15
Israela taudia edia ane
1 Vadaeni Mose bona Israela taudia ese inai ane idia abia, Lohiabada ena, idia gwau:
Lau be ane do lau abia, Lohiabada ena,
badina be ia kwalimu herea vadaeni.
Hosi bona idia guia taudia,
be davara dekenai ia negea diho vadaeni.
2 Lohiabada ese iena goada, bona iena siahu,
be lau dekenai ia henia.
Ia sibona ese lau ia hamauria vadaeni.
Lauegu Dirava inai, iena ladana do lau hanamoa.
Ia be egu tamana ena Dirava,
bona iena ladana do lau habadaia egu ane dekenai.
3 Lohiabada be tuari tauna,
iena ladana be Lohiabada.
4 Farao ena kariota bona iena tuari oreana,
be davara dekenai ia negea diho vadaeni.
Iena tuari biagudia namo herea taudia,
be Davara Kakakaka dekenai idia mase vadaeni.
5 Davara ese ia koudia momokani.
Dobu gabuna dekenai idia diho, nadi bamona.
6 Lohiabada e, oiemu imana idiba kahana,
ena siahu be namo herea momokani.
Lohiabada e, oiemu imana idiba kahana ese,
ai dekenai idia tuari henia taudia ia alaia mase vadaeni.
7 Oiemu siahu bada herea momokani ese,
oi dekenai idia tuari henia taudia ia halusia.
Oiemu badu ese lahi bamona Aigupito taudia ia gabua ore,
rei kakoro ia gabua ore bamona.
8 Hurehure dekenai, oiemu uduna ena hodahoda oi henia,
vadaeni hurehure idia haboua.
Idia lao gabu tamona dekenai haboua,
idia gini haba bamona.
Davara ena dobu gabuna dekenai,
be iena tano ia auka momokani.
9 Tuari henia tauna ia gwau,
“Idia do lau lulua, bona idia do lau dogoatao.
Edia kohu be do lau haria karaia,
bona lauegu ura idia dekenai do lau karaia.
Lauegu tuari kaia do lau abia isi,
bona egu goada dekena amo edia kohu ibounai do lau abia.”
10 To oiemu lai tamona oi siaia,
vadaeni davara ese inai tuari taudia ia koua.
Idia be davara dekenai idia diho, auri ia metau bamona.
11 Lohiabada e, dirava ibounai edia huanai,
oi bamona ta be daika?
Oi hegeregere be daika?
Helaga dekenai oi be herea momokani.
Daika be oi bamona?
Hoa karadia oi karaia,
bona kara badadia mai gari danu oi karaia noho.
12 Oiemu imana idiba kahana oi atoa maoromaoro,
vadaeni tano ese ai dekenai idia tuari taudia ia ania ore.
13 Oi hamauria vadaeni besena oi ese oi gunalaia,
oiemu gwauhamata hegeregerena.
Oiemu goada dekenai oi hakaudia vadaeni,
ia mai bona oiemu gabu helagana.
14 Bese idauidau oiemu kara ena sivarai idia kamonai,
vadaeni idia gari, idia heudeheude.
Pilistia taudia edia gari,
be mara ena hisihisi bamona.
15 Edoma lohia taudia danu idia gari dikadika noho.
Moaba edia siahu taudia danu idia gari momo.
Kanana noho taudia ibounai edia lalona goada ia ore vadaeni.
16 Edia kudouna dekenai idia hoa mai gari danu.
Oiemu goada ia bada herea dainai,
idia be nadi hegeregerena idia gini, idia marere lasi,
ia lao bona oiemu taunimanima korikori ese idia hanaia vadaeni.
Lohiabada e, ela bona oi ese oi ruhaia taudia ese,
idia raka hanaia vadaeni.
17 Oi ese idia do oi hakaua vareai,
bona oiemu ororo korikori ena latanai do oi atodia.
Oi Lohiabada ese oiemu noho gabuna dekenai oi halaoa vadaeni gabuna inai.
Oi Lohiabada oiemu imana ese inai Dubu Helaga oi haginia vadaeni.
18 Lohiabada e, oi be do oi King ela bona hanaihanai.
19 Momokani Israela taudia be tano kaukau dekenai idia raka, davara ena huana dekenai. To Farao ena hosi bona ena kariota bona iena hosi guia taudia be davara ena lalona dekena amo idia heau lao, vadaeni Lohiabada ese davara ia abia lou, bona iena hurehure dekena amo idia ia koua.
Miriama ena ane
20 Vadaeni Miriama, peroveta hahine, Arona ena taihuna, ese tareko ia abia iena imana dekenai, bona hahine ibounai ese edia tareko idia abia, Miriama ena murina dekenai idia lao, mai mavaru danu.
21 Vadaeni Miriama ese tatau edia ane ena davana ia karaia, ane ia abia, ia gwau:
Ane do umui abia, Lohiabada ena,
badina be ia kwalimu herea vadaeni,
ia ese hosi bona guia taudia,
be davara dekenai ia negea diho.
Israela taudia idia ranu mase
22 Vadaeni Mose ese Israela taudia Davara Kakakaka dekena amo ia hakaudia lao. Taunimanima noho lasi gabuna ena ladana Suru dekena amo ia hakaudia hanai, bona dina toi taunimanima noho lasi gabuna dekenai idia laolao, ranu idia davaria lasi.
23 Vadaeni Dika Ranuna Gabuna dekenai idia ginidae, to inai gabu ena ranu idia inua diba lasi, badina ena mamina be ia dika. Unai dainai ena ladana idia atoa Dika Ranuna Gabuna.
24 Vadaeni laolao taudia ese Mose dekenai idia hereva badubadu, idia gwau, “Ai be dahaka dohore ai inua?”
25 Vadaeni Mose ia noinoi goada Lohiabada dekenai, vadaeni Lohiabada ese au ta ia hedinaraia Mose dekenai, Mose ese inai au ia atoa diho ranu dekenai, vadaeni ranu ese mamina namo ia davaria. Unai gabu dekenai Lohiabada ese taravatu ia henia idia dekenai, idia edia goada do ia tohoa totona.
26 Ia gwau, “Bema umui ese Lohiabada emui Dirava ena gadona umui kamonai henia, bona bema lauegu vairana dekenai emui kara ia maoromaoro, bona bema lauegu hagoadaia hereva umui badinaia, bona bema lauegu taravatu umui naria namonamo, lau ese gorere idauidau do lau henia lasi umui dekenai, Aigupito taudia dekenai gorere lau henia hegeregerena, badina lau be Lohiabada, umui lau hamauria Diravana.”
27 Vadaeni idia be Elima dekenai idia ginidae, unuseni ranu guri be 12, bona pama audia be 70. Vadaeni inai ranu guri ena badibadinai idia kamepa.