9
Iuda taudia idia kwalimu
1 Hua namba 12, hua ladana Adara, ena dina namba 13 dekenai, king ena oda hereva ena kara do idia karaia. Unai dina dekenai Iuda taudia idia ura hadikaia taudia ese Iuda taudia do idia alaia ore gwauraia. To unai dina dekenai Iuda taudia ese idia toreisi, bona idia badu henia taudia dekena amo idia kwalimu.
2 Iuda taudia idia noho hanua ibounai, king Ahasuero ena basileia ibounai dekenai, Iuda taudia ese sibodia orea ta ta dekenai idia haboua, bona idia hadikaia gwauraia taudia tuari henidia totona idia noho hegaegae. To tau ta ese idia ia koua diba lasi, badina be taunimanima ibounai ese Iuda taudia dekenai idia gari henia noho.
3 Bona basileia edia lohia taudia bona gavana taudia, bona gunalaia taudia bona king ena hesiai taudia ibounai ese Iuda taudia idia durua, badina be Morodekai dekenai idia gari henia.
4 Badina Morodekai ena ladana be bada king ena ruma dekenai, bona basileia ibounai dekenai iena sivarai idia gwauraia loaloa. Iena siahu danu be ia bada lao noho.
5 Unai dainai Iuda taudia ese edia mase dala idia tahua taudia ibounai be tuari kaia dekena amo idia aladia mase, idia hadikadia ore, bona edia ura hegeregerena idia ese idia badu henidia taudia idia halusia momokani.
6 Hanua badana Susa dekenai Iuda taudia ese tau ibounai 500 idia alaia ore.
7 Idia alaia taudia haida edia ladadia be Parasanadata bona Dalapono bona Asipata,
8 bona Porata bona Adalia bona Aridata,
9 bona Paramasita, bona Arisai bona Aridai bona Vaisata.
10 Inai taudia be Hamana Hamedata ena natuna tau ibounai 10. Hamana be Iuda taudia ia dagedage henia tauna.
To Iuda taudia ese idia alaia taudia edia kohu idia abia lasi.
11 Unai dina dekenai, Iuda taudia ese taunimanima hida idia alaia Susa dekenai be tau haida ese king idia hamaoroa.
12 Vadaeni king ese kwini Eseta ia hamaoroa, ia gwau, “Hanua badana Susa lalonai Iuda taudia ese tau ibounai 500 idia alaia mase, bona Hamana ena natuna tau 10 danu. Lau laloa egu basileia oredia dekenai, Iuda taudia ese taunimanima ma momo herea idia alaia vadaeni. Harihari oiemu noinoi be dahaka? Dahaka ma oi ura noho? Lau ese oi dekenai do lau henia momokani, oiemu ura hegeregerena.”
13 Eseta ia haere, ia gwau, “King e, bema oi ura neganai, gwaumaoro be Iuda taudia do oi henia, vadaeni hari dina Iuda taudia Susa dekenai idia karaia kara be kerukeru danu do idia karaia diba. Ma danu do oi oda henia, Hamana ena natuna tau 10 edia tauanidia be taua dae auna dekenai do idia taua dae.”
14 Vadaeni king ese ia oda henia, unai bamona do idia karaia, oda hereva be Susa dekenai idia gwauraia hedinarai, bona Hamana ena natuna tau 10 be idia taua dae.
15 Unai dainai Iuda taudia Susa dekenai be hua ladana Adara ena dina namba 14 dekenai ma idia haboua, Susa dekenai taunimanima ma 300 idia alaia mase. To Iuda taudia ese idia alaia taudia edia kohu idia abia lasi.
16 Iuda taudia oredia, king ena basileia kahana ibounai lalonai idia noho danu idia haboua, edia mauri gimaia totona, bona idia ese idia hadikaia gwauraia taudia ibounai 75,000, idia badu henidia taudia, idia alaia mase. To Iuda taudia ese idia alaia taudia edia kohu idia abia lasi.
17 Unai kara be hua ladana Adara ena dina namba 13 dekenai idia karaia, bona dina namba 14 dekenai idia laga-ani, aria bona moale dinana dekenai idia halaoa.
18 To Susa dekenai idia noho Iuda taudia ese edia laga-ani be dina namba 15 dekenai idia abia, badina dina namba 13 bona dina namba 14 danu dekenai idia haboua vadaeni, taunimanima alaia totona.
