43
Lohiabada ese iena Dubu Helaga dekenai ia giroa lou
1 Unai tau ese Dubu Helaga ena dina ia daekau kahana magu iduara dekenai lau ia hakaua.
2 Unuseni Israela ena Dirava ena hairaina lau itaia, dina ia daekau kahana dekena amo ia mai. Dirava ena gadona ena regena be sinavai momo edia regena bamona, bona iena hairaina ese tano ia hadiaria bada.
3 Inai egu mata hanai, be Dirava ese Ierusalema hadikaia ore totona ia mai, lau itaia vadaeni mata hanai bamona, bona Kebara Sinavai ena badibadinai lau itaia gauna danu bamona. Vadaeni tano dekenai lau tui diho haraga, egu vairana be tano dekenai lau atoa.
4 Vadaeni Lohiabada ena hairaina, be dina ia daekau kahana magu iduara ia hanaia, bona Dubu Helaga lalonai ia vareai.
5 Unai neganai Lohiabada ena Lauma ese lau ia abia isi, Dubu Helaga ena lalona ariarana dekenai lau ia hakaua lao. Unuseni lau itaia, Dubu Helaga be Lohiabada ena hairaina dekena amo ia honu.
6 Unai tau be egu badibadinai ia gini unuseni, bona lau kamonai, Lohiabada be lau dekenai ia hereva, Dubu Helaga ena lalona dekena amo, ia gwau:
7 “Tanobada tauna e, egu terona be iniseni. Lau ese inai gabu dekenai egu aena palapala do lau atoa, bona egu bese Israela taudia edia huanai do lau noho ela bona hanaihanai. Israela taudia bona edia king taudia danu ese egu ladana helagana do idia hamiroa lou lasi. Idia ese dirava idaudia do idia tomadiho henia lou lasi, bona idia ese edia king taudia edia mase tauanidia do idia guria lou lasi inai gabu dekenai.
8 King taudia ese edia ruma edia raka vareai gabudia bona edia iduara kahana kahana audia be egu Dubu Helaga ena raka vareai gabudia bona ena iduara kahana kahana audia badibadinai idia haginia vadaeni. Unai dainai lau bona idia, aiemai padana be magu ta sibona. Edia kara dika rohorohodia dekena amo egu ladana helagana idia hamiroa, unai dainai egu badu mai siahu danu dekena amo lau ese idia lau hadikaia ore.
9 Harihari idia ese dirava idaudia tomadiho henia kara do idia hadokoa, bona edia king edia mase tauanidia be egu noho gabu dekena amo daudau do idia abia lao. Bema unai bamona idia karaia, lau ese idia edia huanai do lau noho ela bona hanaihanai.”
10 Ma Lohiabada ese ia hereva, ia gwau, “Tanobada tauna e, Israela taudia dekenai inai Dubu Helaga ena toana do oi hamaoroa, vadaeni edia kara dika dainai do idia hemarai. Dubu Helaga ena palani be idia dekenai do oi hedinaraia, do idia laloa totona.
11 Bona bema edia kara ibounai dainai idia hemarai neganai, Dubu Helaga ena palani do oi hadibadia namonamo, iena toana, iena raka vareai gabudia, bona raka murimuri gabudia, Dubu ena gau ibounai, bona Dubu ena taravatu ibounai danu. Inai gaudia ibounai bona Dubu ena palani be edia vairanai do oi torea, vadaeni idia ese do idia itaia, bona Dubu ena gaukara dalana do idia diba, bona iena taravatu do idia badinaia diba.
12 Dubu Helaga ena taravatu be inai: Dubu Helaga ia hagegea tano ibounai, inai ororo ena ataiai gabuna dekenai, be helaga herea. Dubu Helaga ena taravatu be unai.”
Boubou patana
13 Boubou patana ena bada abia totona, Dubu ena bada ia tohoa dalana be ma ia karaia lou: Dadaira ta ese boubou patana ena badina, nadi gauna, ia hagegea. Inai dadaira ena dobu be 50 sentamita, bona iena lababa be 50 sentamita. Dadaira ena murimurina kahana dekenai be isena ta, iena ataiai be 25 sentamita.
