iena ariara karadia ma ia habadaia, badina iena kekeni badana ena dinadia ia laloa lou, unai neganai ia ese ariara karadia ia karaia Aigupito tano dekenai.
20 Unuseni ia ura henia taudia, edia usidia be doniki edia usidia bamona, bona edia vesi be hosi edia vesi bamona taudia, be ia ese ia matabodaga henidia.
21 Oholiba e, oiemu kekeni dinadia neganai oiemu lebulebu karadia oi ura dikadika do oi karaia lou. Badina unai neganai Aigupito taudia ese oiemu kemena idia rosia, bona oiemu rata idia gigia, bona umui siharisihari noho.
Dirava ese Oholiba ena dika davana ia henia
22 “Unai dainai Oholiba e, lau Dirava, Lohiabada ese oi lau hereva henia noho inai: Oi idia ura henia taudia, mai badu danu oi negedia taudia, be do lau hatoreisidia, bona kahana ibounai dekena amo idia do lau haboua, oi do idia hadikaia totona.
23 Babulonia taudia, bona Kaledea taudia ibounai, Pekodo bona Soa bona Koa taudia, bona Asuria taudia ibounai idia danu, ibounai be eregabe taudia namo herea bona lohia taudia bona tuari biagudia, tuari opesa badadia, ibounai be hosi idia guia taudia.
24 Idia be oi hadikaia totona mirigini kahana dekena amo do idia mai, mai edia kariota, bona treila, bona edia tuari orea taudia momo herea danu. Idia ese oi do idia koua hagegea, mai edia keme auridia, bona edia kesi, bona edia auri kwara gaudia, bona edia siahu henunai oi do lau atoa. Vadaeni idia ese sibodia edia taravatu dekena amo oi do idia kota henia.
25 Oi dekenai lau badu dainai, lau ese edia badu do lau koua lasi, vadaeni idia ese oiemu udubaubauna bona oiemu taiana do idia utua oho, bona emu heau mauri gwauraia taudia be tuari kaia dekena amo do idia mase. Emu natuna tau bona hahine be unai taudia ese do idia guia, bona do idia abidia lao, bona emu do mauri noho taudia be lahi ese do ia gabudia ore.
26 Idia ese danu oiemu dabua do idia kokia, bona oiemu herahera nadidia namo herea do idia abia lao.
27 Unai dekena amo lau ese oiemu lebulebu bona oiemu ariara karadia, Aigupito dekena amo oi mailaia, be do lau hadokoa. Unai dainai Aigupito taudia be do oi ura henia dikadika lou lasi, bona idia do oi laloa lou lasi.”
28 Badina be Lohiabada Dirava ese inai bamona ia hereva noho, ia gwau: “Kamonai, lau ese oi idia badu henia noho taudia, oi negedia bona oi rakatanidia taudia, edia siahu henunai oi do lau atoa.
29 Vadaeni idia ese mai dagedage danu oiemu hekwarahi ena anina ibounai do idia abia lao, bona kopina kavakava oi do idia rakatania. Unai neganai oiemu ariara karadia edia hemarai do idia hedinaraia. Oiemu lebulebu bona oiemu ariara karadia ese
30 inai hemarai be oiemu latanai ia havaraia, badina be bese idauidau danu ariara karadia oi karaia, bona edia kaivakuku dekena amo oi miro.
31 Oiemu kakana ena dala oi raka vadaeni, unai dainai iena kapusi be oiemu imana dekenai do lau atoa.”
32 Lohiabada Dirava be inai bamona ia hereva, ia gwau,
“Oiemu kakana ena kapusi dekena amo do oi inua,
kapusi be bada bona dobu.
Idia ese oi do idia kirikirilaia,
bona oi dekenai do idia hevaseha,
badina unai kapusi ena anina be bada.
33 Oi be do oi kekero,
bona mai emu lalohisihisi danu,
badina unai kapusi ena muramura be momo herea.
Inai oiemu kakana Samaria ena kapusi,
be gari bada bona hadikaia kara ena kapusi.
34 Do oi inua,
ena muramura do oi inua haorea.