19 Unai dainai Iuda taudia, hanua maragidia, mai edia magu lasi hanuadia lalonai idia noho, ese lagani ta ta hua ladana Adara ena dina namba 14 be edia laga-ani bona moale dina badana idia halaoa. Inai dina dekenai aniani bada idia ania hebou, bona harihari gaudia be idia ta ta dekenai idia henia.
Purimi ena Aria
20 Unai neganai Morodekai ese inai dina edia kara ibounai edia sivarai ia torea, bona revareva ia torea, Iuda taudia ibounai dekenai ia siaidia, king Ahasuero ena basileia ibounai lalonai, gabu kahirakahira, bona gabu daudau danu.
21 Morodekai ese idia ia hamaoroa, hua ladana Adara ena dina namba 14 bona 15 be lagani ta ta ibounai edia laga-ani dinadia do idia badinaia.
22 Inai dinadia dekenai Iuda taudia ese idia ura hadikaia taudia dekena amo kwalimu idia abia. Bona unai hua lalonai edia lalohisihisi bona taitai be idia ore, bona edia gabu dekenai moale bona laga-ani idia davaria. Morodekai ese Iuda taudia ia hamaoroa, unai dina ruaosi lalonai aria bona moale do idia karaia, bona idia ta ta dekenai, bona ogogami taudia dekenai harihari gaudia do idia henia.
23 Unai dainai Iuda taudia be idia gwauhamata, idia ese Morodekai ena revareva ena oda hereva be lagani ta ta ibounai dekenai do idia karaia.
24 Badina be Hamana Hamedata, Agaga tauna, Iuda taudia ia badu henidia tauna, ese Iuda taudia hadikaia ore dalana ia laloa, bona laki gadara ta ladana Puru ia karaia, idia do ia halusia bona do ia hadikadia ore totona.
25 To Eseta be king ena vairanai ia gini neganai, king ese oda hereva ia torea, unai oda dekena amo Hamana ese iena laloa dikana Iuda taudia totona gauna be ia sibona dekenai ia havaraia. Bona ia, bona iena natuna tau danu, be taua dae auna dekenai idia taua dae, idia mase.
26 Unai dainai, unai dina ena ladana be “Purimi” idia atoa, unai Parasa hereva “Puru” dainai.
Vadaeni, Morodekai ena revareva ena oda hereva dainai, bona idia dekenai idia vara gaudia ibounai dainai,
27 Iuda taudia ese idia laloa tamona, inai Purimi kara be taravatu do idia halaoa, idia bona edia tubudia edia latanai, bona idau bese taudia, Iuda orea idia vareai vadaeni taudia danu edia latanai. Lagani ta ta ibounai, inai dina ruaosi be do idia laloa bona badinaia momokani, ena nega korikori dekenai, bona Morodekai ese ia torea oda hereva ibounai hegeregerena.
28 Inai Purimi dina ruaosi be do idia laloatao, bona badinaia, uru ibounai lalonai, edia bese ta ta bona iduhu ta ta ibounai lalonai, bona basileia bona hanua ibounai lalonai danu. Inai Purimi dinadia badinaia kara be do ia doko lasi, bona Iuda taudia edia tubudia edia tubudia edia huana dekena amo inai kara be do ia boio lasi momokani.
29 Vadaeni kwini Eseta, Abihaili ena natuna, bona Morodekai, Iuda tauna, ese revareva iharuana ma idia torea. Inai revareva ese danu Purimi ena dina ruaosi ia herevalaia, bona revareva lalonai kwini Eseta ese Morodekai ena Purimi oda hereva ia durua bona hamomokania, mai ena siahu danu.
30 Revareva be Eseta bona Morodekai idia siaia, Iuda taudia ibounai dekenai idia lao. Revareva ta ta be Parasa ena basileia ibounai 127 dekenai idia lao. Revareva edia lalonai inai bamona idia torea, “Iuda taudia ibounai e, maino bona noho namo do umui abia.
31 Umui bona emui tubudia, gabeai idia vara taudia, ese inai Purimi dina ruaosi do umui badinaia namonamo, edia nega korikori dekenai, umui ese aniani lasi taravatu bona taitai negadia ena taravatu umui badinaia hegeregerena. Lau Morodekai bona kwini Eseta, ai ruaosi ese inai taravatu umui dekenai ai atoa.”
32 Inai oda hereva, Eseta ese ia torea gauna, ese Purimi ena taravatu ia haginia, bona revareva idia torea danu, do idia hamomokania totona.