18
Mose ena ravana ese ia vadivadi henia
1 Ietero be Midiana ena hahelagaia tauna, bona ia be Mose ena ravana. Ietero ese Mose bona Israela taudia Dirava ese ia durua ena sivarai ibounai ia kamonai. Bona Lohiabada ese Israela taudia Aigupito dekena amo ia hakaudia lao noho ena sivarai danu be Ietero ia kamonai.
2 Mose be guna iena adavana Sipora ia siaia lou iena tamana dekenai. Vadaeni hari Ietero ese Sipora ia mailaia lou Mose dekenai.
3 Ietero ese Sipora ena natuna memero rua Geresome bona Eliesere danu ia mailaia. Mose be guna ia gwau, “Lau be idau tano dekenai lau noho vadaeni.” Unai dainai iena natuna ta ena ladana ia atoa Geresome, ena anina Heberu gado dekenai be “idau tano noho.”
4 Inai bamona ia gwau danu, “Egu tamana ena Dirava be egu durua tauna, bona Farao ena kaia dekena amo lau ia hamauria vadaeni.” Unai dainai iena natuna ta ena ladana ia atoa Eliesere, ena anina Heberu gado dekenai be “Dirava be egu durua tauna.”
5 Ietero, Mose ena ravana, be Mose ena adavana bona natuna danu idia mai, taunimanima noho lasi gabuna dekenai, bona Dirava ena ororo kahirakahira dekenai idia ginidae. Unuseni Mose ia kamepa noho.
6 Ietero ese hereva ia siaia guna Mose dekenai, ia gwau, “Lau, Ietero, oiemu ravana, be oi dekenai lau mai, oiemu adavana bona natuna memero rua danu.”
7 Vadaeni Mose ese ia dekenai ia lao, hedavari totona. Mose ese iena ravana ena vairana dekenai iena kwarana ia atoa diho, ia kisi henia. Edia mauri be edena bamona, be idia sibona ta ta dekenai idia henanadaia, vadaeni palai ruma dekenai idia raka vareai.
8 Mose ese Lohiabada ena kara ibounai ena sivarai iena ravana dekenai ia hamaoroa. Ia hamaoroa Lohiabada ese edena bamona Farao bona Aigupito taudia dekenai ia karaia, Israela taudia dainai. Danu ia hamaoroa edena bamona idia hekwarahi bada, dala dekenai, bona edena bamona Lohiabada ese idia ia hamauria.
9 Ietero ia moale bada, Lohiabada ena bogahisihisi ese Israela taudia ia hamauria Aigupito taudia dekena amo dainai.
10 Ietero ia gwau, “Lohiabada ita hanamoa, ia ese Aigupito taudia edia imana dekena amo, bona Farao ena imana dekena amo umui ia hamauria vadaeni. Danu ita hanamoa, badina be Aigupito taudia edia guia dekena amo Lohiabada ese iena bese taudia ia ruhaia vadaeni.
11 Harihari lau diba Lohiabada ese dirava ibounai ia hereaia noho. Badina be Aigupito taudia be mai hekokoroku danu Israela idia hadikaia neganai, Lohiabada ese Aigupito ia halusia vadaeni.”
12 Vadaeni Ietero ese lahi ia gabua ore boubou gauna ia henia Dirava dekenai. Boubou gaudia haida ma danu Dirava dekenai ia henia. Unai neganai Arona bona Israela tau badadia ibounai idia haboua, Mose ena ravana danu idia aniani hebou, Dirava ena vairanai.
Kota biaguna taudia idia abia hidi
13 Kerukeru dabai, Mose ese taunimanima ia kota henidia, iena vairana dekenai taunimanima idia gini, daba ia lao bona hanuaboi.
14 Ietero, Mose ena ravana ese inai kara ibounai ia itaia neganai ia nanadaia, ia gwau, “Inai oi karaia taunimanima dekenai ena anina be dahaka? Badina dahaka oi sibona oi helai, bona taunimanima ibounai oiemu vairana dekenai idia gini noho daba ia lao bona hanuaboi?”
15 Mose ia haere, ia gwau, “Lau be inai bamona lau karaia badina be taunimanima be lau dekenai idia mai, Dirava ena ura do idia diba totona.
16 Bema tau rua idia heai neganai, lau kota henidia, bona Dirava ena oda bona ena taravatu lau hadibaia idia dekenai.”
17 Vadaeni Ietero ese ia hamaoroa, ia gwau, “Oiemu kara be ia namo lasi.
18 Oiemu goada be do ia ore, inai taunimanima danu edia goada be do ia ore. Badina be inai gaukara ia metau bada. Oi sibona do oi karaia diba lasi.
19 Lauegu hereva oi kamonai, sisiba namona oi dekenai do lau henia, bona Dirava ese oi do ia hanamoa. Oi be taunimanima durua totona, Dirava ena vairanai do oi gini, edia heai be ia dekenai do oi gwauraia hedinarai totona.
20 Oi ese danu Dirava ena oda bona iena taravatu idia dekenai do oi hadibaia. Edia mauri dalana bona edena bamona do idia noho, do oi hedinaraia. To inai danu do oi karaia:
21 Tau haida, mai edia aonega danu do oi abia hidi, Dirava dekenai idia gari taudia, bona moni abia hunia dala karana idia ura lasi taudia. Taunimanima gunalaia taudia do oi halaodia, 1000 ta ta edia gunalaia taudia, 100 ta ta edia gunalaia taudia, 50 ta ta edia gunalaia taudia, 10 ta ta edia gunalaia taudia.
22 Idia ese kota biaguna gaukara do idia karaia noho dina ibounai. Hereva badadia be oi dekenai do idia mailaia, to hereva maragidia be idia sibona do idia tahua. Inai dala dekenai oiemu gaukara be do ia metau bada lasi, badina gaukara umui haria dainai.
23 “Bema inai bamona oi karaia, Dirava ena oda hegeregerena, oiemu goada be do ia ore lasi, bona inai taunimanima be do idia giroa edia rumadia dekenai, mai edia maino danu.”
24 Mose ese Ietero dekenai ia kamonai henia, bona iena sisiba hegeregerena ia karaia.
25 Israela taudia ibounai dekena amo aonega taudia ia abia hidi, bona taunimanima edia gunalaia taudia ia halaodia, 1000 ta ta, 100 ta ta, 50 ta ta, bona 10 ta ta edia gunalaia taudia.
26 Idia ese kota biaguna gaukara idia karaia dina ibounai. Hereva badadia be Mose dekenai idia mailaia, to hereva maragidia be idia sibona idia tahua.
27 Vadaeni Mose ese iena ravana ia bamahuta henia, bona Ietero ia giroa lou iena tano dekenai.