Vadaeni kapusi do oi hamakohia maragimaragi,
bona ena makohia gauna ta dekena amo,
emu ratana do oi darea.
Lau Dirava, Lohiabada ese lau hereva vadaeni.”
35 Unai dainai Lohiabada Dirava be inai bamona ia hereva, ia gwau, “Oi ese lau oi laloaboio bona oiemu murinai lau oi negea vadaeni. Unai dainai oiemu lebulebu bona oiemu ariara karadia edia davana do oi abia.”
Dirava ese Ohola bona Oholiba edia dika davana ia henia
36 Lohiabada ese lau dekenai ia hereva, ia gwau, “Tanobada tauna e, Ohola bona Oholiba do oi kota henia totona oi noho hegaegae, a? Vadaeni edia kara dika rohorohodia do oi gwauraia idia dekenai.
37 Badina idia be idia heudahanai, bona edia natudia tau, lau dekena amo idia havaraia memero, be gabua boubou totona kaivakuku ena lahi ena lalonai idia gabudia ore.
38 Bona unai sibona lasi, to unai dina tamona lalonai egu Dubu Helaga bona egu Sabati Dina idia hamiroa.
39 Badina be edia natudia idia alaia mase bona edia kaivakuku ena boubou gaudia idia halaoa ena dina lalonai, idia ese egu Dubu Helaga lalonai idia raka vareai, bona idia hamiroa. Unai bamona kara be egu Ruma dekenai idia karaia.
40 “Idia ese danu hereva gwauraia taudia idia siaia lao, daudau dekena amo tau haida do idia mai totona, vadaeni idia mai. Idia dainai unai tadikaka ruaosi ese idia digu, edia matadia idia penia, bona edia tauanidia dekenai herahera nadidia idia atoa.
41 Hekure patana namo herea ena latanai idia helai, bona edia vairana dekenai danu pata ta idia atoa, iena latanai bonana namo muramura bona dehoro, idia dekenai lau henia gaudia be unai pata ena latanai idia atoa vadaeni.
42 “Unai neganai moale karaia orea taudia edia boiboi be hanua taudia idia kamonai. Inai orea be tatau, lebulebu taudia, bona tano kaukau dekena amo idia hakaua mai kekero taudia. Vadaeni idia ese unai tadikaka hahine ruaosi edia imadia dekenai rini idia atoa, bona korona namodia momokani edia kwaradia dekenai idia atoa.
43 “Vadaeni lau sibona lau laloa, unai hahine ta be ia heudahanai momo dainai ia buruka haraga vadaeni. Vadaeni lau gwau, ‘Idia ese hahine buruka danu heudahanai do idia karaia, a?’
44 Unai tatau ese unai lebulebu hahine ruaosi Ohola bona Oholiba do idia sihari henia, ariara hahine do idia sihari henia hegeregerena.
45 To kara maoromaoro taudia ese unai hahine do idia gwauraia kerere, vadaeni heudahanai hahine bona taunimanima alaia hahine edia davana do idia henidia, badina idia be heudahanai hahine, bona rara be edia imadia dekenai.”
46 Badina be Dirava, Lohiabada ese inai bamona ia hereva, ia gwau, “Tuari orea ta do umui hakaua mai, unai hahine ruaosi do idia hagaria, bona idia dekena amo do idia henaoa.
47 Bona unai tuari orea taudia ese nadi dekena amo unai hahine ruaosi do idia hodoa, bona edia tuari kaia dekena amo do idia aladia mase, edia natudia tau bona hahine danu do idia aladia mase, bona edia ruma do idia gabudia ore.
48 “Unai dekena amo lebulebu karadia be inai tano dekenai do lau hadokoa. Bona hahine ibounai ese do idia naria namonamo, idia ese unai lebulebu hahine ruaosi hegeregerena do idia karaia lasi momokani.
49 Umui tadikaka hahine ruaosi e, emui lebulebu, bona emui kara dika, kaivakuku umui tomadiho henia karadia dainai davana do umui abia. Unai neganai do umui diba lau be Dirava, Lohiabada.”