15
Dirava ese Moaba do ia hadikaia ore
1 Peroveta hereva Moaba totona be inai:
Ara hanua bona Kiri hanua,
be hanuaboi tamona lalonai idia hadikaia ore dainai,
Moaba taudia ibounai edia noho be dika momokani.
2 Dibona taudia be ororo dekenai idia daekau,
ataiai guriguri gabuna dekenai do idia taitai totona.
Nebo bona Medeba hanua edia latanai danu,
be Moaba taudia idia taitai mai boiboi danu.
Idia ibounai edia kwarana huina idia utua.
Idia edia auki huina ibounai danu idia utua ore.
3 Ariara lalonai puse dabua idia karaia noho.
Edia ruma guhi edia latanai,
bona hanua edia huanai danu,
taunimanima ibounai idia tai noho,
mai boiboi danu.
Edia taitai dainai,
edia tauanidia idia manoka noho.
4 Hesebona bona Eleale hanua taudia danu idia tai noho,
mai boiboi danu.
Edia gadodia be taunimanima ese idia kamonai noho,
ia lao bona Iahasa.
Unai dainai, Moaba ena tuari taudia danu, be idia tai bada noho
bona edia kudoudia idia manoka lao noho.
5 Moaba dainai egu kudouna ia tai noho!
Moaba taudia idia heau ia lao bona Soara,
bona ia lao bona Egelata Selisia.
Haida be Lahiti ia daekau lao dalana dekenai idia raka noho,
mai taitai danu.
Haida be Horonaimi dalana dekenai idia lao,
edia dika dainai idia taitai,
mai boiboi bada danu.
6 Nimirimi Sinavai maragina be ia kaukau.
Rei be ia mase noho,
bona rei matamata ia tubu noho lasi.
Tano dekenai idia vara gaudia ibounai,
be idia ore vadaeni.
7 Moaba taudia ese edia kohu ibounai,
bona idia haboua vadaeni gaudia ibounai,
be Arabimi Sinavai unai kahana dekenai idia huaia hanaia.
8 Moaba ena tano hetoana ena kahana ibounai dekenai,
taunimanima idia taitai noho.
Inai taitai ena regena,
be Egelaimi hanua ia lao bona Bere Elima dekenai idia kamonai noho.
9 Dibona hanua dekenai,
sinavai ena ranu be rara dainai ia kakakaka,
to Dirava ese Dibona ena hisihisi ma do ia habadaia.
Ia ese laiona, be Moaba heau mauri taudia darea totona ia siaia,
idia ese Moaba dekenai do noho taudia do idia alaia mase danu.