16
Hagara bona Isamaela
1 Aberamo ena adavana, Sarai, be gabani, natuna ta ia abia lasi Aberamo dekenai. To ia be mai ena hesiai hahine ta, Aigupito hahine, iena ladana be Hagara.
2 Sarai ese Aberamo dekenai ia hereva, ia gwau, “Oi diba, Lohiabada ese natuna ta lau dekenai ia henia lasi. Oi dekenai lau noinoi, lauegu hesiai hahine oi abia, sedira natuna ta ia dekenai do lau abia.”
Vadaeni Aberamo ese Sarai ena hereva dekenai ia kamonai henia.
3 Unai dainai Sarai ese iena hesiai hahine Hagara, Aigupito hahine, ia abia, iena adavana Aberamo dekenai ia henia, do ia adavaia. Aberamo be lagani 10 Kanana dekenai ia noho murinai inai kara ia vara.
4 Aberamo be Hagara danu idia mahuta hebou murinai hahine be ia rogorogo.
Hagara ia diba ia be rogorogo vadaeni dainai, iena biaguna hahine dekenai ia matauraia lasi.
5 Vadaeni Sarai ese Aberamo dekenai ia hereva, ia gwau, “Hagara ese lau ia matauraia lasi, be oiemu kerere dainai. Lauegu hesiai hahine lau henia oi dekenai, to ia diba ia be rogorogo neganai ia mai bona hari, ia ese lau ia matauraia lasi, Lohiabada ese ita ruaosi iseda huanai do ia gwauraia daika be maoro, bona daika be kerere.”
6 To Aberamo ese Sarai dekenai ia haere, ia gwau, “Vadaeni, hahine be oiemu imana dekenai, oiemu ura hegeregere oi karaia ia dekenai.” Vadaeni Sarai ese ia dagedage henia, ia lao bona Hagara be ia heau.
7 Lohiabada ena aneru ese taunimanima lasi gabuna ena ranu guri ta dekenai Hagara ia davaria. Unai ranu guri be Suru dala ena badibadinai.
8 Aneru ia gwau, “Hagara e, Sarai ena hesiai hahine, edeseni oi mai, bona edeseni do oi lao?” Ia haere, “Lau be Sarai dekena amo lau heau noho.”
9 Ia gwau, “Oi giroa lou, bona iena hereva oi kamonai henia.”
10 Aneru ma ia gwau,
“Lau ese tubuna momo oi dekenai do lau henia,
duahia diba lasi.
11 Oi be nega sisina lalonai,
mero ta do oi abia.
Iena ladana do oi atoa, Isamaela.
Badina be Lohiabada ese oiemu hisihisi,
bona emu tai ia kamonai vadaeni.
12 To oiemu natuna ese,
uda doniki bamona do ia noho.
Ia ese taunimanima ibounai dekenai,
do ia dagedage henia,
bona taunimanima ibounai ese,
ia dekenai do idia dagedage henia.
Ia be iena varavara danu do ia noho lasi.”
13 Hagara ese sibona dekenai ia henanadai, ia gwau, “Momokani, inai gabu dekenai Dirava lau itaia, to lau mauri noho?” Unai dainai Hagara ese Lohiabada ena ladana ia atoa, “Oi be lau oi itaia noho Diravana”.
14 Unai dainai unai ranu guri Kadesi bona Beredi huanai, ena ladana idia atoa, “Lau ia itaia Mauri Tauna ena ranu guri”.
15 Vadaeni, Hagara ia mara, mero ta ia abia, Aberamo ena. Bona Aberamo ese iena ladana ia atoa Isamaela, ena anina be, “Dirava ia kamonai noho.”
16 Unai neganai Aberamo ena mauri lagani be 86.