5
Hahelagaia Tauna Badana Iesu ese ita ia hamauria diba momokani
1 Hahelagaia Tauna Badana idia abia hidi dalana be inai bamona: Taunimanima edia huanai dekena amo Dirava ese ia abia hidi, ia be Dirava ena hesiai tauna, taunimanima durua totona. Iena gaukara danu be, kara dika kokia totona boubou gaudia ia karaia, bona harihari gaudia ia henia.
2 Ia danu be mai ena manoka dainai, ia be taunimanima edia manoka bona edia aonega lasi ia bogahisihisi henia diba.
3 Bona ia be manoka dainai, ia ese boubou gaudia ia henia, taunimanima sibona totona lasi, to ia sibona totona danu.
4 Inai Hahelagaia Tauna Badana ena gaukara be bada herea. Tau ta ese unai gaukara ena siahu be sibona ia abia diba lasi, to Dirava ese unai tau ia boiria, vadaeni unai dagi ia henia, guna Dirava ese Arona ia boiria bamona.
5 Keriso danu be inai bamona. Ia sibona ese ia hanamoa, vadaeni ia sibona Hahelagaia Tauna Badana ena gaukara ia abia, a? Lasi momokani. Dirava ese unai dagi ia henia, bona Dirava ese Iesu ia herevalaia, ia gwau:
“Oi be lauegu Natuna.
Hari dina oi lau havaraia vadaeni.”
6 Ma gabu ta danu dekenai Dirava ese Iesu ia herevalaia lou, ia gwau:
“Oi be hahelagaia tauna ela bona hanaihanai.
Oi be Melekisedeka ena orea tauna.”
7 Ia be tanobada dekenai ia noho neganai, Iesu ese Dirava ia guriguri henia, mai taitai bona mai matana ranu danu. Ia noinoi, badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura gauna ia noia lasi, bona ia be Dirava henunai ia manau noho dainai.
8 Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia.
9 Ela bona ia be namo momokani vadaeni, iena namo ese ibounai edia namo ia hereaia. Unai dainai ia be hegeregere vadaeni, ia dekenai idia kamonai henia taudia ibounai dekenai, be mauri hanaihanai do ia henidia. Dirava ese inai dala ia havaraia.
10 Bona Dirava ese Iesu ia gwauraia Hahelagaia Tauna Badana, Melekisedeka ena orea momokani lalonai.
Beibei sibona bamona do umui noho lasi
11 Melekisedeka totona hereva momo ai ura hadibaia, to umui ai hadibaia be auka, badina be umui emui lalona idia do metau dainai.
12 Nega ia ginidae vadaeni, umui be hadibaia taudia do umui halaoa totona. To umui be do diba maragi taudia. Unai dainai tau ta ese Dirava ena hereva, diba hamatamaia gaudia umui dekenai ia hadibaia lou be namo. Badina umui be rata sibona umui inua diba, umui be do hegeregere lasi aniani korikori do umui ania.
13 Rata ia inua tauna be do beibi bamona. Ia be maoro bona kerere edia toana ia diba lasi.
14 To aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.