6
Keristani taudia ta ta dekenai durua henia be namo
Lauegu varavara taudia e, bema Keristani tauna ta ia kerere neganai, umui Lauma Helaga umui kamonai henia taudia ese unai tau do umui hakaua lou, mai manau danu. To umui naria namonamo, dibagani ese umui danu do ia koia garina. Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia. Bema tau ta sibona inai bamona ia laloa, “Lau be namo,” to momokani ia be namo lasi neganai, ia be sibona ia koia. Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi. Badina be ibounai ta ta sibona ena metau, ena metau do idia huaia.
Dirava ena hadibaia hereva ia tahua tauna ese iena hadibaia tauna dekenai harihari gaudia do ia henia be namo, iena gaukara davana.
Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai, ia ese mase do ia abia. Bema Lauma ena gau ia hadoa neganai, ia ese mauri hanaihanai do ia abia. Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia. 10 Unai dainai, dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.
Paulo ese Keriso ena satauro ia heagilaia
11 Mani umui itaia, inai toretore be revareva badadia egu imana dekenai umui dekenai lau torea noho. 12 Tau haida idia hereva goada noho, umui ese kopina utua kara do umui abia. Badina dahaka inai bamona idia karaia? Badina ta be inai: Idia ura taunimanima ibounai ese idia do idia hanamoa. To badina korikori be inai: Idia laloa, “Namo lasi haida idia diba ita be Keriso ena satauro ita abidadama henia, ita do idia alaia mase garina.” 13 Idia ese kopina utua kara idia abia, to Taravatu idia kamonai henia lasi. Idia ura be kopina utua kara do umui abia, taunimanima edia hanamoa bada do idia abia totona. 14 To lau be gau ta do lau heagilaia lasi, iseda Lohiabada Iesu Keriso ena satauro sibona do lau heagilaia. Badina be Iesu ena satauro dekena amo, lau dekenai tanobada gaudia idia mase, bona lau be tanobada gaudia dekenai lau mase. 15 Kopina utua kara, bona kopina utua lasi kara ruaosi be anina lasi. To gau ta be mai anina bada herea: Vara matamata, Dirava ese ita dekenai ia havaraia gauna. 16 Inai bamona laloa idia abia dae bona badinaia taudia be namo. Dirava ena maino bona bogahisihisi be idia edia latanai do ia noho, badina inai taudia be Dirava ena Israela momokani orea taudia.
17 Lauegu hereva dokona be inai: Tau ta ese lau dekenai hisihisi do ia henia lou lasi. Badina be lauegu kopina ena bero toana ese idia hedinaraia lau be Iesu ena hesiai tauna mai guia danu.
18 Lauegu varavara taudia e, iseda Lohiabada Iesu Keriso ena hariharibada, be umui emui lauma dekenai do ia noho. Amen.