10
Momokani umui be do umui dika! Umui ese taravatu maoromaorodia lasi egu bese taudia edia latanai umui atoa. Umui ese oda aukadia umui atoa, ogogami taudia edia gau korikori do umui henaoa totona, bona egu bese taudia dekenai kota maoromaoro do umui henia lasi totona. Umui ese vabu taudia umui dagedage henia noho, bona tamana lasi maragidia edia kohu umui abia kava noho. Dirava ese dina ta ia abia hidi vadaeni, umui ese umui karaia kara dika ena davana do ia henia. Unai dina dekenai umui be dahaka do umui karaia? Unai dina dekenai, dika bada herea be daudau dekenai ia noho tano dekena amo do ia mai. Durua abia totona be edeseni do umui heau? Emui kohu momo be edeseni do umui hunia?
Gau ta do umui karaia diba lasi. Badina be tuari taudia ese umui do idia alaia, o umui do idia abia mauri, mai guia danu.
Lohiabada ese inai bamona umui dekenai do ia karaia, to iena badu be do ia ore lasi. Ia ese iena imana do ia abia isi noho.
Dirava ese Asuria ena king ia gaukaralaia
Lohiabada ia gwau, “Asuria e! Lau ese Asuria lau gaukaralaia noho, egu botaia auna bamona. Ia dekena amo lau badu henia taudia lau panisia noho. Lau ese Asuria taudia lau siaia lao, Dirava idia gari henia lasi bese do idia hadikaia totona. Lau ese Asuria tano lau oda henia, lau badu henia taudia do ia hadikaia. Lau hamaoroa, edia kohu do ia dadia bona henaoa, bona taunimanima do ia moidia diho, ariara ena kopukopu bamona.
“To Asuria ena king be unai bamona ia laloa lasi. Iena laloa be lauegu ura bamona lasi. Ia ura bese momo do ia hadikaia ore momokani. Ia ese mai hekokoroku danu ia hereva noho, ia gwau, ‘Egu tuari lohia taudia ibounai be king taudia bamona lasi, a? Lau ese Kalano bona Karekemisi, bona Hamata bona Arapada lau halusia vadaeni, ani? Samaria bona Damaseko danu lau halusia vadaeni ani? 10 Lauegu imana lau abia isi, kaivakuku idia tomadiho henia basileia ibounai lau dogoatao. Unai basileia edia kaivakuku be momo, Ierusalema bona Samaria edia kaivakuku idia hanaia.
11 “ ‘Lau ese Samaria mai ena kaivakuku ibounai lau hadikaia ore vadaeni. Bona lau ese Ierusalema bona iena kaivakuku ibounai be momokani do lau hadikaia ore danu, ani?’ ”
12 To Lohiabada ia gwau, “Lau ese egu panisia gaukara ibounai Siona Ororo bona Ierusalema edia latanai lau haorea neganai, lau ese Asuria ena king ena hekokoroku hereva bona iena heagi bada dainai, ia do lau hadikaia.
13 “Badina be Asuria ena king ese mai hekokoroku danu ia hereva, ia gwau, ‘Lauegu imana ena goada dekena amo unai tuari dekenai lau kwalimu, egu aonega dekena amo danu, badina lau be laloa kehoa tauna. Bese idauidau edia tano hetoadia lau kokia, bona edia kohu namodia lau henaoa ore. Egu siahu be boromakau tau bamona dainai, edia king taudia lau halusia. 14 Tanobada besedia be manu ena ruma bamona, bona lau ese edia kohu lau haboua haraga, hekwarahi lasi, gatoi bema lau haboua bamona. Idia ta ena hanina ia hamarerea lasi, idia ta ese iena uduna ia kehoa lasi, bona idia ta ia boiboi lasi.’ ”
15 To Lohiabada ia gwau, “Ira be sibona do ia hekokoroku, ia ese ia gaukaralaia tauna do ia negea, a? O iri be sibona do ia abia isi, ia gaukaralaia tauna do ia gwau henia, a? Unai kara be au ese ia abia isi tauna do ia kwadia, o kepata, au gauna ese tau, au gauna lasi, do ia abia isi bamona.
