26
Palai Dubu helagana
1 Lohiabada ese ma Mose ia hamaoroa ia gwau, “Palai Dubu ta do umui karaia lau totona. Dabua auka, bona namo herea ibounai 10 dekena amo do umui karaia, edia kala be bulu, bona kakakaka, bona kakakaka sisina. Herahera dalana diba tauna ta ese inai dabua ibounai edia latanai kerubi aneru edia laulau do ia turia namonamo.
2 Inai dabua 10 ibounai edia bada be hegeregere. Edia lata be 12 mita, bona edia lababa be mita rua.
3 “Dabua ibounai 5 do umui turia hebou, vadaeni dabua tamona, latana, do ia lao. Ma dabua 5 do umui turia hebou, vadaeni dabua tamona, latana, gunana hegeregerena, ma do ia lao.
4 Dabua, iena kala bulu dekena amo be rini momo do umui karaia, inai dabua latadia rua do umui haboua tamona totona. Rini ibounai be inai dabua latadia edia isena dekenai do umui kwatua kau.
5 Inai rini 50 be dabua ginigunana ena isena dekenai do umui kwatua, ma inai bamona danu rini 50 be dabua iharuana ena isena dekenai do umui kwatua.
6 Ma umui ese kimai 50 be golo dekena amo do umui karaia. Unai kimai 50 be inai dabua badadia ruaosi edia rini do idia vareai. Unai dekena amo unai dabua badadia ruaosi be do umui hakapua tamona, vadaeni dubu tamona do ia lao.
7 “Inai murinai dabua badana ta do umui karaia, lauegu Palai Dubu do umui koua totona. Inai dabua badana be nanigosi huina dekena amo karaia dabua ibounai 11 dekena amo do umui karaia.
8 Inai dabua 11 edia bada be tamona, edia lata be 13 mita, bona edia lababa be mita rua.
9 Inai dabua 5 do umui turia hebou, dabua latana ta do ia lao. Ma dabua 6 danu be do umui turia hebou, dabua latana ta do ia lao. Dabua namba 6 be do umui lokua, ia ese Palai Dubu ena vairana do ia koua totona.
10 Inai dabua latana ginigunana ena isena dekenai dabua rini ibounai 50 do umui kwatua, bona dabua latana iharuana ena isena dekenai danu unai bamona rini 50 do umui kwatua.
11 Kimai ibounai 50, be auri laboralabora dekena amo do umui karaia, bona unai dabua latadia ruaosi be kimai 50 dekena amo do umui hakapua, vadaeni dabua tamona do ia lao.
12 Vadaeni inai dabua latana ena noho kava dabua mita tamona be lauegu Palai Dubu ena murina kahana dekenai do ia taua dae.
13 Inai Palai Dubu koua dabua ena lata ese Palai Dubu ena lata do ia hanaia 50 sentamita dekenai kahana bona kahana dekenai. Unai dainai koua dabua ese Palai Dubu do ia koua momokani.
14 “Bona umui ese Palai Dubu ena guhi rua do umui karaia, ta be mamoe tau ena kopina, ena kala kakakaka, bona ta be davara ena boromakau, rui, ena kopina dekena amo. Inai be ataiai momokani ena guhi.
15 “Palai Dubu ena haba turia ta ta be akasia audia stadi rua dekena amo do umui karaia, mai edia padana audia, vadavada ena toana bamona.
16 Inai akasia audia stadi edia lata be 4 mita, bona haba turia edia padadia dekenai idia noho audia edia lata be 66 sentamita.
17 Inai akasia au stadi ta ta ibounai be do idia lata sisina, vadaeni idia ta ta be siliva maua ta ta lalonai do idia gini, haba turia hagoadaia totona. Inai akasia au stadi ibounai do umui utua neganai, ibounai edia lata be tamona.
18 “Inai haba turia, vadavada bamona gaudia, ibounai 20 be Palai Dubu ena diho kahana habana dekenai do umui haginia.
19 Siliva dekena amo maua 40, mai edia matudia do umui karaia. Inai matudia ta ta lalonai stadi ta ta do idia gini. Inai maua rua be haba turia ta ta henunai do idia noho, stadi hagoadaia, bona stadi do idia marere lasi totona.
20 “Palai Dubu ena mirigini kahana habana dekenai danu be haba turia ibounai 20 do umui haginia.
21 Inai haba turia ta ta ibounai edia henunai be siliva maua rua do umui atoa.
22 “Palai Dubu ena dina diho kahana habana dekenai haba turia ibounai 6 do umui haginia.
23 Bona iena kona ruaosi dekenai haba turia rua do umui haginia.
24 Inai kona haba turia ruaosi be henuna kahanai do umui kwatua auka. Bona atai kahanai be rini dekena amo do umui kwatua hebou auka. Kona ruaosi be unai bamona do umui haginia.
25 Unai dainai Palai Dubu ena murina kahanai habana ena haba turia ibounai be 8, bona siliva maua ibounai be 16, maua rua be haba turia ta ta edia henunai do idia noho.
26 “Reirei latadia danu be akasia audia dekena amo do umui karaia, ibounai 5 be Palai Dubu ena mirigini kahana habana dekenai,
27 ma ibounai 5 be Palai Dubu ena diho kahana habana dekenai, bona ibounai 5 be Palai Dubu ena dina diho kahana habana dekenai.
28 “Inai reirei latadia, haba ena huanai ia kwatua gaudia, be do idia lata, edia lata be haba ena lata hegeregere momokani.
29 Haba turia ibounai be golo dekenai do umui koua, bona golo rini do umui kwatua, inai reirei latadia do idia dogoatao totona. Unai reirei latadia danu be golo dekena amo do umui koua.
30 Palai Dubu be do umui haginia namonamo, iena toana be lau ese ororo dekenai oi dekenai lau hedinaraia laulau ena toana hegeregerena.
31 “Koua dabua helagana ta danu do umui karaia Palai Dubu ena lalonai do ia noho totona. Inai dabua be mamoe huina dekenai do umui karaia, iena kala be bulu, kakakaka, bona kakakaka sisina. Bona kerubi aneru edia laulau be dabua latanai do umui turia namonamo.
32 Koua dabua helagana be du 4 dekenai do umui taua dae. Du ibounai 4 be akasia audia dekena amo do umui karaia. Inai du be golo dekena amo do umui koua. Bona unai du be siliva maua 4 edia matudia lalonai do umui haginia. Kimai haida golo dekenai do umui karaia, bona du edia latanai kimai do umui kwatua kau.
33 “Vadaeni koua dabua helagana be golo kimai dekenai do umui taua dae. Taravatu Maua be koua dabua helagana ena murinai do umui atoa, Helaga Herea Gabuna lalonai. Inai koua dabua helagana ese Helaga Gabuna, bona Helaga Herea Gabuna do ia hapararaia.
34 “Taravatu Maua ena latanai, iena koua gauna, kara dika ena gwauatao gabuna, do umui atoa, Helaga Herea Gabuna ena lalona dekenai.
35 “To pata be Helaga Gabuna lalonai do umui atoa, Palai Dubu ena mirigini kahana dekenai. Lamepa dogoatao gauna be Palai Dubu ena diho kahana dekenai do umui atoa.
36 “Palai Dubu ena iduara dekenai koua dabua do umui karaia. Koua dabua ena latanai toana namona herahera do umui turia namonamo.
37 Koua dabua dogoatao totona, be akasia audia du ibounai 5 do umui haginia, mai edia golo kimai. Inai du be golo dekena amo do umui koua. Inai du be edia lalonai do idia gini totona, maua 5 do umui karaia, auri laboralabora dekena amo.”