14 Inai boubou patana ena badina nadi ena lata be 9 mita, ena lababa danu be 9 mita. Inai badina nadi ena latanai nadi patapata toi, badana ela bona maragina, idia ta ta edia lata bona lababa be hegeregere gaudia dekena amo boubou patana do idia karaia. Henuna patapata ena lata be 8 mita, iena lababa danu 8 mita, bona iena ataiai be 1 mita. Iena latanai ia noho patapata ena lata be 7 mita, iena lababa danu be 7 mita bona iena ataiai be 2 mita. Iena latanai ia noho patapata, ataiai gauna ena lata be 6 mita, iena lababa danu be 6 mita, bona iena ataiai be 2 mita. Inai patapata toiosi do idia haginia namonamo, vadaeni idia ta ta idia atoa neganai, iena henuna gauna be mai ena aena raka gabuna, bona unai raka gabuna ena lababa 50 sentamita ese henuna patapata ia hagegea noho. Inai raka gabudia ese patapata toiosi idia hagegea, bona edia lababa be 50 sentamita, sitori ibounai dekenai.
15 Inai ataiai patapata be lahi karaia gabuna, boubou gaudia gabua gabuna. Inai patapata ena kona 4 dekenai doa 4 do idia haginia, edia lata be 50 sentamita.
16 Inai boubou patana ena ataiai be sikoea, iena lata 6 mita, bona iena lababa danu 6 mita.
17 Huana dekenai ia noho patapata danu be sikoea, iena lata be 7 mita, iena lababa danu 7 mita, bona iena duduna dekenai isena ta ena ataiai be 25 sentamita ese do ia hagegea. Boubou patana ena badina ia hegegea dadaira ena lababa be 50 sentamita. Boubou patana ena vadavada be dina ia daekau kahanai do ia noho.
Boubou patana idia hahelagaia dalana
18 Lohiabada Dirava ese lau dekenai ia hereva, ia gwau, “Tanobada tauna e, egu hereva do oi kamonai. Boubou patana idia karaia haorea neganai, oi ese iena latanai boubou gaudia do oi gabua ore, bona oi alaia vadaeni boromakau edia rara be boubou patana ena latanai do oi negea. Unai dekena amo boubou patana be do oi hahelagaia.
19 Levi hahelagaia taudia, Sadoka ena iduhu taudia sibona ese egu vairana dekenai do idia mai, egu Dubu Helaga ena hesiai gaukara do idia karaia. Lau Lohiabada Dirava ese inai oda lau gwauraia vadaeni inai: Oi ese boromakau natuna tau ta idia dekenai do oi henia, kara dika totona boubou gauna idia ese do idia halaoa.
20 Unai boromakau ena rara haida be boubou patana ena ataiai idia noho doa edia latanai do oi atoa, bona huanai ia noho patapata ena kona dekenai bona iena isena, huanai ia noho patapata ia hagegea gauna ena kahana ibounai dekenai unai rara do oi atoa. Inai dala dekenai oi ese boubou patana do oi hagoevaia, bona hahelagaia danu.
21 Unai boromakau, kara dika totona boubou gauna, be do oi abia lao, Dubu Helaga ena murimurina kahanai idia abia hidi vadaeni gabuna dekenai do oi gabua ore. Unai gabu be Dubu ena tano, to helaga gabuna ena murimurinai.
22 Vadaeni dina iharuana dekenai, nanigosi tau, bero o toto lasi gauna do oi abia, bona kara dika abia lao totona boubouna do oi halaoa. Boubou patana be nanigosi ena rara dekena amo do oi hagoevaia, boromakau ena rara dekena amo oi hagoevaia hegeregerena.
23 “Oi hagoevaia haorea neganai boromakau ta, dika lasi momokani gauna, bona mamoe orea dekena amo mamoe tau, dika lasi momokani gauna ta danu be boubou gaudia totona do oi henia.
24 Lau Lohiabada, egu vairana dekenai do oi mailaidia. Hahelagaia taudia ese boubou edia latanai damena do idia atoa, bona do idia gabudia ore, lau, Lohiabada, egu.
25 “Dina 7 lalonai, dina ta ta dekenai nanigosi tau ta do oi henia, kara dika abia lao gauna do ia halaoa totona, bona boromakau tau ta, bona mamoe orea dekena amo, mamoe tau ta, mai edia dika lasi momokani gaudia, danu do oi henia.
26 Dina 7 lalonai hahelagaia taudia ese boubou karadia do idia karaia, boubou patana ena dika ibounai abia lao, bona hagoevaia totona. Unai dekena amo do idia hahelagaia.
27 Inai dina 7 idia ore neganai, dina namba 8 ia hamatamaia dekena amo, hahelagaia taudia ese emui gabua ore bouboudia bona emui maino bouboudia be unai boubou patana ena latanai do idia karaia. Unai neganai lau ese umui dekenai do lau laloa namo henia. Lau, Lohiabada Dirava, ese lau hereva vadaeni inai.”