16 “Unai dainai lau Lohiabada, Siahu Ibounai Lohiabada ese tauanina hamaragia gorere unai Asuria tuari taudia dekenai do lau siaia. Idia edia tauanidia lalonai lahi bamona do ia gabua noho, gabua noho. 17 Dirava, Israela ena diari, be lahi do ia halaoa. Israela ena Helaga Dirava be lahi hururuhururu do ia halaoa, bona dina tamona lalonai, Asuria king ena gau ibounai do ia gabua ore, iena ava ginigini, bona iena au ginigini danu. 18 Asuria ena uda namodia momokani, bona iena uma namodia, be lau, Lohiabada ese do lau hadikaia ore, mase gorere ia abia tauna ena tauanina ia maragi lao bamona. 19 Uda ena audia, do noho gaudia, be momo lasi dainai, natuna maragina ese idia do ia duahia diba.”
Israela taudia haida sibona ese edia lalona do idia giroa
20 Unai dina dekenai Israela taudia, mase dekena amo idia heau mauri vadaeni Iakobo ena bese taudia ese, idia hadikadia taudia do idia abidadama henia lou lasi. Idia ese Lohiabada, Israela ena Helaga Dirava do idia abidadama henia momokani.
21 Israela taudia haida, Iakobo bese taudia haida ese, edia Siahu Diravana dekenai do idia giroa mai. 22 Momokani, hari Israela bese taudia be momo herea, kone miri bamona, to momo lasi sibona ese Dirava dekenai do idia giroa mai. Dirava ese mai kara maoromaoro danu, iena bese momo do ia hadikaia ore. 23 Io, Israela ena kahana ibounai dekenai, Siahu Ibounai Lohiabada ese tano do ia hadikaia momokani, iena hereva hegeregerena.
Lohiabada ese Asuria do ia panisia
24 Unai dainai Lohiabada, Siahu Ibounai Lohiabada, be inai bamona ia hereva, ia gwau, “Egu bese taudia e, Siona dekenai umui noho taudia e, Asuria taudia do umui gari henia lasi. Idia ese au bona kepata dekenai umui idia botaia noho, Aigupito taudia guna idia karaia bamona, to do umui gari henidia lasi. 25 Nega sisina ia ore neganai, egu badu umui dekenai do ia ore, bona unai Asuria taudia do lau hadikaia ore.
26 “Lau, Siahu Ibounai Lohiabada ese egu kwadi auna dekena amo idia do lau hadikaia, Midiana taudia Oreba Nadi Badana dekenai lau hadikadia ore neganai bamona. Bona lau ese egu itotohi be ranu edia ataiai do lau atoa, Aigupito dekenai lau karaia hegeregerena.
27 “Unai dina dekenai, lau ese Asuria ena siahu dekena amo umui do lau kokia ruhaia, bona edia maduna metau be emui pagadia dekena amo do lau kokia, idia do lau hadikaia ore. Bona umui dekenai dehoro muramura do lau atoa.”
Tuari taudia ese Ierusalema do idia tuari henia
28 Ai idia hadikaia gwauraia tuari taudia ese,
Ai hanua idia abia vadaeni,
Migerona idia raka hanaia vadaeni.
Mikimase dekenai edia kohu idia haboua noho.
29 Ororo raka hanaia gabuna dekena amo idia hanaia vadaeni.
Geba dekenai hanuaboi neganai idia kamepa ela bona dabai.
Rama taudia idia heudeheude noho,
Gibea, Saulo ena hanua,
ena taudia idia heau vadaeni.
30 Galimi hahine taudia e,
do umui tai bada!
Laisa taudia e, do umui kamonai!
Anatoto taudia e,
do umui haere henia.
31 Madamena taudia idia heau noho.
Gebimi dekenai noho taudia,
be idia heau mauri noho.
32 Hari inai dina dekenai,
inai tuari taudia be Noba dekenai idia noho.
Idia itaia,
Siona Ororo be daudau lasi,
vadaeni edia imana idia lokua auka kuboro.
Inai imadia kuboru dekena amo,
idia hedinaraia noho,
Ierusalema hadikaia totona idia noho hegaegae.
33 Kamonai! Lohiabada,
Siahu Ibounai Lohiabada ese,
tau badadia bona goadadia,
ladana bada taudia do ia atoa diho.
Harihari idia be goada herea,
au badadia, lata herea gaudia bamona.
To Lohiabada ese idia do ia utua diho,
bona hekokoroku taudia,
be do idia hemarai.
34 Lohiabada ese unai taudia do ia utua diho,
uda ena lalonai audia,
ira dekena amo idia utua diho bamona,
Lebanona ena au latadia idia utua diho bamona danu.